1 Tata Dios, cheqan kajta mañakusqayta uyariway, qhaparikusqaytapis uyarillaway. Mañakusqayta uyariway, imaraykuchus mana llullakuspa mañakushayki. 2 Qanlla noqamantaqa maychus kajta niy. Qan yachanki imachus cheqan kajta. 3 Sonqoypi imachus kasqanta Qan watuwarqanki; wateqawaj ch'isin jamuwarqanki. Pruebaman churawarqanki imaynachus kasqayta yachanaykipaj, manataj ima sajratapis noqapi tarerqankichu. Sonqoypi nerqani simiywan mana pantanayta. 4 Runaj ruwasqasninmanta parlaspa, Qampa kamachisqasniykirayku phiñakuspa kallpaman atienekuy ruwanamanta karunchakuni. 5 Ñankunaykipipuni purini, chakisniy ama llusp'inampaj. 6 Qanman qhaparikuyki, Diosníy, imaraykuchus Qanqa kutichiwanki; uyariwaj churakuy, parlasqayta uyarillaway. 7 Qan salvanki enemigosninkumanta pikunachus atiyniykipi pakakojkunata. Jinaqa rikuchiway k'acha khuyakuyniykita. 8 Ñawi papaykita jina waqaychaway. Lijraykej urampi pakaykuway ñak'arichiwaj 9 sajra runaspa ñawisninkumanta, enemigos mask'awaspa wañuchiwayta munajkunamantawan. 10 Wira kayninkuwan jatunchakunku, wapu wapulla oqharikuspataj parlaykachanku. 11 Qhepallaypipuni purinku mayllapipis, ñawillankupitaj purichiwanku pampaman wijch'unawankupaj. 12 Jap'iyta munaj león jina kanku, jusk'umpi pakasqa phiña león jina. 13 Jatarikuy Tata Dios, paykunawan uyapuramuy; paykunata k'umuykuchiy. Espadaykiwan chay sajra runasmanta salvaway. 14 Atiyniykiwan paykunamanta libraway, Tata Dios. Libraway kay pacha runasmanta, paykunaj herenciankoqa kay kawsayllapi kashan, chaykunamanta. Saqey paykuna qhapajyanankuta, wawasninkutaj mikhuchunku sajsanankukama, puchuchuntaj allchhisninkupajwan. 15 Noqarí, cheqan kayrayku uyaykita rikusaj; uyaykita rikunaypaj rijch'arejtiy, sonqoy junt'asqa kanqa.
