1 Waqaychaway Diosníy, imaraykuchus Qampi atienekuni. 2 Nerqayki: Qanmin Tata Dios kanki. Qanmanta jawaqa mana noqapaj ima allin kanchu, nispa. 3 Kay pachapi noqapaj t'aqasqa kajkuna, chaykunamin allin runas kanku; paykunamantamin kusikuni. 4 Pikunachus waj diospa qhepanta purinku, chaykunapaj ñak'ariykuna astawan yapakun. Chaywampis noqaqa ni jayk'ajpis chay lantisman uywa wañuchisqasta jaywasajchu, nitaj sutisninkuta jayk'ajpis oqharisajchu. 5 Qanmin Tata Dios, tukuy imay kanki; kawsayniy makisniykipi kashan, bendicionesniykiwan junt'a kani. 6 Manchay k'acha cheqata sorteopi jap'erqani. Sumaj herenciamin noqaman chayawajqa. 7 Tata Diosta yupaychasaj, Pay yuyaychawasqanrayku. Sonqoy ukhupi ch'isisnin Pay k'amiwan. 8 Tata Diospipuni yuyani; Pay pañaypi kajtin, mana imapis urmachiwanqachu. 9 Chayrayku, sonqoy ukhupi may kusisqa kani. Tukuy kayneyqa Qampi suyaspa samarikonqa. 10 Mana wañusqastawan khuskachu saqerpariwanki, nitaj t'aqakusqayki kaj wañojtin, asnaykojta saqenkichu. 11 Kawsayman pusaj ñanta rikuchiwanki. May jatun kusikuy tiyan ñawpaqeykipi; Qanwanqa wiñaypaj sonqo qhallallariy tiyan.
