PROVERBIOS 9

1Yachayqa wasita ruwakun qanchis k'acha sayantasniyojta. 2Uywasta ñak'achin sumaj mikhuykunata wayk'uchinampaj, sumaj vinotataj wakichin. Jinallataj mesatapis mast'an. 3Warmi kamachisninta kachan llajtaj loman patamanta qhaparimunankupaj: 4Jamuychej kayman, qankuna wampus, nispa. Mana yuyayniyoj runasmampis nillantaj: 5Jamuychej, mikhunaymanta mikhuychej, wakichisqay vinomantapis ujyallaychejtaj. 6Wampu kayniykichejta saqeychej, kawsankichejtaj; sumaj yuyayniyoj runas jina puriychej. 7Pichus machu machu runata k'amejqa chay runawan pisipaj qhawachikonqa. Sajra runata k'amejpis alqochachikuyllata tarikonqa. 8Machu machu runataqa ama k'amiychu, mana chejnichikuyta munaspaqa. Yachayniyoj runata k'amiy, paytaj munakusonqa. 9Yachayniyojman yachachiy, paytaj aswan yachayniyoj kanqa. Cheqan runaman yachachiy, paytaj astawan yachanqa. 10Yachaypa qallarikuynenqa Tata Diosta manchachikuymin. May Santo Kaj Diosta rejseyqa sumaj yuyayniyoj kaymin. 11Yachaynejta kawsanayki p'unchaykunaqa yapakonqa, ashkha watastataj kawsanki. 12Yachayniyoj kaspa allin imasta tarisqaykeqa qanllapajtaj kanqa. Sichus machu machu kanki chayrí, qanllataj castigasqa kanki. 13Wampu warmeqa ch'ajwa sayarichej warmi, mana ima yachajtaj. 14Chay warmeqa wasi punkumpi tiyakun, llajta ukhupi aswan patanejpi. 15Chaynejta purejkunata wajyan, allin ñanta rishanku, chaykunata: 16Mana yuyayniyojkuna, jamuychej kayman, nispa. Pisi yuyayniyojkunamantaj nin: 17Suwasqa yakoqa aswan misk'i; pakaypi mikhusqa t'antapuni misk'eqa, nispa. 18Paykunarí mana yachankuchu chaypi wañuna kasqanta, wajyachimusqasnenqa ukhu pachapiña kasqankutapis.

will be added

X\