1 Pichus k'amejtinku sonqonta rumiyachejqa ujllata chinkachisqa kanqa mana ujtawan kutirimuyniyojta. 2 Cheqan runas kajkuna ashkhayajtinku, runasqa mayta kusikunku. Sajra runas kamachejtinkurí, runasqa llakiyta ayqonku. 3 Yachayniyoj chureqa tatanta kusichin; phisu warmiswan purejrí kapuyninta wayrachin. 4 Cheqan justiciata ruwaj reyqa nacionninta sumajta sayachin; lluk'ichikuyman yachasqa reyrí nacionninta mana allinman tukuchin. 5 Kawsaqenta llunk'ojllaqa kawsaqempaj uj tojllata jina churashan. 6 Sajra runapajqa juchasnillantaj tojllan, cheqanta purej runarí kusisqalla, sonqo junt'asqataj tiyakun. 7 Cheqan runaqa wajcha runaspaj justicia kananmanta dakun, sajra runarí chaymantaqa mana dakunchu. 8 Phiñanakuta wakichej alqochakoj runasqa llajtata ch'ajwachinku, yachayniyojkunatajrí chay phiñanakuta ch'inyachinku. 9 Yachayniyoj runaqa wampu runawan quejaman yaykojtin, wampoqa phiñakuspa ch'ajwallan, chayrí asikullan nitaj chay ujwan allinyakunchu. 10 Runa wañuchi runasqa cheqan runata chejnikunku, cheqan runarí paykunaj kawsayninku allin kananta munan. 11 Wampu runaqa tukuy atisqanta phiñakun, yachayniyoj runarí phiñakuyninta ñit'iykukun. 12 Sichus uj kamachejqa llulla parlayta creen chayqa, payta tukuy yanapajkunapis sajrallamantaj tukunku. 13 Ñak'arisqa kajwan, ñak'arichejwanqa rijch'anakunku kaypi: Tata Diosqa iskayninkuman ñawista qon. 14 Wajchaspaj cheqan kajta ruwaj reyqa wiñaypaj kamachinanta sayachin. 15 Seq'ona varawan, k'amiywan imapuni yachayniyojman tukuchinku wawata; munayninta ruwajta saqesqa wawarí mamanta p'enqachin. 16 Ashkha sajra runas kajtinkoqa, ashkhallataj juchapis kanqa; cheqan runastajrí rikonqanku imaynatachus urmasqankuta. 17 Wawaykitaqa k'amiypuni, paytaj mayta kusichisonqa; qan sonqo junt'asqa kanki. 18 Maypichus Diosmanta sut'inchay mana kanchu, chaypeqa runas munaynillankuta ruwanku. Diospa leyninta kasojrí kusikuyniyojmin. 19 Kamachi runaqa simillataqa mana uyarikunchu; sumajta entiendespapis, mana kasukunchu. 20 Uj wampu runamantaraj atisunman imatapis suyayta, mana unanchaspalla parlajmanta nisqaqa. 21 Juch'uymantapacha lulusqa kamacheqa qhepamanqa patronninta llakichenqa. 22 Phiña runaqa ch'ajwata oqharin, usqhayllata phiñakojtaj anchata juchallin. 23 Jatunchakoj runataqa machu machu kaynin k'umuykuchenqa, llamp'u sonqoyojtajrí allimpaj qhawasqa kanqa. 24 Suwaj yanapajnenqa pay kikinta chejnikun; kachi patapi jurachishajtinkupis, manapuni rimarinchu. 25 Runallata manchachikoyqa urmanapaj tojlla jina; pichus Tata Diospi atienekojrí sumaj waqaychasqa kanqa. 26 Ashkhas mask'anku kamachejpa yanapayninta; chaywampis Tata Dioslla sapa ujman justiciata ruwan. 27 Cheqan sonqoyoj runasqa sajra runasta mana rikuyta munankuchu; kikillantaj sajra runaspis cheqan runastaqa mana rikuyta munankuchu.
