SALMOS 144

1Yupaychasqa kachun pakakunay chhanka, Tata Diosqa; Payqa yachachiwan, amañachiwantaj wañuchinaku ch'ajwapi maqanakunaypaj. 2Paymin khuyakuwajniy, jark'awajniy, ancha sumaj pakakunay, librawajniy ima. Payqa jark'akuna escudoy; Payqa waj runastapis makisniyman jaywaykun. 3Tata Dios, imataj runa kasqa paymanta yuyanaykipajri? Imataj runa kasqa payta chhikatapuni munakunaykipajri? 4Runaqa uj phuyu jinalla; kawsaynenqa chinkaj llanthu jinalla. 5Tata Dios, cielosniykita qhataraspa, urayk'amuy; orqosta llankhariy q'oshñirinankupaj. 6Lliuj lliujkunata kacharispa, paykunata ch'eqerachiy. Flechasniykita kacharispa, enemigosniykita t'ustillata ruway. 7Makiykita patamantapacha jaywarimuy, librawaytaj jatun qochamanta, forastero runaspa makinkuman urmanaymantawan. 8Libraway llullakojkunamanta, mayqenkunachus paña makinkuta oqharispa juranku, manataj nisqankuta junt'ankuchu, chaykunamanta. 9Tata Dios, uj mosoj takiyta takipusqayki; chunka cuerdasniyoj tocanawan takiykunata takipusqayki. 10Qanqa reyesta yanapanki atipanankupaj; Qanqa kamachiyki Davidta salvarqanki wañuchej espadamanta. 11Libraway forastero runaspa makinkuman urmanaymanta; libraway llullakojkunamanta, pikunachus paña makinkuta oqharispa juranku, manataj nisqankuta junt'ankuchu, chaykunamanta. 12Churisniykoqa huertapi sumaj qhawasqa plantas jina wiñachunku, ususisniykutaj wasi esquina rumimanta sayantas k'achitu ch'eqosqa jina kachunku. 13Pirwasniykoqa tukuy imaymana mikhunaswan junt'a kachunku. Uywasniykoqa jallp'asniykupi waranqa waranqasta mirarichunku. 14Wakasniykoqa llank'anapaj kallpayojllapuni kachunku. Manaña ni pi manchachikuspa qhaparenqachu callesniykupi, nitaj ima wañuchinaku ch'ajwa kanqachu. 15Kusikuyniyojmin ajinapi rikhurej runas; kusikuyniyojmin chay jina Señor Tata Diosniyoj aylloqa.

will be added

X\