1 Qan, Tata Dios, kallpay kanki; noqa munakuyki. 2 Qan pakakunay chhanka kanki, jark'akuwaj, kacharichiwaj Diosniytaj. Qan kanki pakakunay chhanka, jark'akuna escudoytaj, atiyniyoj Salvawajniy, kallpay, patapi sumaj pakakunaytaj. 3 Qanqa, Tata Dios, yupaychanapaj jina kanki. Qanta qhapariykamojtiy, enemigosniymanta salvawanki. 4 Wañuypa watanasnin ch'ipaykuwarqa. Manchachikuna mayu yakus jina mancharichiwarqa. 5 Wañoyqa ukhu pachaj waskhasninwan mayt'uykuwarqa. Wañuypa tojllampi rikhurerqani. 6 Jina phutiypi kashaspa, Tata Diosta wajyakorqani. Diosniymanta yanapata mañakorqani. Paytaj Templonmantapacha uyarimuwarqa, qhaparisqaytaj ninrisninkama chayarqa. 7 Chaypacha jallp'aqa sinch'ita kharkaterqa. Orqospis uranmantapacha ikhakorqanku; Tata Diospa phiñakuyninwan kharkatiterqanku. 8 Senqanmantaqa q'oshñi llojsimorqa. Siminmantataj tukuy imata q'olaj nina llojsimullarqataj. K'ajarishaj nina brasas ima siminmanta t'akarikamorqa. 9 Cielosta khallarpariytawan, Payqa urayk'amorqa, chakisnin urapitaj yana phuyus karqa. 10 Lijrasniyoj uj querubinman lloq'aykuspa, wayraj lijrasnimpi jina phawarqa. 11 Pakakunampajtaj sinch'i laqhayayta muyuynimpi churarqa, yanayarishaj yaku phuyutawan. 12 Uj sinch'i k'anchay ñawpaqenmanta llojserqa. Phuyumantataj k'ajarishaj nina brasas granizo jina t'akakamorqa. 13 Patapi kaj Diosqa janaj pachamanta uyarichimorqa qhon qhon jina parlayninta, granizowan, nina brasaswantaj. 14 Flechasninta, lliuj lliujninkunatawan kachaykorqa, enemigosniytataj tukuynejman ch'eqeracherqa. 15 Mama qochaj ukhun rikhurimorqa, kay pachaj cimientosnimpis rikhurirparillarqataj, Qampa k'amiyniykiwan Tata Dios, senqaykej samayninwantaj. 16 Patamantapacha Diosqa makinta jaywamuwarqa; chay jina ukhu mama qochamanta orqhowarqa. 17 Chay jina atiyniyoj enemigosniymanta salvawarqa, chejnikuwarqanku chaykunamantawan, noqamanta aswan kallpayoj kajkunamanta. 18 Sinch'i llakiypi kashajtiy, maqaj wakiykuwarqanku; chaywampis Tata Diosqa yanapawarqa. 19 Enemigosniymanta kacharichiwarqa; noqawan kusisqa kasqanrayku salvawarqa. 20 Tata Diosqa cheqan kawsasqayman jina t'inkata qowan, llimphu purisqayman jinataj qopuwan. 21 Noqaqa Tata Diospa ñanninta qhaterqani. Ni jayk'aj Diosniymantaqa karunchakunichu. 22 Sonqoypi kashan tukuy nisqasnenqa. Ni jayk'ajpis kamachisqasninmantaqa karunchakunichu. 23 Paypa ñawpaqempi mana pantaspa purerqani; sajra ruwaymanta waqaychakuni. 24 Chayrayku Tata Diosqa t'inkata qowan cheqanta ruwasqayrayku, Paypa ñawpaqempi llimphu sonqoyoj kasqayman jina. 25 Qanqa, Tata Dios, khuyajtaqa khuyallankitaj, cheqan runawampis cheqallantaj kanki. 26 Ch'uwa sonqoyojwanqa ch'uwa sonqollataj kanki. Millay ruwaj runamantajrí phiñakuyniykita rikuchinki. 27 Llamp'u sonqoyojkunata Qan salvanki, uma oqharejtarí k'umuykachachinki. 28 Qan, Tata Dios, k'anchayta qowanki. Qan, Diosníy, laqha kayniyta k'anchaykunki. 29 Yanapayniykiwan enemigoyta atipasaj, may chhikachaj perqastapis wasaykusaj. 30 Tata Diospa ñannenqa cheqanmin. Tata Diospa nisqasnenqa atienekunapaj jinapuni. Diosqa waqaychan Paypi tukuy pakakojkunata. 31 Pitaj Dios kanman Tata Diosmanta astawanri? Waj dios kanmanchu chhankapi jina pakakunanchejpaj? 32 Dioslla noqataqa kallpachawan. Paylla ni pejpa k'aminanta kawsachiwan. 33 Paymin chakisniyta tarukaj chakisninta jina qowan. Paymin pataspi sinch'ita sayachiwan. 34 Paytaj maqanakupaj sumajta yachachiwan; Paymin kallpata qowan broncemanta arcota mat'ita aysanaypaj. 35 Qan waqaychawanki, salvawankitaj, paña makiykiwantaj sayachiwanki; k'acha kayniyki jatumpi rikhurichiwan. 36 Ñanniyta pichapuwanki, chakisniy ama llusk'anampaj. 37 Enemigosniyta qhatiykorqani taripanaykama; paykunata tukuchiytawan kutimporqani. 38 Tukuyninkuta phiriykorqani amaña ujtawan jatarinankupaj. Chakisniy uraman urmarqanku. 39 Qan kallpachawarqanki maqanakupaj. Enemigosniytaqa ñawpaqeypi k'umuykachacherqanki. 40 Enemigosniyta ñawpaqeymanta ayqechinki, ajinamanta chejnikuwajkunata tukucherqanki. 41 Yanapata mañakorqanku, nitaj pipis yanaparqachu. Tata Diosta wajyakorqanku, Paytajrí mana uyarerqachu. 42 Wayraj apanan ñut'u jallp'ata jina paykunata phirerqani. Ñan patapi t'uruta jina paykunata sarorqani. 43 Ashkha runaswan maqanakupi kashajtiy, Qanmin librawarqanki. Nacionesta kamachinaypaj churawarqanki, mana rejsisqasniy runastaj sirviwanku. 44 Uyariwaspa, usqhayta kasuwanku. Forastero runaspis misk'ita parlaykuwanku. 45 Forastero runas q'ewarakunku; pakakusqankumanta kharkatitispa llojsimunku. 46 Jatunchasqa kachun Tata Diosqa; waqaychawajneyqa bendecisqa kachun. Salvawaj Diosneyqa jatunchasqa kachun. 47 Diosqa noqaman kutikuwan. Payqa waj llajtastawan kasuchiwan. 48 Enemigosniymantapis Pay salvawan; contraypi oqharikojkunamanta aswan pataman churawan. Qan, Tata Dios, maqanaku mask'aj runasmanta salvawanki. 49 Chayrayku, Tata Dios, naciones ukhupi yupaychayki; sutiykita yupaychaspa, takirisaj. 50 Qanqa ajllakusqayki reyta may chhika kutista yanapanki atipanampaj. Munakuywampuni Davidta, miraynintawan wiñaypaj qhawanki.
