1 Pichus k'amisqata tukuy sonqo jap'ikojqa yachayta munakun; k'amisqata chejnikojrí mana ima yachayniyoj wampu. 2 Allin runaqa Tata Diospa k'acha khuyakuyninta tarin, sajra yuyayniyoj runatarí Diosqa astawan juchachanqa. 3 Sajra ruwayqa mana pitapis allinta sayachinchu; cheqan runasrí unaypaj sumaj saphinchasqa sayanqanku. 4 Sumaj warmeqa qosampa pillun jina, qosanta p'enqaypi rikhurichej warmirí tullu t'ajay jina. 5 Cheqan runasqa cheqan imaspipuni yuyanku, sajra runastajrí ch'awkiyayllapi yuyanku. 6 Sajra runaj parlasqasnenqa wañuypa tojlla churasqan jina kanku; cheqan runaj parlasqasninrí chay imasmanta libran. 7 Juchasapastaqa Dios urmachenqa chinkachisqa kanankupaj, cheqan runaspa familiankutarí ni ima kuyuchenqachu. 8 Runaqa yachayniyoj kasqanman jina jatunchasqa kanqa, sajra sonqoyojrí pisipaj qhawasqa kanqa. 9 Aswan walej kamachisniyoj kaspa, pisipaj qhawasqa kayqa aswan jatumpaj qhawasqa mana mikhunayoj runamanta nisqaqa. 10 Cheqan runaqa uywasninta allinta qhawan, sajra runarí uywasninta mana khuyanchu. 11 Pichus jallp'anta llank'ajpataqa ashkha mikhunasnin tiyapun; qhasi manakajpa qhepanta purejrí wampu runa. 12 Sajra runaqa sajra runaspa suwasqankuta munapayan; cheqan runaspa saphinkurí sumaj kawsayta apamun. 13 Sajra runaqa kikin llullakusqallampitaj lank'ukun, cheqan runarí chay tukuy ñak'ariymanta llusp'in. 14 Runaqa parlasqanman jina allin imaswan sajsasqa kanqa, makisninwan ruwasqanman jinataj pagota jap'enqa. 15 Wampoqa yuyan tukuy ima ruwasqasnimpis allillan kasqanta; yuyayniyoj runarí uyarin tukuy yuyaychaykunata. 16 Wampoqa phiñakuyninta rikuchimpacha; sumaj yuyayniyoj runarí mana kasuta ruwanchu contrampi kajtimpis. 17 Cheqanta parlaj testigoqa maychus kajta sut'inchan, uj llulla runarí llullakuspa rimarin. 18 Imallatapis mana yuyaychakuspalla runaj parlarparisqanqa espada jina t'ojsin; yachayniyojkunaj parlasqasninkurí jampi jina sonqota thañichin. 19 Maychus kasqanta parlaj runaqa wiñaypaj sayanqa, llulla runarí uj ratollata sayanqa. 20 Sajra runaspa wakichikusqankupeqa llullakuylla tiyan; allin kawsanamanta yuyaychajkunapajrí kusiy tiyan. 21 Cheqan runamanqa ni ima sajrapis chayanqachu; sajra runarí tukuy imaymana llakiykunawan atipachisqa kanqa. 22 Tata Diosqa llullaswan millachikun, pichus cheqata imatapis ruwajtarí may kusisqa qhawan. 23 Yuyayniyoj runaqa yachayniyoj kasqanmanta mana runaykachanchu; wampu runarí sut'ita rikuchin wampu kayninta. 24 K'uchi runaqa tukuy ima patapi kanqa, qhella kajrí tukuy imapi atipasqa. 25 Phuteyqa runata mana allinman tukuchin, misk'i nisqastaj sonqonta t'ikarichin. 26 Cheqan runaqa runa masinta allin ñanta pusan, sajra runasrí chay ñanmanta pantachinku. 27 Monte animalesta jap'imoj qhella runaqa chay jap'isqanta ni kankarqollampischu; uj yuyayniyoj k'uchi runarí ashkha kapuyniyojman tukun. 28 Cheqan kaj ñanqa kawsayman pusan, chay ñampitaj mana wañuy kanchu.
