1 Tata Diosta agradecekuychej k'acha kayninmanta, imaraykuchus khuyakuynenqa wiñaypajmin. 2 Israelitas nichunku: Tata Diospa khuyakuynenqa wiñaypajmin, nispa. 3 Sacerdotespis nichunku: Tata Diospa khuyakuynenqa wiñaypajmin, nispa. 4 Tata Diosta manchachikojkunaqa nillachunkutaj: Tata Diospa khuyakuynenqa wiñaypajmin, nispa. 5 Phutikuyniypi Tata Diosta wajyakorqani, Paytaj uyariwarqa, librawarqataj. 6 Tata Diosqa noqawan kashan; mana manchachikusajchu. Imanawanqataj runari? 7 Tata Diosqa noqawan kashan; Payqa yanapawan, rikusajtaj chejnikuwajkunata atipasqasta. 8 Aswan sumajmin Tata Diospi atienekunaqa runapi atienekunamanta nisqaqa. 9 Aswan sumajmin Tata Diospi atienekunaqa kuraj runaspi atienekunamanta nisqaqa. 10 Tukuy naciones muyuykuwarqanku, noqatajrí Tata Diospa sutimpi paykunata chinkacherqani. 11 Tukuynejmanta muyuykuwarqanku, noqatajrí Tata Diospa sutimpi paykunata chinkacherqani. 12 Lachiwanas jina muyuykuwarqanku, phiñakuyninkutajrí thasnukaporqa khishka ch'awjra larway jina, noqataj Tata Diospa sutimpi paykunata chinkacherqani. 13 Urmanaypaj jina sinch'ita tanqarpariwarqanku, Tata Diostajrí yanapawaj jamorqa. 14 Kallpachawaj Tata Diosman noqa takini; Paymin Salvawajqa. 15 Cheqan runaspa wasinkupi kusiy takiykuna tiyan atipasqankumanta: Tata Diospa atiynenqa jatuchaj imasta ruwan, nispa. 16 Tata Diospa atiynin ancha sumajpuni; Tata Diospa atiynenqa may jatuchaj imasta ruwan. 17 Mana wañusajchu; astawanraj kawsasaj, Tata Diospa ruwasqasninmanta willaranaypaj. 18 Tata Diosqa sinch'ita castigawarqa; jinapis mana saqewarqachu wañojta. 19 Kichariwaychej justicia punkusta; chayninta yaykuspa, Tata Diosman graciasta qosaj. 20 Kaymin Tata Diospa punkonqa, chaynintataj cheqan runas yaykonqanku. 21 Graciasta qoyki, Tata Dios, uyariwasqaykimanta, Salvawajniy kasqaykimantapis. 22 Wasi perqajkunaj qhesachasqanku rumeqa esquina sumaj rumiman tukupun. 23 Chaytaqa Tata Dios ruwarqa, noqanchejtaj t'ukushaj qhepakunchej. 24 Kay p'unchaymin Tata Diospa wakichisqan; sonqo t'ikarisqa kunan p'unchay kusikunachej. 25 Salvawayku ari, Tata Dios, salvawayku. Allintaj riwachuyku ari, Tata Dios. 26 Jatunchasqa kachun Tata Diospa sutimpi jamojqa. Tata Diospa yupaychana wasinmantapacha qankunata bendecimuyku. 27 Tata Diosqa Diospuni; Payqa k'anchaykuwanchej. Qallariychej fiestata, Tata Diosman jaywanapaj uywata altarpa wajrasninman wataykuspa. 28 Qanmin Diosniy kanki, noqataj graciasta qoyki. Qanmin Diosniy kanki, noqataj jatunchayki. 29 Tata Diosta k'acha kayninmanta agradecekuychej, imaraykuchus khuyakuynenqa wiñaypajmin.
