SALMOS 145

1Diosníy, Reyníy, jatunchasqayki, wiñaypa wiñaynimpajtaj sutiykita jatunchasaj. 2Sapa p'unchay yupaychasqayki, wiñaypa wiñaynimpaj sutiykita yupaychasaj. 3Tata Diosqa jatunmin, mayta yupaychanapaj jinapuni. Jatun kaynenqa mana yachay atina. 4Tukuy tiempo runas ruwasqasniykirayku jatunchasonqanku, jatun ruwasqasniykitataj willanqanku. 5Tukuy may sumaj atiyniykimanta parlakonqanku; noqapis k'acha ruwasqasniykimanta parlallasajtajpuni. 6Jatun atiywan manchachikuna ruwasqasniykimanta parlakonqanku; noqapis jatun kayniykimanta parlallasajtaj. 7K'acha munakuyniyoj kasqaykimanta yuyarikuspa parlanqanku. Cheqan kasqaykitapis takispa willallanqankutaj. 8Tata Diosqa wawa sonqoyoj, khuyakuyniyojtaj, mana phiñakullanchu, jatun munakuyniyojtaj. 9Tata Diosqa tukuypajmin k'acha; tukuy ruwasqasninta khuyakuywan qhawan. 10Tukuy ruwasqasniyki, Tata Dios, jatunchasuchunku; qhatisojkunapis yupaychallasuchunkutaj. 11Reinoykej jatun kayninmanta parlachunku, atiyniykimantawan, 12tukuy runasman rejsichinankupaj jatun atiywan ruwasqasniykita, reinoykej jatun kaynintawan. 13Rey kasqaykeqa wiñaypaj; kamachiyniykeqa tukuy tiempo runaspaj. 14Tata Diosqa tukuy urmajkunata oqharispa sayachin, jinallatataj k'umuykachachisqastapis aysarin. 15Tukuypa ñawisnin Qampi suyakunku, Qantaj tiempompi paykunata mikhuchinki. 16Makiykita kicharispa, tukuy kawsajkunata sajsachinki ashkhata qospa. 17Tata Diosqa tukuy ruwasqasnimpi cheqampuni, tukuy imapitaj k'acha sonqoyoj. 18Tata Diosqa Payta wajyakojkunaj qayllampi kashan, pikunachus cheqa sonqowan Payta wajyakojkunaj qayllankupi. 19Payta manchachikojkunaj munarisqankuta junt'an; yanapata mañakusqankuta uyarispa, paykunata salvan. 20Tata Diosqa Payta munakojkunata waqaychan, sajra runastatajrí chinkarparichenqa. 21Simeyqa Tata Diosta jatunchachun. Tukuypuni santo sutinta wiñaypaj yupaychachunku.

will be added

X\