1 Noqaqa tukuy kayniywan Tata Diosta yupaychasaj. Señor Tata Diosníy, may jatunmin kanki. Atiywan, jatun kayniykej k'anchayninwantaj p'achallisqa kanki. 2 K'anchaywan uj mantawan jina qhataykukunki. Cielota uj toldota jina aysanki. 3 Yaku patapi alto tiyakunaykita wasichanki. Phuyusqa carretasniyki jina kanku; wayraj lijrasnimpi purinki. 4 Wayrasqa kachasniyki kanku. Ninaj larwasqantaj Qampa kamachisniyki kanku. 5 Kay pachata cimientosnimpi sayacherqanki mana jayk'aj kuyuchisqa kanampaj. 6 Kay pachata p'achawan jina yakuwan p'achallichinki, chay yakustaj orqosta p'ampaykorqanku. 7 K'amisqaykitawan yakus ayqerqanku. Qhon qhonniykita uyariytawan, usqhayllata yakus riporqanku. 8 Orqosman wicharerqanku, pampasmantaj urayk'orqanku. Maypichus kanankupaj señalarqanki, chay cheqaman rerqanku. 9 Yakupaj lindesta churarqanki, ama chayta pasanankupaj, manaña jallp'ata watejmanta p'ampaykunankupaj. 10 Vallespi juturista rikhurichinki wayq'osta rinankupaj, orqosmantataj urayk'amunankupaj. 11 Chay mayusmanta tukuy k'ita animales ujyanku. Chaypi k'ita burrospis ch'akiyninkuta thasnullankutaj. 12 Chay kantuspi p'isqospis thapachakunku, sach'aspa ramasninkupitaj ch'ajwarinku. 13 Janaj pacha tiyakunaykimantapacha orqosta qarpanki, chay yakuwantaj jallp'a sajsakun. 14 Animalespaj qhorata wiñachinki. Runapajpis plantasta wiñachillankitaj, chay poqoyninta mikhunampaj: 15 Vinota qonki sonqonta mayta kusichinampaj, aceiteta uyanta lliphipichinampaj, t'antatataj kallpachakunampaj. 16 Tata Diospa sach'asnin yakuwan sajsakunku, Libanopi cedro, chay plantasqa sach'asnin. 17 Chay sach'aspi p'isqos thapachakunku, chay pino sach'a puntaspitaj cigüeñas nisqa thapachakunku. 18 Orqo puntaspi k'ita cabras kawsakunku. Qaqaspitaj wisk'achas pakakunku. 19 Qanqa killata ruwarqanki wataj tiemposninta yachanaykupaj. Intipis yachallantaj ima horachus yaykunanta. 20 Qanqa laqhata kamachinki tuta kanampaj, chay laqhapi k'ita animales purinankupaj. 21 León uñasqa mikhunata mask'aspa qhaparinku; Diosmanta mikhunata mañakunku. 22 Inti llojsimojtin, pakakunku, jusk'usninkumantaj winkoj yaykupunku. 23 Chantá runañataj llank'aj llojsin, chajrampitaj ch'isiyaykuykama ruwamun. 24 Tata Dios, ruwasqasniykeqa may chhika. Tukuy imata sumaj yachayniykiwan ruwarqanki. Kay pachaqa ruwasqasniykiwan junt'a kashan. 25 May jatun mama qochapis kallantaj, tukukuynintaj mana rikukunchu. Chaypi mana yupay atina tukuy laya challwas t'impurishanku jatuchaj, juch'uychaj ima. 26 Chaypi barcospis kayman jaqayman rinku. Jatun sierpe Leviatanpis yakuspi purillantaj, mayqentachus ruwarqanki chaypi pujllanampaj, chay. 27 Tukuyninku suyanku Qan mikhunata horampi qonaykita. 28 Qan mikhunata qaranki, paykunataj mikhunku. Makiykita kicharinki, paykunataj allin kajwan sajsakunku. 29 Uyaykitachus pakanki chayqa, mancharikunku. Samayninkuta qhechupojtiyki, wañupunku, jallp'allamantaj tukupunku. 30 Espirituykita kachamunki, tukuy imastaj ruwasqa kanku; kay pachatapis mosojman tukuchinki. 31 Diospa jatun kaynenqa wiñaypaj kachun, ruwasqampitaj Tata Diosqa kusikuchun. 32 Tata Dios qhawarejtin, kay pachaqa kharkatitin, llankharejtintaj, orqosqa q'oshñirinku. 33 Noqatajrí kawsayniyoj kanaykamaqa Señorniy Tata Diosman takiykunata takisaj. 34 Yuyasqasneyqa sumaj kachun Paypa ñawpaqempi, imaraykuchus Payllapi tarini kusikuyta. 35 Sajra runasqa kay pachamanta chinkachisqa kachunku; juchasapasqa amañapuni kachunkuchu. Noqaqa tukuy almaywan Tata Diosta yupaychasaj. Yupaychasqa kachun Tata Diosqa.
