1 Tata Dios, yuyarikuy Davidmanta, ñak'arisqanmantawan. 2 Yuyarikuytaj juramentota ruwasusqanmanta, Jacobpa Atiyniyoj Diosninman kay nisqanmanta: 3 Mana wasiyman yaykusajchu, nitaj puñojpis siriykusajchu. 4 Mana ñawisniyta wisq'asajchu, nitaj puñuyta ch'utasajchu, 5 Tata Diospaj uj cheqata tarinaykama, Jacobpa Tukuy Atiyniyoj Diosnin chaypi tiyakunampaj, nispa. 6 Efrata jallp'api kayta uyarerqayku, Jaar jallp'aspitaj tariparqayku: 7 Jaku rina, maypichus Dios tiyakun, chayman, ñawpaqempitaj qonqorikunachej, nispa. 8 Sayarikuy Tata Dios, maypichus samarikunaykiman jamuy, atiyniyoj arcaykiwan khuska. 9 Sacerdotesniykeqa cheqan kaywan p'achallikuchunku, Qanta qhatisojkunataj kusiywan takichunku. 10 Kamachiyki Davidrayku, ajllakusqayki reyta ama qhesachaychu. 11 Tata Diosqa Davidman uj jatun juramentota ruwarqa, chay juramentotataj mana p'akenqachu. Payqa nerqa: Mirayniykimanta ujninta kamachina tiyanaykiman tiyaykuchisaj. 12 Sichus wawasniyki tratoyta junt'anqanku, kamachisqasniytapis kasonqanku chayqa, paykunaj wawasninkupis kamachina tiyanaykipi wiñaypaj tiyaykonqanku, nispa. 13 Tata Diosqa Sionta ajllakorqa chaypi tiyakunampaj. 14 Pay nerqa: Kaymin chay wiñaypaj samarikunay cheqaqa. Kaypi tiyakusaj, imaraykuchus ajinata munarqani. 15 Mikhunasninta mayta bendecisaj, wajcha runasnintapis sajsachisaj. 16 Sacerdotesninta salvacionwan p'achallichisaj, Diosta qhatejkunataj kusiywan takirikonqanku. 17 Kaypi Davidpa atiyninta jatarichisaj. Wakichipuniña uj k'anchanata ajllakusqay reypaj. 18 Enemigosninta p'enqaywan p'achallichisaj, ajllakusqaypa umampitajrí pillonqa lliphipirenqa, nispa nerqa Tata Diosqa.
