SALMOS 147

1Jatunchasqa kachun Tata Diosqa. May sumajmin Diosninchejman takeyqa; yupaychayqa k'achapuni, takiytaj misk'i. 2Tata Diosqa watejmanta Jerusalenta jatarichin. Ch'eqerasqa israelitasta tantaykun. 3Payqa sonqo p'akisqasta thañichin, nanasqasninkutataj jampiykun. 4Payqa ch'askasta yupan, sapa ujtataj sutinmanta wajyan. 5Señorninchejqa jatunmin, may atiyniyojtaj; yachaynimpis mana tukukuyniyoj. 6Tata Diosqa llamp'u sonqosta oqharin, sajra runastatajrí k'umuykachachin. 7Tata Diosman graciasta qospa takiychej; Diosninchejman arpaj waqaynimpi takiychej. 8Payqa cielota phuyuswan junt'achin; Payqa jallp'apaj parata wakichin, orqospipis qhorasta wiñachin. 9Payqa uywasman mikhunata qon; qharqaña irpas waqajtinkupis, mikhuchin. 10Diosqa mana caballoj kallpantachu mask'an, nitaj runaj kallpantachu. 11Tata Diosqa Payta manchachikojpi kusiyta tarin, pikunachus khuyakuynimpi suyakojkunapipis. 12Jerusalén, Tata Diosta jatunchay. Sión, Diosniykita yupaychay, 13imaraykuchus punkusniykej llavenasninta sinch'iyacherqa, llajta ukhuykipi runastapis bendecillarqataj. 14Payqa jallp'aykiman allin kawsayta apamun, allin kaj trigowantaj sajsachisunki. 15Payqa kamachisqanta kay jallp'aman apachimun; chay kamachisqantaj usqhayta corren. 16Payqa rit'ita t'akamun millmata jina, escarchastapis ushphata jina qhallimun. 17Chhullunkata granizota jina apachimun. Chirichimusqampi pitaj kakuyta atillanmanri? 18Pay kamachejtin, chhullunkas unuyanku. Pay wayrachimojtin, yakusqa puririnku. 19Payqa Jacobman Simi Nisqanta rejsicherqa. Kamachisqasninta, yachachiyninkunatapis Israelman sut'incharqa. 20Mana ajinataqa ruwarqachu mayqen nacionwampis; paykunaqa Diospa kamachisqasninta mana yachankuchu. Tata Diosqa jatunchasqa kachun.

will be added

X\