SALMOS 10

1Tata Dios, imaraykutaj karullapi qhepakunki? Imaraykutaj phutiy chayamojtin, pakaykukunkiri? 2Sajra runaqa wapuykachaspa, wajcha runata chejnikuywan qhatiykachan. Paypa tojlla churasqallampitaj ch'ipaykuchikonqa. 3Sajra runaqa imatachus munasqanmanta jatunchakun. Sajra runaqa qolqemanta wañusqa runata bendecin, Tata Diostataj pisipaj qhawan. 4Sajra runaqa umata oqharisqanrayku Diosta mana mask'anchu. Yuyaynimpeqa Diosmanta mana yuyarinchu. 5Tukuy ima ruwasqampipis allillampuni rin. Paypajqa justiciayki manapis kanmanchu jina ñawisninmanta karupi kashan. Payqa tukuy enemigosninmantapis alqochakullantaj. 6Payqa yuyan ni pipis payta urmachinanta, ni jayk'aj ima misk'anapis paypaj kananta. 7Simimpeqa maldiciones junt'a kashan, llullakusqasninwan, ch'awkiyasqasninwan. Parlasqantaj sajra imaswan, tumpaykunawan ima junt'a kashan. 8Ranchosta puriykachan wateqaspa; mana juchayojtapis pakaypi wañuchin. Pisi kallpayojtapis ñawisnillampi purichin. 9León jina pakakuna jusk'umanta wajchata wateqamun, rikhurimojtin patanman phinkiykunampaj. Jap'ispataj, ch'ipampi qhatatamun. 10Phinkiykunampaj jina lip'iykun; makisninman urmanku mana piniyoj wajcha. 11Sajra runaqa yuyan Dios qonqapusqanta, uyanta pakaykukusqanta, ni jayk'aj imatapis rikusqanta. 12Sayarikuy Tata Dios, makiykita oqhariy, amataj wajchasmanta qonqapuychu. 13Imaraykutaj sajra runaqa Diospaj rimanri? Imaraykutaj sonqompi nin: Mana cuentata mañawanqachu, nispa? 14Qan kikiyki rikunki may jatun sajra kayninkuta. Sajra kayninkuta rikusqaykirayku ruwasqankuman jina pagota qopunki. Qanmanqa mana piniyojkuna chayamusunku; Qanqa wajcha wawasta yanapanki. 15Sajra runaj makisninta p'akiray, juchanmantataj cuentata mañay, mana ni uj chhikan puchunankama. 16Tata Diosqa wiñaypaj rey. Diospi mana creejkunaqa jallp'anmanta wijch'usqa kanqanku. 17Tata Dios, Qan uyarinki llamp'u sonqo runaspa mañakusqankuta. Qan paykunaj sonqosninkuta oqharinki, paykunata uyarinkitaj. 18Justiciata ruway ari wajcha wawapaj, sarusqa runapajpis. Jallp'amanta ruwasqa runaqa amaña paykunata watejmanta manchachichunchu.

will be added

X\