1 Tata Diosman graciasta qoychej, sutintataj oqhariychej Diosniykichejpaj rejsikapusqaykichejrayku. Tukuy runasman ruwasqasninta willaraychej. 2 Payta yupaychaspa takirikuychej, tukuy t'ukuna ruwasqasninmantataj parlaychej. 3 Tata Diospa santo sutinrayku umata oqhariychej. Tata Diosta mask'ajkunaj sonqonku kusikuchun. 4 Tata Diosman riychej, atiyninman atienekuychej, Paytataj tukuy tiempo mask'allaychejpuni. 5 Tukuy t'ukuna ruwasqasninmanta yuyarikuychej, tukuy kamachisqasninta sut'inchasqanmantapis, 6 qankuna, Abrahampa miraynin, qankuna, Jacobpa miraynin kajkuna. 7 Paymin Señorninchej Tata Diosqa, Paytaj juzgan tukuy kay pachata. 8 Waranqa waranqa runa mitas pasachun chaypis, trato ruwasqantaqa mana jayk'aj qonqanqachu: 9 Abrahamwan trato ruwasqanmanta, Isaacman jurasqanmanta. 10 Kamachisqata jina chay tratota Jacobman qorqa, Israelwan wiñaypaj trato kanampaj. 11 Chaypacha Tata Diosqa nerqa: Canaán jallp'ata qosqayki, herenciayki kanampaj, nispa. 12 Paykuna pisislla karqanku, ñan purej forasteros jinalla. 13 Paykunaqa nacionmanta nación, llajtamanta llajtataj purerqanku. 14 Chaywampis Diosqa mana saqerqachu pitapis paykunata llakichinanta, paykunaraykutaj reyesta kay jinata k'amerqa: 15 Ajllakusqasniytaqa amapuni llankhaychejchu, amataj profetasniytapis imanankichejchu, nispa. 16 Aswan qhepaman tukuy mikhuyta qhechuspa, chay jallp'aman yarqhayta chayachimorqa. 17 Tata Diosqa paykunamanta ñawpajtaña Joseta kacharqa, mayqentachus venderqanku wata runata jina, achhayta. 18 Chakisninta cadenaswan wataykorqanku, carcelmantaj wisq'aykorqanku. 19 Josejpa nisqan junt'akunankama, Diospa Simi Nisqanqa Joseta pruebaman churarqa. 20 Chantá Egiptopi ashkha runasta kamachej reyqa kamacherqa Joseta kacharipunankuta. 21 Wasimpi mayordomomanta churarqa, tukuy kapuyninmanta dueñota jina, 22 kamachejkunatawan munasqanman jina yachachinampaj, kurajkunata yachayniyoj runasman tukuchinampaj ima. 23 Chantá Israelqa Egiptoman yaykorqa. Forastero jina Jacobqa tiyakorqa Campa jallp'ampi. 24 Diosqa ayllunta ashkhata miracherqa; enemigosninmanta aswan kallpayojman Israelta tukucherqa. 25 Diosqa egipciospa sonqonkuta uj jinayacherqa ayllunta chejninankupaj, Diospa kamachisnimpa contrankuta sajrata yuyanankupaj. 26 Chaypacha Diosqa kamachin Moisesta kacharqa, ajllasqan Aarontawan. 27 Paykunanejta Diosqa señalesninta, t'ukuna ruwaykunatawan Campa jallp'ampi ruwarqa. 28 Diosqa tukuy chay jallp'ata laqhayaykucherqa; egipciostajrí Diospa nisqanta mana kasorqankuchu. 29 Yaku mayusninkuta yawarman tukucherqa, challwasninkutataj wañuracherqa. 30 Nacionninkuman, reypa puñunanman ima k'aylankulasta junt'aykucherqa. 31 Diosqa parlarqa, ch'uspistaj, tiyulastaj junt'aykorqanku egipciospa jallp'ankuman. 32 Parachimunantaqa, chejchi parata parachimorqa; lliuj lliujkuna, qhon qhonkuna ima tukuy jallp'ankupi karqa. 33 Chaykunaqa uva sach'asta, higo sach'astawan, Egiptoj tukuynin sach'asnintapis phiriykorqa. 34 Dios parlarqa, langostastaj rikhurerqanku. May chhika mana yupay atinapuni karqanku. 35 Tukuy q'omer qhorasta mikhukaporqanku, egipciospa jallp'asninkupi tukuy chajrasninkutapis. 36 Diosqa Egiptopi kuraj kaj churisninkuta, jinallataj phiwi uñasta uywasninkumantapis wañuracherqa. 37 Ajinamanta Diosqa israelita wawasninta orqhorqa qoriyojta, qolqeyojta. Nitaj mayqempis ayllusninkumanta iskayrayarqankuchu. 38 Egipciosqa kusikorqanku israelitasta ripushajta rikuspa, imaraykuchus sinch'i mancharisqa karqanku. 39 Diosqa paykunata llanthuykunampaj phuyuchimorqa, ch'isintaj paykunata ninawan k'anchacherqa. 40 Mikhunata mañakojtinku, Diosqa puna yuthusta paykunaman apachimorqa, cielomanta t'antawantaj paykunata sajsacherqa. 41 Chhankata ch'ejtajtin, yaku phullchimorqa, ch'aki pampatataj mayu jina purirerqa. 42 Diosqa yuyarikorqa kamachin Abrahamman qonanta nisqanmanta. 43 Jinata Diosqa ajllakusqan kamachisninta Egiptomanta orqhorqa, may kusiy chawpipi. 44 Waj nacionespa jallp'asninkutataj paykunaman qorqa. Chay runaspa trabajasqankuta jap'ikaporqanku, 45 Tata Diospa nisqasninta kasunankupaj, kamachisqasnintataj junt'anankupaj. Jatunchasqa kachun Tata Diosqa.
