1 Imatapis payllapaj munaj runaqa imatachus mask'asqasnin junt'akunallanta munan; imatapis yuyaychayta munajtinku, mana uyarikuyta munanchu. 2 Wampoqa manapuni imatapis yachayta munanchu, manachayqa sonqompi kajta willayllata munan. 3 Jucha kajtin, p'enqay jamun, runaykachaywantaj honra t'akay chayamun. 4 Runaj parlasqasnenqa ukhu yaku jina, purej yaku jinataj yachaypa juturenqa. 5 Mana allinchu juezkuna juchayojman kutikunankoqa, nitaj mana juchayojta qhasimanta juchachanankupis. 6 Wamposqa siminkunejta ima ch'ajwamampis chayanku, parlasqankuwantaj castigota tarikunku. 7 Wampoj parlasqasnenqa pay kikin urmanallampajtaj kashan, nisqasnillanwantaj ch'ipaykuchikun. 8 Cuento q'epej parlasqasnenqa misk'i mikhuna jina; runaj ukhunmampuni chayan. 9 Ruwanapi qhellaqa, imanchus kajta wayrachej runawanqa yunta kanku. 10 Tata Diospa sutenqa uj jark'achasqa torre jina; cheqan runasqa chaypi pakakuspa, waqaychasqa kanku. 11 Qhapaj runapaj kapuynenqa jark'achasqa llajta jina, yuyantaj uj alto perqa jina kasqanta. 12 Runaykachaypa qhepantapacha urmayqa jamun; jatumpaj qhawasqa kanapajqa ñawpajta llamp'u sonqo kaytaraj yachana. 13 Manaraj allinta uyarishaspa imatapis kuticheyqa wampu kaymin, p'enqaytaj. 14 Uj onqojmanqa wapuchakuynin kallpata qon; onqosqa kashaspa mana wapuchakojtarí, pitaj yanapayta atinmanri? 15 Allin yuyayniyojqa yachayta astawan jap'in; yachayniyojpa ninrenqa yachayta mask'an. 16 T'inka jaywarisqaqa tukuy punkusta kicharin, jinamanta pichus jaywarejtaqa kuraj kaj runaspa ñawpaqenkukama chayachin. 17 Juiciopi ñawpajta parlarejqa cheqampi kasqanta rijch'akun, uj chayamuytawan sut'inchanankama. 18 Suerte choqayqa tukuy quejanakusta tukuchin, sut'inchantaj mayqenchus atipananta. 19 Uj phiñachisqa wawqeqa sumaj jark'achasqa llajta jina, sonqonta mana tiyaykuchiy atina. Wawqepura phiñanakoyqa kichariy mana atina aldabas jina. 20 Imatachus siminwan parlaspa tarisqanwan runaqa wijsanta junt'achenqa; ajinamanta chaywan sajsakonqa. 21 Wañuywan, kawsaywanqa runaj simimpi kashan; pichus chay ruwayta munakojqa chaywan sajsakonqa. 22 Pichus casarakunampaj warmita tarejqa allin kayta tarin, chaywantaj Tata Diosqa k'acha yanapayninta payman rikuchin. 23 Wajcha runaqa khuyayta mañakuspa parlan; qhapaj runarí wapu waputa parlan. 24 Wakin kawsaqesqa mana cheqan kawsaqespunichu kanku; chaywampis uj kawsaqe tiyan, wawqemantapis aswan munakuyniyoj.
