SALMOS 143

1Tata Dios, mañakusqayta uyariway; allinta uyariway mañakususqayta. Uyarimuway, Qan cheqan kasqaykirayku, nisqaykita junt'ajtaj. 2Ama cuentata mañaychu kamachiykimantaqa, imaraykuchus ñawpaqeykipeqa mana pipis llimphu llojsinmanchu. 3Enemigosneyqa qhatiykachawanku; kawsayniyta pampaman ch'allpanku; laqhapi kawsachiwayta munanku, unayña wañusqata jina. 4Ancha llakisqa kashani, sonqoypitaj iskayrayasqa kashani. 5Ñawpa p'unchaykunamanta yuyarikuni, tukuy ruwasqasniykipi yuyarikuni. 6Qanman makisniyta oqharini; Qanmanta ch'akichikuni ch'aki jallp'apis kayman jina. 7Tata Dios, usqhayllata uyariway, imaraykuchus samayniy tukukapushanña; ama uyaykita pakaykuwaychu, manachayqa wañusqa jina kayman. 8Tutamanta munakuyniykita yachachiway, imaraykuchus Qampi atienekuni. Imaynatachus kawsanayta yachachiway, imaraykuchus tukuy sonqoywan Qanllaman chimpamuyki. 9Tata Dios, enemigosniymanta libraway; Qampi pakakusaj. 10Munayniykita ruwayta yachachiway, Qanqa Diosniy kasqaykirayku. Qampa sumaj Espirituyki cheqan ñanta pusawachun. 11Tata Dios, sutiykirayku kawsachiway; cheqan kasqaykirayku llakiymanta orqhoway. 12Khuyakuyniykirayku enemigosniyta ch'inyarparichiy; tukuy enemigosniyta tukuchiy, imaraykuchus noqa kamachiyki kani.

will be added

X\