SALMOS 111

1Jatunchasqa kachun Tata Diosqa. Tukuy sonqoywan Diosta agradecekusaj cheqan runaswan khuska kaspa, ayllojpa tantakuynimpitaj. 2Tata Diospa ruwasqasnenqa jatuchaj kanku. Ruwasqasninta tukuy munakojkunaqa chaykunamanta unanchanku. 3Manchay k'achamin sumaj ruwasqasnenqa, justiciantaj wiñaypaj sayan. 4Tata Diospa sumaj ruwasqasnenqa mana qonqanapaj jina kanku. Tata Diosqa wawa sonqo, khuyakuyniyojtaj. 5Payta manchachikojkunaman mikhunata jaywan, tratota ruwasqanmantapis wiñaypaj yuyarikumpuni. 6Ruwasqasnimpa atiyninta ayllunman rikucherqa, waj nacionespa jallp'asninkuta paykunaman qospa. 7Paypa ruwasqasnenqa allinmin, cheqantaj. Paypa kamachisqasnenqa cheqampuni. 8Wiñaykama sinch'i sayachisqa kanku, sut'i, cheqan ruwasqastaj. 9Payqa wawasninta kacharicherqa, trato ruwasqantataj wiñaypaj sayacherqa. Diosninchejqa may santo Dios, manchachikunataj. 10Yachaypa qallarikuynenqa Tata Diosta manchachikuymin. Kamachisqasninta kasojkunaqa sumaj yuyayniyoj kanku. Diosninchejqa wiñaypaj jatunchasqapuni kanqa.

will be added

X\