1 Israelitas Egiptomanta llojsimusqankumanta iskay watan qallarikuynimpi ñawpaj kaj killapi, Tata Diosqa Sinaí ch'in pampapi Moisesman kay jinata parlarqa: 2 Israelitasqa Pascua fiestata ruwachunku, maypachachus ruwanankupaj nisqa kashan chaypacha. 3 Ajinaqa, chunka tawayoj p'unchay kashajtin, ch'isiyaykuyta kay killapi, imaynatachus kamachisqa kashan, chayman jina kikinta ruwachunku. 4 Chantá Moisesqa israelitasta kamacherqa Pascua fiestata ruwanankuta. 5 Paykunataj kikinta ruwarqanku ñawpaj kaj killapi, chunka tawayoj kaj p'unchaypi ch'isiyaykuyta Sinaí ch'in pampapi, Tata Diosqa Moisesman kamachisqanman jina. 6 Wakin runastajrí ch'ichipaj qhawasqa kasharqanku wañusqasta llankhasqankurayku. Chayrayku paykunaqa chay p'unchaypi Pascuata mana ruwayta aterqankuchu. Jina kaspa, paykunaqa Moiseswan, Aaronwan ima parlaj rerqanku. 7 Chayaspataj, Moisesman nerqanku: Noqaykoqa wañusqasta llankharqayku, chayrayku mana llimphupaj qhawasqa kashayku. Kunanqa kay kikin p'unchayllapitaj, manachu atiykuman Tata Diosman jaywanata jaywayta, israelitaswan khuska? nispa. 8 Moisestaj paykunaman nerqa: Suyarikuychej Tata Dios imatachus ninawanta qankunamanta, nispa. 9 Chaymanta Tata Diosqa Moisesman parlarqa kay jinata: 10 Tukuyniykichej, jinallataj mirayniykichejpis ruwanaykichejpuni tiyan Pascua fiestata Noqaj sutiypi. Pikunachus wañusqasta llankharisqankupi ch'ichipaj qhawasqas, pikunachus ñan puriypi kajkuna imaqa 11 Pascuata ruwachunku chunka tawayoj p'unchay kashajtin, iskay kaj killapi ña ch'isiyaykuytaña. Chaypi cordero aycha kankata mikhonqanku jaya qhorasniyojta, mana levadurayoj tortilla t'antatawan. 12 Q'ayantimpajqa ama imatapis puchuchichunkuchu, nitaj chay corderoj tullusnintapis p'akichunkuchu. Pascua fiestataqa ruwachunku Noqa kamachisqayman jina. 13 Chantá sichus pipis llimphupaj qhawasqa kashaspa, nitaj ñan puriypipis kashaspa Pascuata mana ruwan chayqa, ayllusnimpa chawpinmanta chinkachisqa kachun. Chay kikin p'unchaypi Tata Diospaj jaywanata mana jaywasqanrayku, chay runaqa juchachasqa kanqa. 14 Qankuna ukhupi tiyakojkuna forasterospis Pascua fiestata Noqaj sutiypi ruwanallankutaj tiyan, imaynatachus kamachisqayman jina. Imatachus nisqasniyta kikinta ruwananku tiyan forasteros, jinallataj qankuna chawpipi nacekojkunapis. 15 Ima p'unchaychus Dioswan Tinkukuna Toldota sayaricherqanku chay p'unchaypacha, phuyoqa trato ruwana toldota p'ampaykorqa, ch'isiyaykuymantapachataj uj nina k'anchay jina k'ancharqa Dioswan Tinkukuna Toldo patapi sut'iyamunankama. 16 Ajinallapuni karqa Dioswan Tinkukuna Toldopi; p'unchayqa phuyu p'ampaykorqa, tutantaj uj nina k'anchay jina k'ancharqa. 17 Dioswan Tinkukuna Toldo patamanta phuyu oqharikojtintaj, israelitasqa ñanta purirej kanku. Maypichus phuyu sayarqa, chaypitaj jarakoj kanku. 18 Puririnankuta Tata Dios kamachejtin, purirej kanku; jarakunankuta kamachejtintaj, jarakoj kanku. Israelitas chaypi qhepakoj kanku mayk'ajkamachus Dioswan Tinkukuna Toldo patapi phuyu kanankama. 19 Sichus chay phuyu Dioswan Tinkukuna Toldo patapi unayta kasharqa chayqa, israelitaspis qhepakullajtaj kanku, Tata Dios imatachus kamachisqasninta ruwaspa. 20 Sichus phuyu pisi p'unchaykunallata kaj chayqa, Tata Diospa kamachisqanman jina ñanta purirejpacha kanku israelitasqa. Ujtawan Tata Dios imatachus kamachejtin, qhepakullajtaj kanku. 21 Wakin kutispeqa uj ch'isillata chay phuyu qhepakoj, q'ayantintaj tutamanta oqharikoj. Jina kajtin, israelitasqa ñanta puririllajtaj kanku. P'unchaypis kachun tutapis kachun, phuyu oqharikojtenqa, paykunapis rillajtaj kanku. 22 Sichus mashkha p'unchaykunata, chayrí uj killata, chayrí uj watata phuyu Dioswan Tinkukuna Toldo patapi sayarqa chayqa, israelitaspis chay kikillantataj chaypi kaj kanku; mana maymampis rejchu kanku. Maypachachus chay phuyu oqharikorqa chaypachaqa, paykunapis kikillantataj oqharikojpacha kanku ñanta rinankupaj. 23 Maypichus Tata Diosqa jarakunankuta nerqa, chaypi jarakoj kanku: Riychej nejtintaj, ñanta jap'irej kanku. Tata Diospa kamachisqanta junt'aj kanku, Moisesnejta kamachisqanman jina.
