PROVERBIOS 13

1Yachayniyoj waynaqa tatampa yuyaychasqanta jap'ikun; machu machu kajrí k'amisqata mana uyarinchu. 2Runaqa parlasqasnimpa poqoyninmanta allin imasta jap'ispa kusikun; wasanchajkunarí kallpankupi atienekuspa sajra ruwaymanta wañurinku. 3Mana imatapis parlarparejllaqa pay kikimpaj allinta ruwan; imatapis parlarparejllarí llakiypi rikhurenqa. 4Qhellaqa munallan nitaj tarinchu, k'uchi kajrí runayan. 5Cheqan runaqa llullakuyta chejnin; sajra runarí chejnisqa, p'enqaypitaj rikhurin. 6Cheqan kayqa mana juchayoj runata waqaychan, sajra kayrí juchasapata chinkachin. 7Wakenqa mana imayoj kashaspapis, qhapaj qhapajman tukunku; wakintajrí tukuy imayoj kashaspa, wajcha wajchaman tukunku. 8Qhapaj runaqa wisq'asqa kaspa, kapuyninmanta pagan kacharichisqa kanampaj; wajchatarí ni pi ima ninchu. 9Cheqan runaspa k'anchayninkoqa sumajta k'anchanqa, sajra runaspa k'anchayninkurí wañonqa. 10Runaykachayqa maqanakullata apamun, yachaytajrí k'amisqata jap'ikojkunawan kashan. 11Sajrata ruwaspa qhapajyayqa wajwallilla; pichus trabajaspa pisimanta pisi tantajqa kapuyninta ashkhayachenqa. 12Imatapis suyasqa mana junt'akojtenqa, sonqoqa llakisqa qhepakun; ima munasqapis junt'akojtinrí, chayqa kawsay sach'a jina. 13Pichus kamachisqasta pisipaj qhawajqa waqanqa; pichus kamachisqasta kasojrí t'inkachisqa kanqa. 14Yachayniyojpa yachachisqanqa kawsaypa juturin; chaymin wañuypa tojllasninmanta runata kacharichin. 15Allin yuyayniyojqa tukuywan munachikun; wasanchajkunaj ñanninkurí mana puriy atina. 16Yuyayniyoj runaqa yachayninwan imatapis ruwan, wampu runatajrí wampu kayninta rikuchin. 17Mana allin kacha runaqa llakiyman chayan; allin kacharí sonqo kawsayta apamun. 18Pichus yuyaychasqata pisipaj qhawajpajqa wajchayaylla, p'enqaytaj kanqa; pichus k'amisqata jap'ikojrí jatumpaj qhawasqa kanqa. 19Ima munasqapis junt'akojtenqa, may kusiy. Wampu runasqa sajra ruwaymanta manapuni t'aqakuyta munankuchu. 20Yachayniyojkunawan purejqa yachayniyojllataj kanqa. Wampu runaswan purejrí mana allinman chayanqa. 21Juchasapasqa sajra imaspa qhatiykachasqan kanku, cheqan runastajrí allin kajwan t'inkachisqa kanku. 22Allin kaj runaqa allchhisninman herenciasta saqen. Juchasapaj kapuynintajrí cheqan runaspaj jallch'asqa kashan. 23Wajcha runaj chajrampeqa ashkha mikhuna tiyan. Chaywampis mana justicia kasqanrayku chinkapullan. 24Pichus wawanta mana jasut'ejqa mana payta munakunchu; pichus munakojrí juch'uymantapacha wanachinapaj jasut'in. 25Cheqan runaqa sajsakunankama mikhun, juchasaparí mikhunamanta usullanqapuni.

will be added

X\