1 Tata Dios, Qanmin allinta qhawaykuwanki, rejsiwankitaj. 2 Tukuy ruwasqasniyta Qan yachanki. Yuyasqaytaqa karumantapacha Qan yachanki. 3 Qan yachanki tukuy purisqayta, samarikusqaytapis, yachankitaj tukuy ruwasqayta. 4 Manaraj parlashajtiy, Tata Dios, Qanqa ñapis yachankiña. 5 Tukuynejmanta muyuykuwanki, makiykitataj patayman churaykunki. 6 Yachayniykeqa may jatun noqapajqa, mana yachanaypaj jinachu; chay jina jatun kajtin, mana entiendeyta atinichu. 7 Espirituykimanta maymantaj ayqekuyman? Qanmanta maymantaj ayqeyta atiyman? 8 Janaj pachamanchus wichariyman chayqa, chaypi Qan kanki. Jallp'a ukhuman yaykuyman chaypis, chaypipis Qan kashallankitaj. 9 Sichus inti llojsimuy cheqakojman phawayman, manachayrí inti yaykuynejpi mama qochaj tukukuynimpi tiyakuyman chaypis, 10 chaypipis makiykeqa taripawanman, paña makiykitaj mana kachariwanmanchu. 11 Sichus laqhapi pakakuyta yuyayman chayqa, sitajchus muyuyniypi k'anchay laqhaman tukunman chaypis, 12 laqhapis mana Qanmanta pakawanmanchu, manachayqa p'unchay jina k'ancharinman, imaraykuchus k'anchaypis, laqhapis sut'illapuni Qampajqa. 13 Qanmin tukuy ukhuyta ruwawarqanki. Mamaypa wijsampeqa Qampuni ruwawarqanki. 14 Jatunchayki, imaraykuchus t'ukunapaj jina ruwawarqanki; chaytaqa sumajta yachani. 15 Qampajqa mana pakasqachu karqa ukhuy wiñasqanqa, pakaypi ruwasqa kashajtiypis. Jallp'a urapi ruwakushajtiypis, 16 ñawisniykeqa imaynatachus cuerpoy ruwakusharqa, chayta rikorqaña. Imaynachus kawsayniy kananta libroykipi qhelqasqaña karqa, manaraj ni uj p'unchayniypis kashajtin. 17 Diosníy, ancha sumajpuni noqapaj yuyasqasniykeqa; tukuynenqa mana yupay atina. 18 Noqa yupayta munayman chaypis, t'iyumanta aswan ashkhapuni kanman. Chay yupasqaypi sayk'usqayrayku puñurparispa rijch'ariyman chaypis, Qanllawampuni kashani. 19 Diosníy, sajra runaspa kawsayninkuta qhechuy; noqamanta runa wañuchista karunchay. 20 Paykunaqa sajrata Qanmanta parlanku; sutiykita yanqhallamanta oqharinku. 21 Tata Dios, chejnikusojkunata manachu chejnikuni? Contraykipi oqharikojkunapaj manachu phiñakuni? 22 Paykunata chejnisqata chejnikuni; paykunata enemigosniypaj qhawani. 23 Diosníy, allinta sonqoyta qhawaykuy; rejsiy sonqoyta, tukuy yuyasqaytataj allinta yachaway. 24 Qhaway, sajra ñantachus purishani manachus, chayta, chantá wiñay ñanta pusaway.
