PROVERBIOS 5

1Yachayniyta uyariy, wawáy; yuyayniyman ninriykita kichariy. 2Ajinamanta yuyaychasqayta waqaychanki, yachaywantaj parlanki. 3Mana allin puriyniyoj wajpa warmenqa misk'ita parlan; parlasqanqa aceitemantapis aswan llamp'uraj. 4Chaywampis, tukukuynenqa sunch'umantapis aswan jaya; puraj lado filochasqa espadamantapis astawan khuchun. 5Paywan purejqa wañuyman chayan; chakisnenqa ukhu pachaman cheqanta pusan. 6Paymanqa mana dakunchu kawsay ñanta purinamantaqa; mana qhawakunchu maymanchus thaskisqanta. 7Chayrayku uyariway, wawáy; amapuni yachachisqasniymanta t'aqakuychu. 8Chay warmimantaqa karunchakuy; ama qayllaychu wasi punkullanmampis. 9Ama honraykita wajkunawan t'akachiychu, nitaj kallpaykitapis sajra runasman qoychu, 10ama waj runaslla kallpaykiwan sajsakunankupaj, jump'i suruyta llank'asqaykiwan ima. 11Chantá chay qhepata waqashanki, kallpayki pisimanta pisi tukukapojtin. 12Chaypitaj qanqa ninki: Imajtintaj yuyaychawasqankuta qhesacharqaniri? Imaraykutaj k'amiwasqankutapis mana jap'ikorqanichu? 13Yachachiwajkunata mana uyariyta munarqanichu; yuyaychawajkunata mana kasorqanichu. 14Tumpamantawanqa p'enqay llakiyman chayayman karqa, tukuy llajta masisniypa rikunanta, nispa ima niwaj. 15Qampa yaku pujyuykimanta yakuta ujyay, chay kikin pujyuykimanta jutumoj yakuta. 16Juturiykimanta yaku llojsimojtaqa ama jich'aykachaychu, amataj calleta qarpaspa usuchiychu. 17Pujyuwan, yakuwanqa qampallata kachunku, amataj qanwan khuska waj runas ujyachunkuchu. 18Chay juturiykeqa bendecisqa kachun. Wayna kashaspa casarakusqayki warmiykiwan kusikuy. 19Payqa kachun k'acha taruka jina, gacela nisqa jinataj. Munakuynenqa tukuy tiempopi kusichisuchun. Chay munakuynimpipuni qanqa kusikuy. 20Imaraykutaj wawáy, wajpa warminwan jap'ichikuwajri? Imaraykutaj wajpa warminta ojllaykuwajri? 21Runaj kawsaynenqa Tata Diospa qhawaynillampi kashan; may purisqantapis qhawashallampuni. 22Sajra runataqa kikin sajra ruwasqallantaj jap'iykun, kikin juchallantaj waskha jina ch'ipaykun. 23Payqa wañonqa k'aminamanta jina, wampu kaynintaj chinkayman payta pusanqa.

will be added

X\