1 Cheqanta kawsakoj wajcha runaqa aswan allin, pipajpis rimaj wampu runamanta nisqaqa. 2 Mana allinchu mana yachayniyoj kanaqa; pillapis usqhayllata imatapis ruwarparejqa pantan. 3 Runaj wampu kaynenqa ñanninta q'ewin; chaywampis Tata Diosta juchachaspa, sonqompi mayta phiñakun. 4 Qhapajyayqa ashkha kawsaqesta apamun; uj wajchatarí kawsaqesnimpis saqerparinku. 5 Uj llulla testigoqa castigasqapuni kanqa; pichus llullata parlajqa mana llusp'enqachu. 6 K'acha runa kajtaqa tukuy runas mask'anku; tukuy runas kawsaqen kayta munanku khuyakoj kasqanrayku. 7 Wajcha runataqa wawqesnimpis chejninku; kawsaqesnimpis astawanraj karunchakunku paymantaqa. Chaymantaqa mask'an pipis paywan parlaykurinanta, nitaj pipis kanchu. 8 Pichus yachayta tarejqa pay kikinta munakun. Pichus yuyayniyoj kayta munakojqa allin kajta tarin. 9 Llulla testigoqa castigasqapuni kanqa; llullata parlajqa chinkayman renqa. 10 Wampu runapajqa mana walejchu sumaj wasipi tiyananqa, nitaj walejchu kamachipis kurajkunata kamachinanqa. 11 Runaj yuyayniyoj kaynenqa phiñakuyninta thasnun; phiñakuyta qonqayman churasqanrayku payqa allimpaj qhawasqa. 12 Reypa phiñakuynenqa leompa qhaparisqan jina, khuyakuyninrí qhora patapi chhulla jina. 13 Uj wampu chureqa tatanta llakichin. Phiñanakuta mask'aj qosayoj warmeqa mana p'itiyniyoj sut'oj yaku jina. 14 Pikunallapis tatasninkumanta jap'inku wasita, kapuykunatapis herenciata jina; allin yuyayniyoj warmitarí Tata Dioslla qon. 15 Qhella kayqa sinch'ita puñuchin, qhella runataj yarqhaypi rikhurenqa. 16 Pichus kamachisqasta junt'ajqa kawsayninta waqaychan; pichus yachachisqa kajta pisipaj qhawajrí, wañonqa. 17 Wajcha runaman jaywarejqa Tata Diosman manurin, Tata Dios kikintaj chay manuta junt'anqa. 18 Wawaykitaqa wananampaj jasut'iy, tiempo kashajtin, amataj jasut'inkichu wañuchinaykikamaqa. 19 Anchata phiñakojqa castigasqa kanqa; chaymanta payta jark'akojtiykipis mana wananqachu. 20 Yuyaychasqataqa uyariy, k'amisqatapis jap'ikuy; ajinamanta chayanki sumaj yachayniyoj kayman. 21 Runaqa sonqompi yuyan ashkha imasta ruwayta; chaywampis Tata Diospa yuyasqallan junt'akun. 22 Runamantaqa k'acha kananta munana kashan; aswan allinmin wajcha kana llulla kanamantaqa. 23 Tata Diosta manchachikoyqa kawsayman pusan; ajinamanta runaqa may kusisqa tiyakonqa, manataj ima llakiypis chayanqachu. 24 Qhellaqa makinta chuwaman sat'iykun, manataj siminmanqa qayllaykuchiyllatapis munanchu. 25 Alqochakoj runata maqay; mana yuyayniyoj runapis chayta rikuspa, yuyayniyojman tukonqa. Yachayniyoj runatarí k'amillay, paytaj chayllawan yachaqakonqa. 26 Tatamanta suwakoyqa, mamatataj wasimanta wijch'oyqa uj p'enqay, manataj allinchu. 27 Wawáy, sichus k'amisqasta mana jap'ikunki chayqa, yachaypa yuyaychayninmanta t'aqakunki. 28 Llulla testigoqa cheqan kajmanta alqochakun; sajra runaqa siminmanta sajra kajta ajtumun. 29 Castigoqa wakichisqapacha kashan alqochakojkunapaj; seq'onaqa wakichisqa kashan wampuspa wasankupaj.
