1 Kusikuyniyojmin kanku mana k'amina kawsakojkunaqa, pikunachus Tata Diospa kamachisqasninta kasojkunaqa. 2 Kusikuyniyojmin kanku Paypa kamachisqasninta kasuspa, tukuy sonqowan Payta mask'ajkuna. 3 Paykunaqa sajra kajta mana ruwankuchu, manachayqa Tata Diospa ñanninta purinku. 4 Qanqa kamachiwarqayku nisqasniykita allinta junt'anaykuta. 5 Munayman ari allintapuni kawsayta, kamachisqasniykita junt'aspa. 6 Mana p'enqachisqachu kasaj, kamachisqasniykita junt'asaj, chaypachaqa. 7 Tukuy cheqan nisqasniykita yachaspa, cheqan sonqowan jatunchasqayki. 8 Kamachisqasniykita kasusaj. Ama saqesqata saqerpariwaychu. 9 Imaynatataj waynaqa llimphu kawsayniyoj kanqari? Nisqasniykita kasuspa, llimphu kawsayniyoj kanqa. 10 Noqa tukuy sonqoywanmin mask'akuyki. Ama saqewaychu kamachisqasniykimanta karunchakojta. 11 Nisqasniykita sonqoypi waqaychani, ama contraykipi juchallikunaypaj. 12 Jatunchasqa kay, Tata Dios. Kamachisqasniykita yachachiway. 13 Simiywan willani tukuy cheqan nisqasniykita. 14 Qampa kamachisqasniykipi astawan kusikuni, tukuy qhapaj kaymanta nisqaqa. 15 Nisqasniykipi allinta unanchasaj; ñankunaykita sumajta qhawasaj. 16 Kamachisqasniykipi kusikusaj; Simi Nisqaykimantapis manallataj qonqakusajchu. 17 Allinta ruwaspa kawsachiway ari, noqataj Simi Nisqaykita junt'asaj. 18 Ñawisniyta kichariy rikuyta atinaypaj chay jina k'acha kamachisqasniykita. 19 Noqa kay pachapi ñan purej forastero jinalla kani; kamachisqasniykitaqa ama pakawaychu. 20 Almayqa moq'eywan wañurishan, tukuy tiempo kamachisqasniykita yachayta munaspa. 21 Qan k'aminki runaykachajkunata; maldecisqa kanku kamachisqasniykimanta t'aqakojkuna. 22 Karunchay noqamanta pisipaj qhawanawankuta, chejnikunawankuta, imaraykuchus kamachisqasniykita junt'ani. 23 Atiyniyoj kuraj runas sajrata ruwawayta munajtinkupis, noqa kamachiykeqa kamachisqasniykipi unanchallasajpuni. 24 Noqaqa kamachisqasniykipi misk'ichikuni; chay kamachisqasniykeqa yuyaychawanku. 25 Wañoj jinaña kashani; kawsayta qoway ari, nisqaykiman jina. 26 Imaynatachus kawsasqayta willakorqayki, Qantaj kutichiwarqanki. Yachachiway ari kamachisqasniykita. 27 Yuyayta qoway kamachisqasniykita qhatinaypaj; t'ukuna ruwasqasniykipi unanchayta munani. 28 Llakiywan waqasqaypi tukukushaniña; sinch'ita kallpachaway Simi Nisqaykiman jina. 29 Pantay ñampi purinaymanta karunchaway; k'acha yanapayniykiman jina leyniykita yachachiway. 30 Cheqa kajpa ñannimpi kawsakuyta ajllakuni; kamachisqasniykiman sonqoyta churani. 31 Tata Dios, kamachisqasniykiman k'askakuni; ama p'enqaypi rikhurichiwaychu. 32 Usqhay usqhayta kamachisqasniykita junt'aj churakusaj, imaraykuchus Qanmin sonqoyta jatunyachinki. 33 Tata Dios, kamachisqasniykej ñanninta yachachiway; chayninta riyta munani tukukuyninkama. 34 Kamachisqasniykita kasunaypaj yuyayta qoway, noqataj tukuy sonqoywan chay kamachisqasta junt'asaj. 35 Kamachisqasniykej ñanninta pusaway, imaraykuchus chaypi kusikuyneyqa kashan. 36 Sonqoyta aysaway kamachisqasniykita mask'anaypaj; sajra imasta ruwaspa qolqe jap'inamanta karunchachiway. 37 Amaña saqeychu ñawisniy manakaj imasta qhawananta; kawsayta qollawaypuni ñanniykita purinaypaj. 38 Noqa kamachiykiman imatachus ruwasaj nerqayki, chayta junt'ay jatumpaj qhawasqa kanaykipaj. 39 Manchachikuni, chay p'enqayta noqamanta karunchay, imaraykuchus nisqasniykeqa allimpuni kanku. 40 Kamachisqasniykitaqa may jinata moq'eni; cheqan kayniykirayku kawsachiway ari. 41 Tata Dios, nisqaykiman jina khuyakuyniykita, salvacionniykitawan rikuchiway. 42 Ajinata noqa kutichiyta atisaj contraypi parlajkunaman, imaraykuchus Simi Nisqaykipi atienekuni. 43 Maychus kajta parlaytaqa ama jayk'ajpis simiymanta qhechuwaychu, imaraykuchus kamachisqasniykipi suyakuni. 44 Leyniykita kasusajpuni wiñaypa wiñaynintinkama. 45 Kamachisqasniykita mask'asqayrayku chhika patata kawsarikusaj. 46 Kamachisqasniykimanta reyespa ñawpaqenkupi parlasaj, manataj p'enqakusajchu. 47 Kamachisqasniykipi noqa kusikuni, chaykunata munakusqayrayku. 48 Munakusqay kamachisqasniykita junt'asaj, chaykunallapitaj unanchallasajpuni. 49 Yuyarikuy noqa kamachiykiman niwasqaykimanta, mayqenkunapichus suyakunayta niwanki, chaykunamanta. 50 Kaymin llakiyniypi sonqochawan: Nisqasniykeqa kawsachiwan. 51 May kasqankuta yuyakojkunaqa mayta asipayawanku, noqatajrí yachachiwasqasniykimanta mana karunchakunichu. 52 Tata Dios, unay nisqasniykimanta yuyarikullanipuni, chaywantaj sonqochakuni. 53 Kamachisqasniykita juchasapas mana kasusqankumanta mayta phiñakuni. 54 Kamachisqasniykeqa misk'i takiykunay kanku, kay pachapi ñan purej forastero jina kashajtiy. 55 Tata Dios, ch'isimpi Qanmanta yuyarikuni; kamachisqasniykita kasuni. 56 Kaytapuni ruwanay tiyan: Kamachisqasniykita junt'anay. 57 Qan, Tata Dios, tukuy kapuyniy kanki; noqa nini nisqasniykita junt'anayta. 58 Tukuy sonqoywan wajyakuyki; nisqasniykiman jina khuyaway. 59 Imaynachus kawsayniy kasqanta qhawarej churakorqani; chantá watejmanta kamachisqasniykiman kutirikorqani chaykunata junt'anaypaj. 60 Usqhayllata kamachisqasniykita junt'aj churakorqani, mana qhellakuspa. 61 Sajra runasqa ñak'arichinawankupaj muyuykuwanku; chaywampis kamachisqasniykita mana qonqapunichu. 62 Chawpi tutata sayarikuni Qanta agradecekunaypaj cheqan kamachisqasniykimanta. 63 Qanta manchachikojkunaj kawsaqenku kani, kamachisqasniykita junt'ajkunajtawan. 64 Tata Dios, kay pachaqa khuyakuyniykiwan junt'a kashan. Yachachiway kamachisqasniykita. 65 Tata Dios, kay kamachiykipajqa allin imasta ruwarqanki nisqaykiman jina. 66 Yachayniyojtaj, sumaj yuyayniyojtaj kanaypaj yachachiway, imaraykuchus kamachisqasniykipipuni atienekuni. 67 Manaraj k'umuykachachisqa kashaspa, anchata noqa pantaj kani; kunanrí nisqaykita kasuni. 68 Qanqa k'acha kanki, k'acha imastataj ruwanki. Kamachisqasniykita yachachiway. 69 May kasqankuta yuyakojkunaqa qhasimanta juchachawanku. Noqarí kamachisqasniykita tukuy sonqo junt'ani. 70 Sonqosninkoqa tunuyasqa kashanku, noqatajrí kamachisqasniykipi kusikuni. 71 Castigawasqaykeqa noqapaj allin karqa, ajinamanta kamachisqasniykita yachaqakunaypaj. 72 Simiykimanta llojsimoj leyqa aswan sumajmin ashkha qorimanta, qolqemantawan nisqaqa. 73 Qan, Tata Dios, makisniykiwan ruwawarqanki; kunanqa sumaj yuyayta qoway kamachisqasniykita yachaqakunaypaj. 74 Qanta manchachikojkuna rikuwaspaqa kusikonqanku, imaraykuchus Simi Nisqaykipi suyakuni. 75 Noqa yachani, Tata Dios, cheqan justiciata ruwaj kasqaykita. Nisqaykita mana p'akej kasqaykiman jina castigawarqanki. 76 Khuyakuyniyki kunanqa sonqochawachun, noqa kamachiykiman niwasqaykiman jina. 77 Khuyakuyniyki jamuchun kawsanaypaj. Kamachisqasniykipi misk'ichikuni. 78 May kasqankuta yuyakojkunaqa p'enqaypi rikhurichunku, imaraykuchus qhasillamanta juchachawanku; noqatajrí kamachisqasniykipi unanchasaj. 79 Noqawan ujchakuchunku Qanta manchachikojkuna, pikunachus kamachisqasniykita entiendejkuna. 80 Kamachisqasniykipaj sonqoy cheqan kachun, ama imamantapis p'enqachisqa kanaypaj. 81 Salvacionniykimanta jina lastashani; Simi Nisqaykipi suyakuni. 82 Ñawi k'arayta Simi Nisqaykita suyashani: Mayk'ajtaj sonqochawaj jamunki? nispa. 83 Thanta qara jina wijch'usqa kaspapis, kamachisqasniykitaqa manapuni qonqapunichu. 84 Mayk'ajkamataj suyakusajri? Mayk'ajtaj chejnikuywan qhatiykachawajkunataqa castigankiri? 85 May kasqankuta yuyakojkunaqa urmachinawankupaj t'oqosta allaykunku, pikunachus mana kamachisqasniykiman jinachu ruwajkunaqa. 86 Yanapaway ari, imaraykuchus qhasillamanta qhatiykachashawanku; tukuy kamachisqasniykeqa cheqapuni kanku. 87 Yaqhapuni kay pachamanta picharpariwanku; chaywampis kamachisqasniykitaqa manapuni saqenichu. 88 Khuyakuyniykiman jina kawsayta qoway, noqataj simiykej nisqanta junt'asaj. 89 Tata Dios, Simi Nisqaykeqa wiñaypaj janaj pachapi sinch'i sayasqa kashan. 90 Cheqa kayniykeqa wiñaypaj kallanqapuni, runa mitamanta runa mitakama. Qan kay jallp'ata sayacherqanki; maypichus kanampi kashallampunitaj. 91 Qampa kamachisqasniykiman jina tukuy ima kunankama sayan, imaraykuchus tukuy imas kamachisniyki kanku. 92 Manachus kamachisqasniyki kusichiwanman karqa chayqa, llakiyniy tukuchiwanmanña karqa. 93 Kamachisqasniykimanta mana jayk'ajpis qonqasajchu, imaraykuchus chaykunawanmin kawsachiwarqanki. 94 Salvaway ari; Qampata kani, imaraykuchus kamachiwasqasniykita mask'arqani. 95 Sajra runasqa phiriykunawankupaj suyashawanku, noqatajrí kamachisqasniykipi yuyashani. 96 Noqaqa rikuni tukuy imapis tukukapojlla kasqanta, kamachisqasniykirí mana tukukuyniyoj. 97 Maytapuni kamachisqasniykita munakuni; tukuy p'unchaynintin chayllapi unanchani. 98 Kamachisqasniykeqa aswan yachayniyojta ruwawan contraypi kajkunamanta nisqaqa, imaraykuchus kamachisqasniyki noqawampuni kanku. 99 Tukuy yachachiwajkunamanta nisqaqa astawan entiendeni, imaraykuchus kamachisqasniykipi mayta unanchani. 100 Kurajkunamantapis astawan entiendeni, kamachisqasniykita kasusqayrayku. 101 Tukuy sajra puriymanta chakisniyta karunchani, Simi Nisqaykita junt'anaypaj. 102 Kamachisqasniykimanta mana karunchakunichu, imaraykuchus Qanmin yachachiwanki. 103 Nisqasniykeqa may misk'imin simiypeqa; abeja misk'imantapis aswan misk'iraj. 104 Kamachisqasniykimanta yachayta jap'ini; chayrayku chejnikuni tukuy sajra kawsayta. 105 Simi Nisqaykeqa purinaypi k'anchana jina, ñanniypitaj k'anchay jina. 106 Jurarqani, ujtawampis nillanitaj: Cheqan nisqaykita junt'asaj, nispa. 107 Tata Dios, may sinch'i phutisqa kashani; kawsayta qoway ari, nisqaykiman jina. 108 Tata Dios, simiywan Qanta jatunchasusqayqa ima munay Qampaj kachun, yachachiwaytaj kamachisqasniykita. 109 Wañuy patapi jinallapuni kashani; chaywampis kamachiwasqasniykimanta mana qonqapunichu. 110 Sajra runasqa tojllata churawanku, noqatajrí kamachisqasniykimanta mana karunchakunichu. 111 Kamachisqasniykita herenciaypaj wiñaypaj jap'ikapuni; kamachisqasniykeqa sonqoyta kusichinku. 112 Tukuy sonqoywan kunanqa kamachisqasniykita junt'aj churakuni, wiñaypa wiñayninkama. 113 Puraj uya runastaqa chejnikuni; astawanqa kamachisqasniykita munakuni. 114 Qanmin pakakunay, jark'akuna escudoypis kanki, Simi Nisqaykipitaj suyakuni. 115 Sajra runas, noqamanta karunchakuychej, Diosniypa kamachisqasninta junt'ayta atinaypaj. 116 Nisqaykiman jina kallpachaway kawsayta atinaypaj; ama qhasita suyachiwaspaqa p'enqaypi rikhurichiwaychu. 117 Qan yanapaway, salvasqa kanaypaj; jinapitaj kamachisqasnillaykipipuni yuyasaj. 118 Qanqa qhesachanki kamachisqasniykimanta pantajkunata, imaraykuchus sajra yuyasqankoqa qhasi manakajlla. 119 Kay pachapi sajra runasta q'opata jina wijch'unki; chayrayku noqa munakuni kamachisqasniykita. 120 Qanta manchachikuspa, tukuy cuerpoy kharkatitin, kamachisqasniykitataj jatumpaj qhawani. 121 Cheqan kajllatapuni ruwarqani; ama enemigosniypa makinkupi urmajta saqewaychu. 122 Qan yachay noqa kamachiyki allin kanaymanta; amataj may kasqankuta yuyakojkunaqa ñak'arichiwachunkuchu. 123 Ñawisneyqa k'arawanña salvanawaykita suyaspa, libranawaykita suyaspa, nisqaykiman jina. 124 Noqa kamachiykitaqa khuyakuyniykiman jina qhawaway; kamachisqasniykita yachachiway. 125 Noqa kamachiyki kani. Yuyayta qoway kamachisqasniykita entiendeyta atinaypaj. 126 Kunanqa ruwanayki tiempoña, Tata Dios, imaraykuchus kamachisqasniykita mana kasunkuchu. 127 Chayrayku, noqa kamachisqasniykita munakuni, sumaj qorimantapis astawanraj. 128 Jinallataj chay kamachisqasniykita cheqampaj qhawani tukuy imamanta astawan; tukuy mana cheqan kajtarí chejnini. 129 May t'ukunapuni kamachisqasniykeqa; chayrayku noqaqa chaykunata kasuni. 130 Qampa Simi Nisqaykita sut'inchayqa k'anchay jina, llamp'u sonqoyojkunamantaj yachayta qon. 131 Simiyta kicharispa, ukhu ukhusta samani, imaraykuchus kamachisqasniykita mayta moq'eni. 132 Noqaman kutirikamuspa khuyaway, imaynatachus munakusojkunawan ruwanki, ajinata. 133 Simi Nisqaykiman jina kawsachiway; ama saqeychu juchaqa munayninta ruwanawanta. 134 Runas ñak'arichinawankumanta libraway, kamachisqasniykita kasuyta atinaypaj. 135 Kay kamachiykitaqa allin ñawiwan qhawaway, kamachisqasniykitataj yachachiway. 136 Paran paranta waqani, waj runas kamachisqasniykita mana kasusqankurayku. 137 Tata Dios, Qan cheqan sonqoyoj kanki, kamachisqasniykipis cheqallantaj. 138 Tukuy kamachisqasniykeqa cheqan, atienekunapaj jina kanku. 139 Simi Nisqaykimanta celosakuyniy tukuchiwan, enemigosniy kamachisqasniykita qonqapusqankurayku. 140 Simi Nisqaykeqa allin ch'uwapuni, chayrayku kay kamachiykeqa Simi Nisqaykita munakun. 141 Wajcha, wijch'usqa jina kashaspapis, kamachisqasniykitaqa mana qonqapunichu. 142 Cheqan kayniykeqa wiñaypaj, kamachisqasniykipis cheqallantaj. 143 Llakiywan, phutiywan taripawanku chaypis, kamachisqasniykeqa kusichiwanku. 144 Kamachisqasniykeqa wiñaypaj cheqampuni kanku; yuyayta qoway kawsanaypaj. 145 Tata Dios, tukuy sonqowan qhaparikuyki; uyarillaway ari, noqataj kamachisqasniykita kasusaj. 146 Qanta qhaparikuyki; salvaway ari, noqataj kamachisqasniykita kasusaj. 147 Manaraj sut'iyamushajtin sayarispa, yanapayniykita mañakuyki; nisqasniykipi suyakuni. 148 Tukuy tuta puñuypis mana jap'iwanchu nisqasniykipi unanchanayrayku. 149 Khuyayniykirayku, Tata Dios, uyariway; nisqasniykiman jina kawsayta qoway. 150 Sajra runas qhatiykachawajkuna qayllaykamuwanku; paykunaqa kamachisqasniykimanta karupi kashanku. 151 Qantajrí, Tata Dios, qayllallapi kashanki, tukuy kamachisqasniykitaj cheqapuni kanku. 152 Unaymantapachaña kamachisqasniykitaqa rejsini, wiñaypaj chaykunata churasqaykitapis. 153 Qhaway ari, kay ñak'arisqayta, librawaytaj, imaraykuchus kamachisqasniykita mana qonqapunichu. 154 Qan noqamanta parlariy, librawaytaj, nisqaykiman jinataj kawsayta qoway. 155 Sajra runasqa salvacionmanta karupi kashanku, kamachisqasniykita mana mask'asqankurayku. 156 Tata Dios, khuyakuyniykeqa may jatun; cheqan nisqasniykiman jina kawsayta qoway. 157 Qhatiykachawajkuna enemigosneyqa ashkha kanku, noqatajrí kamachisqasniykimanta mana ladoyanichu. 158 Wasanchajkunataqa mana rikuyllatapis munanichu, imaraykuchus paykunaqa kamachisqasniykita mana kasunkuchu. 159 Tata Dios, qhaway imaynatachus kamachisqasniykita munakusqayta; khuyakuyniykirayku kawsachiway. 160 Parlasqayki kaj chhikaqa cheqapuni, tukuy cheqan kamachisqasniykitaj wiñaypaj kanku. 161 Kamachejkunaqa qhasillamanta chejnikuywan qhatiykachawanku, sonqoytajrí Simi Nisqaykita jatumpaj qhawan. 162 Noqaqa Simi Nisqaykipi kusikuni, pakasqa qolqetapis tarikuyman jina. 163 Llullakuytaqa chejnikuni, nitaj uyariyllatapis munanichu; yachachisqasniykitarí munakuni. 164 Sapa p'unchay qanchis kutista Qanta jatunchayki, kamachisqasniyki cheqan kasqanrayku. 165 Yachachisqasniykita munakojkunaqa sonqo tiyaykusqallapuni kanku, nitaj imapis paykunata misk'achiyta atinchu. 166 Tata Dios, salvanawaykita suyakuni, kamachisqasniykitataj junt'ani. 167 Noqaqa kamachisqasniykita kasuni, leyesniykitataj munakuni tukuy sonqo. 168 Noqaqa kasuni nisqasniykita, kamachisqasniykitapis, imaraykuchus Qan rejsinki tukuy kawsayniyta. 169 Tata Dios, Qankama qhaparikamusqay chayamusuchun; Simi Nisqaykiman jina yachayta qoway. 170 Mañakusqayqa Qankama chayamusuchun, librawaytaj nisqaykiman jina. 171 Simiymanta phullchirimonqa Qanta jatunchasunayqa, imaraykuchus Qan kamachisqasniykita yachachiwanki. 172 Simeyqa Simi Nisqaykimanta takichun, imaraykuchus tukuy kamachisqasniykeqa cheqampuni. 173 Makiykeqa yanapanawampaj jina wakisqa kachun, imaraykuchus kamachisqasniykita ajllakuni. 174 Tata Dios, salvanawaykita mayta munani, kamachisqasniykiwantaj misk'ichikuni. 175 Jatunchanasuypaj kawsayta munani, kamachisqasniykitaj yanapawachun. 176 Chinkasqa oveja jina purerqani; jamuy, noqa kamachiykita mask'away, ari, imaraykuchus kamachisqasniykitaqa mana qonqapunichu.
