1 Jatunchasqa kachun Tata Diosqa. Tata Diospa kamachisnin, Paypa sutinta jatunchaychej. 2 Kunampis, wiñaypajpis Tata Diospa sutenqa jatunchasqa kachun. 3 Inti llojsimuynejmanta inti yaykuynejkama Tata Diospa sutenqa jatunchasqa kachun. 4 Tata Diosqa tukuy naciones patapi kashan, jatun kaynintaj janaj pachamanta aswan patapi kashan. 5 Señorninchej Tata Dios jinaqa mana pipis kanchu, pichus janaj pachakunapi tiyaykuspa kamachishan, chay jina. 6 Chaywampis k'umuykamun, cielota, kay pachatapis qhawarimunampaj. 7 Tata Diosqa wajcha runata pampamanta aysarin, pisichikojtataj q'opata wijch'una cheqamanta oqharin. 8 Kuraj runaswan khuska payta tiyaykuchin, ayllunmanta kuraj runaswan khuskata. 9 Mana wawata rejsej warmiman wawasta qon, chay warmitaj wasimpi kusikun wawasniyoj kasqanmanta. Tata Diosqa jatunchasqa kachun.
