NÚMEROS 8

1Tata Diosqa Moisesman parlaspa, nerqa: 2Aaronman ajinata niy: Qanchis k'anchachinasta churaspaqa, k'anchachinaj ñawpaqenman qhawarisqata jap'irachinki, nispa. 3Aaronqa kikinta ruwarqa; imaynatachus Tata Diosqa Moisesman kamachisqanman jina, ajinata k'anchaykunata jap'iracherqa k'anchachinaj ñawpaqenman qhawarisqasta. 4Moisesqa chay k'anchachinasta martillowan t'akasqa qorimanta ruwachisqa, sayananmanta maymantachus palqasnin llojsisharqa, chaykama, imaynatachus Tata Diosqa Moisesman nerqa ruwananta, ajinata. 5Tata Diosqa Moisesman parlaspa, nerqa: 6Tukuynin levitasta israelitaspa chawpinkumanta t'aqay; paykuna llimphupaj qhawasqa kanankupaj llimphuchachiy. 7Llimphuchasqa kanankupaj, kay jinata llimphuchachinki. Llimphuchaj yakuwan paykunaman ch'ajchunki. Chaymantataj paykuna tukuy cuerponkumanta pelosninkuta rasphakonqanku, p'achasninkutataj t'ajsakuchunku; ajinamanta paykunaqa llimphupaj qhawasqa kanqanku. 8Chaymantaqa uj torillota aysamuchunku, apamullachunkutaj ch'aki mikhuymanta sumajnin kaj jak'utawan, aceitewan puñasqata. Jinallatataj uj torillotapis aysamuchunku juchaspa cuentanmanta jaywanapaj. 9Ajina kajtintaj, levitasta qayllachinki Dioswan Tinkukuna Toldoj ñawpaqenman, jinallataj tukuynin israelitaspis tantakuchunku. 10Tata Diospa ñawpaqempi levitasta qayllachejtiyki, israelitasqa makisninkuta churachunku levitaspa umasninkuman. 11Jinapi Aaronqa levitasta Tata Diosman jaywanqa ikhasqa jaywanata jina israelitaspa sutimpi. Ajinamanta levitasqa Noqaj kamachiypi kanqanku. 12Chantá levitasñataj chay aysamusqa torilloj umanman makisninkuta churanqanku. Jinamanta ujnin kaj torilloqa juchaspa cuentanmanta Tata Diosman jaywasqa kanqa, ujnin kajtaj Tata Diospaj q'olachinapaj kanqa, levitasta Tata Diospaj t'aqapunapaj. 13Levitasta sayachinki Aaronpa ñawpaqempi, churisnimpa ñawpaqempiwan Noqapaj paykunata t'aqapunawaykipaj. 14Ajinata qanqa levitasta t'aqapuwanki israelitaspa chawpinkumanta Noqajta kanankupaj. 15Chantá levitasqa jamonqanku Dioswan Tinkukuna Toldopi imaschus ruwana kajta ruwanankupaj. Chaypajqa paykunata llimphuchaspa, sumaj ikhasqa jaywanata jina paykunata t'aqapuwanki, 16imaraykuchus tukuy israelitaspa chawpinkupi Noqapaj t'aqasqa kanku. Noqa paykunata jap'ini israelitaspa kuraj kaj churisninkojpa cuentanmanta. 17Noqajtamin kanku tukuy israelitaspa kuraj kaj churisninku. Ajinallataj tukuy uywasninkoj phiwi uñasninkupis Noqajta kanku. Maypachachus egipciospa kuraj kaj churisninkuta wañuracherqani chaypacha, Noqa paykunataqa ajllakorqani israelitas ukhumanta. 18Chayrayku chaykunaj cuentanmanta levitasta ajllakuni. 19Noqa levitastaqa israelitaspa chawpinkumanta ajllakuni, jaywanitaj Aaronman, churisninmanwan, paykuna israelitaspa sutimpi ima ruwana kajtapis ruwanankupaj Dioswan Tinkukuna Toldopi, perdontapis israelitaspaj mañapunankupaj. Ajinamanta israelitasqa Dioswan Tinkukuna Toldoman mana qayllanqankuchu, nitaj ima castigopis paykunaman chayanqachu. 20Ajinamanta Moiseswan, Aaronwan, tukuy israelitaswan ima junt'arqanku Moisesman Tata Diospa nisqanta. 21Levitasqa llimphuchakorqanku, p'achasninkutapis t'ajsakorqanku. Jinamanta Aaronqa Tata Diosman paykunata jaywarqa, ikhasqa sumaj jaywanata jina. Ajinamanta Aaronqa paykunapaj perdonta tarerqa, llimphuchasqa kanankupaj. 22Chaymantataj levitasqa imachus ruwana kajta ruwayta qallarerqanku Dioswan Tinkukuna Toldopi. Chaytataj Aaronwan, churisninwan ruwacherqanku. Chay tukuyta ruwarqanku imaynatachus Tata Diosqa Moisesman levitasmanta kamachisqanman jina. 23Chaymanta Tata Diosqa Moisesman parlaspa, nerqa: 24Levitasqa iskay chunka phishqayoj watayojmantapacha imatachus ruwanankuta ruwayta qallarenqanku Dioswan Tinkukuna Toldopi. 25Phishqa chunka watasniyojmantataj chay ruwanasmanta llojsiponqanku. 26Chaymanta qhepamanqa paykunamanta qhepaman yaykumojkunatañataj yanapanqanku, Dioswan Tinkukuna Toldopi imastachus ruwashanku, chay ruwanaspi; chaywampis paykunaqa mana chay wakinkuna jinañachu ruwanqanku. Ajinata levitastaqa kamachinki ruwanankuta.

will be added

X\