1 Munakuyniykimanta, cheqan kayniykimantawan takisaj; Tata Dios, Qanman takirikusaj. 2 Cheqanta kawsasaj. Mayk'ajtaj noqaman jamunkiri? Llimphu kawsaypi purisaj, wasiypi kaspapis. 3 Ni jayk'ajpis sajra kajta ñawpaqeyman churasajchu. Diosmanta karunchakojkunaj ruwasqankuta chejnikuni, manataj jayk'ajpis chaykunataqa qayllaykuchikamusajchu. 4 Sajra yuyajkunataqa noqamanta karunchasaj. Sajra runataqa ni rejsillaytapis munanichu. 5 Noqaqa chinkachisaj, pakayllamanta runa masinkupaj rimajkunata; runaykachajkunata, wapu wapu kajkunatawan mana rikuyta atinichu. 6 Cheqan kajta junt'ajkunata allimpaj qhawasaj, noqawan kawsanankupaj; cheqan ñanta purejqa noqaj kamachiy kanqa. 7 Ch'awkiyaj runarí wasiypi mana tiyakonqachu; llullata parlaj runapis manallataj ñawpaqeypi sayanqachu. 8 Sapa paqarin kay jallp'api kaj juchasapasta tukuchisaj, Tata Diospa llajtanmanta tukuy chay sajra ruwajkunata chinkachinaypaj.
