PROVERBIOS 7

1Uyariway nisqasniyta, wawáy; yuyayniykipi kamachisqasniyta waqaychay. 2Kasuy kamachisqasniyta, yachachisusqaytawan; ñawi papaykita jina waqaychay, chantaqa kawsanki. 3Dedosniykiman wataykuy; sonqoykipi sumajta qhelqaykuy. 4Yachaytaqa panaykita jina qhaway, yuyaytataj warmiykita jina qhaway. 5Chaykuna jark'asonqanku khuchi warmimanta, wajpa warmin pichus misk'i simi parlasqanwan sonqota suwajmanta. 6Uj kuti noqa wasi ventanaymanta wateqaspa qhawasharqani. 7Chaynejta risharqanku manaraj yuyayniyojkuna wayna runas, repararqanitaj ujnin aswan wampu kasqanta. 8Uj esquinaman chayaspataj, calleta chimparqa chay warmej wasinnejman. 9Ñapis inti yaykusharqaña, laqhayaykusharqañataj. 10Jinallamanta payta taripaj uj warmi llojsimorqapacha, phisu warmi jina k'achanchasqa, sonqompitaj sajra yuyayniyoj. 11Payqa qhalincha mana kasukoj warmi, wasimpi mana kakuyta atej. 12Tukuynejpi wateqaspa purin, callespi, plazaspi, esquinaspi ima. 13Chay warmeqa chay waynata ojllaykuspa, much'aykorqa, mana p'enqarikuspataj nerqa: 14Noqa allinyakuna jaywanata Diosman qonayta nerqani, chaytataj kunan p'unchay junt'aniña. 15Chayrayku, qanta taripasoj llojsimorqani; qantaqa rikusuytapuni munarqani, kunantaj tariyki. 16Puñunaytaqa sumajta k'achanchaykuni Egiptomanta lino phulluswan. 17Chaytataj ima munayta q'apaj perfumewan ch'ajchuykuni: Mirrawan, áloe nisqawan, canelawan ima. 18Jamuy, munakuywan machaykusun, munanakuspataj sut'iyamunankama karikusun, 19imaraykuchus qosayqa mana wasiypichu kashan, payqa karuman rin. 20Payqa apakun uj wayaqa qolqeta, killa junt'a kashajtinraj chayamonqa, nispa nerqa chay warmeqa. 21Chhikata parlaspa, k'acha misk'i simi parlasqanwan, waynaj umanta muyurpayacherqa. 22Chay rato chay waynaqa warmej qhepanta rerqa, imaynatachus uj toro ñak'anaman yaykun, ajinata, uj wampu jasut'ichikunampaj jap'ichikun, ajinata. 23Chaymantaqa sonqonta uj flecha t'ojsin, imaynatachus p'isqo sipitawan jap'ichikoj usqhayta rin, mana yachaspa chaypi wañunan kasqanta, ajinata. 24Kunanqa, wawáy, uyariway; allinta uyariway imastachus yuyaychasqasniyta. 25Sonqoykeqa chay warmej ñankunanmanta t'aqakuchun. Ama pantaykuychu paypa qhepanta rispa. 26Chay warmirayku mashkhas parte wañusqas qhepakunku, jinataj aswan kallpasniyoj kajkunamantapis ashkhas wañuchisqa rikhurinku. 27Chay warmej wasinman rinaqa wañuy ñanta jap'iriywan ninakun.

will be added

X\