1 Diosníy, pitachus yupaychani, chay, ama ch'inlla kakuychu. 2 Llulla runas, sajra runaspis noqaj contraypi parlanku, llullakuspataj, mana kajta parlanku. 3 Chejnikuy simi nisqaswan muyuykuwanku; mana imallamanta noqawan maqanakoj sayaykuwanku. 4 Paykunata munakojtiypis, ch'ataykuwanku. Chaywampis, Diosmanta mañakuni. 5 Allin ruwasqaymanta sajra kajwan kutichiwanku, munakuyniymantataj chejnikuywan kutichiwanku. 6 Paypa contrampi uj sajra runata churay, paypa paña ladompitaj uj ch'ataykoj sayachun. 7 Justiciapi juchachasqa llojsichun. Diosmanta mañakusqampis juchallampajtaj kachun. 8 Pisi watasllata kawsachun, wajtaj jap'ichun ruwananta. 9 Wawasnenqa wajchas qhepakuchunku, warmimpis viuda qhepakuchun. 10 Wawasnenqa mañakuspa purichunku, thuñisqa wasinkumantapis qharqosqa kachunku. 11 Manoj runaqa tukuy kapuyninkuta jap'ikapuchun. Trabajasqankuwan tukuy tarisqankuta wajkuna apakapuchunku. 12 Ama pipis paymanta khuyakuchunchu, nitaj wajcha wawasninmantapis. 13 Miraynimpis tukukapuchun, sutintaj wiñaypaj chinkapuchun. 14 Ñawpa tatasnimpa sajra ruwasqankumanta Tata Diosqa yuyarichumpuni, mamampa juchantapis Tata Diosqa amapuni pampachachunchu. 15 Tata Diosqa juchasninkuta amapuni qonqachunchu, kay pachamanta sutinkuta wiñaypaj chinkachinampaj. 16 Chay imasta payta ruway, imaraykuchus payqa ni jayk'ajpis khuyakuyta yuyarqachu; astawanqa wajchasta, sonqo p'akisqa kajkunata, llakiypi kajkunatapis wañuchinampaj qhatiykacharqa. 17 Maldeciytapuni munarqa; kunanqa payllataj maldecisqa kachun. Bendeciyta mana munarqachu; kunanqa amapuni bendición payman jamuchunchu. 18 Maldicionqa p'achan jina karqa; ukhu tullusninman yaku jina yaykorqa, aceite jinataj. 19 Chayqa p'achan jinapuni payta qhataykuchun, chumpi jinapunitaj wiñaypaj mat'ichun. 20 Ajinata Tata Diosqa ch'ataykuwajkunaman pagachun, pikunachus noqapaj sajrata parlajkunaman. 21 Qantajrí, Señor Tata Diosníy, sutiykirayku allin ñawiwan qhawariway. Salvaway k'acha khuyakuyniykirayku, 22 imaraykuchus wajcha kani, llakisqataj. Sonqoyqa p'akisqa kashan. 23 Llanthu jina chinkapushani; wayraj apaykachasqan langosta jina kani. 24 Mana mikhusqayrayku chaki moqosniy kharkatitiwan, mikhunamanta jinataj tulluyashani. 25 Runaj asikunan kani, rikuwaspataj, umankuta khiwinku, asipayawankutaj. 26 Señor Tata Diosníy, yanapaway; khuyakuyniykiman jina salvaway. 27 Paykunaqa yachachunku Qanqa Tata Dios, makiykiwan chayta ruwasqaykita. 28 Paykunaqa maldeciwachunkupis, Qanqa bendecillawankipuni. Contraypi oqharikuspapis p'enqachisqa kachunku, kamachiykitajrí kusikullachumpuni. 29 Ch'ataykuwajkunaqa p'enqaypi rikhurichunku, ponchowan jinataj p'enqaywan qhataykukuchunku. 30 Simiywan Tata Diosman maytapuni graciasta qosaj, ashkha runaspa chawpimpitaj Payta jatunchasaj, 31 imaraykuchus Payqa wajcharayku sayan, juchachayta munajkunamanta libranampaj.
