PROVERBIOS 28

1Sajra ruwaj runaqa ayqen mana pi qhatiykachashajtillan; mana juchayoj kajrí k'achata tiyakun, león jina mana imamanta manchachikuspa. 2Uj nación mana allinta purejtenqa ashkha kamachejkuna rikhurinku; sumajta kamachej yuyayniyoj runaj makimpirí tukuy ima maychus kananta rin. 3Wajcha runa wajcha masinmanta suwajqa, cosechasta chinkachej loco para jina. 4Leymanta karunchakojkunaqa sajrata ruwaj runasta jatunchanku; leyta junt'ajkunarí chaykunaj contrankupi sayanku. 5Sajra runasqa mana entiendenkuchu imachus cheqan kajmantaqa; Tata Diosta mask'ajkunarí chay tukuy imasta allinta entiendenku. 6Wajcha kaspa allinta kawsaj runaqa aswan sumaj, qhapaj kaspa mana allinta kawsaj runamanta nisqaqa. 7Diospa kamachisqanta junt'aj chureqa sumaj yuyayniyoj; pichus oqoysapaswan purejrí tatanta p'enqaypi rikhurichin. 8Qolqenmanta ancha ashkha interesta mañaspa qhapajyajqa qolqeta tantapun wajchasta khuyajllapaj. 9Sichus pipis Diospa kamachisqanta mana uyarin chayqa, Diospis millachikuspa, manallataj chay runaj mañakusqantaqa uyarenqachu. 10Sichus pipis cheqanta kawsajkunata juchallichin mana allin ñanta purichispa chayqa, payllataj chay tojllapi urmanqa. Cheqanta purej runasrí aswan allin kaj herenciata jap'enqanku. 11Qhapaj runaqa yuyakun may yachayniyoj kasqanta, allin yuyayniyoj wajcha runarí chay runaj yuyasqanta waturin. 12Cheqan runas atipajtinkoqa, tukuy runas jatunmanta kusikunku; sajra runas atipajtinkutajrí runasqa pakakunku. 13Pichus juchanta pakaykojtaqa mana allinchu renqa; pitajchus juchanta rimarispa, chaymanta t'aqakun, chay runaqa khuyakuyta tarenqa. 14Kusikuyniyojmin Tata Diosta manchachikojpuni runaqa. Sonqonta rumiyachejrí llakiyman chayanqa. 15Wajcha nacionta sajra ruwaj kamachejqa uj qhapariykachaj león jina, chayrí yarqhasqa jukumari jina. 16Runasninta ñak'arichispa kamachejqa mana yuyayniyoj, lluk'iyta qhesachaspa kamachejrí unayta kawsanqa. 17Sichus pipis runaj yawarninta jich'an chayqa, sonqompa juchachasqan ayqeykachanqa wañunankama, amataj pipis yanapachunchu. 18Mana k'aminapaj jina kawsaj runaqa librasqa kanqa; wist'u kawsaypi kawsajrí ujllata urmasqa rikhurenqa. 19Jallp'anta sumajta llank'ajpata mikhunanqa sajsakunampaj jina kaponqa; qhasi manakajpa qhepanta purejrí yarqhaywan ch'ayñanqa. 20Nisqanta junt'aj runaqa allin imasta jap'enqa; usqhayllata qhapajyayta munajrí castigasqa kanqa. 21Wakin runasllata allimpaj qhawanaqa mana allinchu; chaywampis uj chhikan t'antaraykulla runaqa sajrata ruwayta atinman. 22Mich'a runaqa usqhayllata qhapajyayta munan, manataj yachanchu paypa patanman wajchayay jamunantaqa. 23Pichus runata k'amejqa qhepaman aswan munasqa kanqa, pichus llunk'ukojmanta nisqaqa. 24Pipis tatanmanta, chayrí mamanmantapis suwajqa ninman: Chayqa mana juchachu, nispa; chaywampis chay runaqa runa wañuchejpa kawsaqenman tukun. 25Pichus anchata imatapis munapayajqa ch'ajwasta oqharichin; pichus Tata Diospi atienekojrí tukuy imapi ñawpajman renqa. 26Pichus payllapi atienekojqa wampumin. Pichus yachaywan imatapis ruwajrí imamantapis waqaychasqa kanqa. 27Wajchata yanapajpataqa tukuy iman tiyaponqa; wajchasman mana yanapajmanrí ashkha maldiciones chayanqa. 28Sajra runas kamachej churakojtinku, tukuy runas pakakunku; sajra runas chinkarejtinkutajrí cheqan runasqa astawan ashkhayanku.

will be added

X\