FILIPENSES 2

1Cristopi kaspa, kallpachasqa kankichej, munakuynintaj sonqochasunkichej. Espíritu Santowan uj sonqolla kawsakuy tiyan, qankuna ukhupitaj tiyan munanakuy, khuyanakuytaj. 2Chayrayku kusiywan sonqoyta junt'achiychej uj yuyaylla kaspa, uj munakuyniyojlla kaspa, uj sonqolla kaspa, uj ruwanallapi yuyaspa ima. 3Ama imatapis ruwaychejchu churanakuspa, nitaj jatunchakuspa. Astawanqa llamp'u sonqowan sapa uj qhawachun ujkunata paymanta aswan kurajta jina. 4Amataj pipis mask'achunchu paypa allinnillantaqa, astawanqa sapa uj mask'achun ujkunaj allinninkutapis. 5Imayna yuyaywanchus Cristo Jesús kawsarqa, kikillantataj qankunapis kawsaychej. 6Cristoqa Diospuni kashaspapis, Payqa mana ch'ipakorqachu Dios kayninmanta. 7Manachayqa janaj pachapi jatun kaynimpa k'anchayninta saqespa, Payqa kamachi runaj kayninta jap'erqa, runa jinataj nacekorqa. 8Runa kaspa, k'umuykukorqa, Paytaj kasukoj kaspa, wañuykama chayarqa. Jinataj cruzpi chakatasqa wañorqa. 9Chayrayku Diosqa Payta maytapuni jatuncharqa tukuy kaj chhika patapi kanampaj, uj sutitataj qorqa, tukuy sutismanta aswan sumaj sutita. 10Ajinamanta Jesuspa sutimpi qonqorikonqanku janaj pachapi tukuy kajkuna, kay pachapi kajkuna, ukhu pachapi kajkunapis. 11Tukuy runastaj rimarenqanku Jesucristo Señor kasqanta, chaynejta Dios Tata jatunchasqa kanampaj. 12Munakusqasníy, imaynatachus qankuna kasuwajpuni kankichej chaypi kashajtiy, ajinallatataj qankunamanta karupi kashajtiypis astawan kasullawaychejpuni. Chayrayku kunanqa Diosta manchachikuspa astawan kallpakullaychejpuni, mosoj kawsayniykichejpi allin kayniykichej junt'asqa kanampaj. 13Imaraykuchus Diosqa qankunaman churan munanaykichejta, ruwanaykichejtataj Paypa k'acha munayninrayku. 14Tukuy imata ruwaychej ama thutuspa, nitaj churanakuspa, 15mana k'amina kanaykichejpaj. Ajinamanta Diospa wawasnin mana ch'ichiyoj, mana juchayoj kanaykichej tiyan, kay pachapi may sajra juchasapa runaspa chawpimpi. Qankunaqa paykuna chawpipi k'anchashankichej ch'askas jina, 16wiñay kawsayta qoj simi nisqata paykunaman willashaspa. Ajinata Cristoj kutimuynin p'unchaypi mayta kusikusaj, yachaspa kallpakusqay, trabajasqaytaj mana qhasipaj kasqanta. 17Qankunaj creesqaykichej, Diospaj trabajasqaykichej imaqa uj uywa wañuchisqa q'olachina jina Diospa ñawpaqempi. Wañuchisqachus kasaj chayqa, kawsayneyqa chay jaywasqaykichej patapi ch'ajchusqa kanman. Ajina kajtimpis, kusikusaj qankunawan khuska. 18Jinallatataj qankunapis kusikuychej noqawan khuska. 19Sichus Señor Jesús munanqa chayqa, munayman usqhayta kachamuyta Timoteota qankunaman, noqapis sonqo junt'asqa kusikunaypaj imaynachus kasqaykichejmanta yachaspa. 20Mana pipis noqawan kanchu pay jina qankunamanta munakuywan yuyarikojqa, allinniykichejta mask'aspa. 21Tukuy mask'anku ari paykunaj allinnillankuta, manataj Cristo Jesuspa munayninta ruwaytachu. 22Qankuna yachankichej imaynatachus Timoteo allin runa kasqanta rikuchisqanta; jinallataj yachankichej, imaynatachus uj chureqa tatanta yanapan, ajinata payqa noqawan trabajasqanta evangeliomanta willaspa. 23Kunanqa imaynachus rinawanta yachaytawan, munani payta qankunaman kachamuyta. 24Jinallataj Señorpi suyakushani, noqa kikiy usqhayta qankunata watukoj jamunaypaj. 25Yuyallarqanitaj hermano Epafroditotapis kachamunayqa allimpuni kasqanta. Payqa yanapawajniy, noqawan khuska evangelioman sayasqa, pitachus qankuna kachamuwarqankichej pisichikushajtiy yanapanawampaj, chay. 26Payqa maytapuni tukuyniykichejta rikuyta munashan, llakisqataj kashan onqosqa kasqanta uyarisqaykichejmanta. 27Arí, cheqamanta onqosqa karqa; yaqhapuni wañorqa. Chaywampis Diosqa payta khuyarqa, manataj payllatachu; noqatapis khuyallawarqataj, ama llakiy pata llakiy chayamunawampaj. 28Chayrayku usqhayta payta kachamushani qankuna kusikunaykichejpaj ujtawan payta rikuspa, noqapis amaña chaykama llakisqa kanaypaj. 29Payta wajyarikuychej Señorpi tukuy kusiywan; pay jina kajkunatapis jatumpaj qhawaychej. 30Cristopaj ruwanarayku yaqha wañorqa; wañuy patapiña kasharqa noqata yanapawaspa, imaraykuchus qankunaqa karupi kaspa, mana yanapawayta aterqankichejchu.

will be added

X\