NÚMEROS 36

1Josejpa churin Manasespa churin Maquirpa churin Galaadpa mirayninmanta kuraj kajkuna rispa, Moiseswan, tukuy israelitaspa kurajninkunawan parlamorqanku: 2Tata Diosqa qanman nisunki, kay jallp'asta suerteta choqaspa rak'inaykita sapa uj aylluman. Chantá kamachillasunkitaj, aylluykumanta karqa chay Zelofehadpa ususisninmampis jallp'ata qonaykita. 3Sichus chay warmis waj Israel ayllumanta kaj qhariswan casaranqanku chayqa, maypichus chayarqa, chay jallp'astaqa saqeponqanku mayqen ayllumantachus kanku, chayman. Paykunataj ima ayllumanta kajwanchus casaranku, chaypa ayllunman tukonqanku. Ajinamanta paykunaqa maypichus suerteman jina chayawarqayku, chay jallp'ata pisiyachipuwasqayku. 4Chantaqa israelitasman kacharina wata chayamojtenqa, chay warmispa jallp'asninkoqa chay waj ayllumampuni chayanqa, manaña noqaykoj aylluykojtañachu kanqa, nispa. 5Chantá Moisesqa Tata Diospa kamachisqanman jina, israelitasta kamacherqa: José ayllumanta kajkunaqa cheqanta parlanku. 6Tata Diosqa kayta kamachin: Zelofehadpa ususisnin atinku casarakuyta munasqankuman jina. Chaywampis casarakonqanku tatankoj ayllunmanta kaj qharillawan. 7Jinamanta sichus ima jallp'apis uj aylluman chayan chayqa, mana waj aylluman chayanqachu. Tukuy israelitas chaytaqa sumajta waqaychananku tiyan, ayllunku ukhupipuni herencianku qhepakunampaj. 8Sichus mayqen ayllumanta ima warmillapis jallp'ayoj kanman chayqa, ima ayllumantachus kashan, chay kajwampuni casaranan tiyan. Ajinamanta israelitasqa tatasninkoj jallp'anta jap'enqankupuni. 9Ni ima herenciapis waj aylloj makinman chayanqachu. Sapa uj Israel ayllu tatasninkumanta herenciata jap'isqasninkuta mana waj ayllusman kacharinankuchu tiyan, nispa nerqa Moisesqa. 10Tata Diosqa Moisesman kamachisqanman jina Zelofehadpa ususisnenqa ruwarqanku. 11Ajinata ruwarqanku Maala, Tirsa, Hogla, Milca, Noa ima. Paykuna casarakorqanku tatankumanta tiosninkoj churisninkuwan. 12Chaykuna karqanku Josejpa churin Manasespa mirayninmanta kajkuna. Ajinamanta herenciasninkoqa tatankoj ayllun ukhullapipuni karqa. 13Chay ruwaykunata, kamachisqasta imaqa Tata Diosqa israelitasman kamacherqa Moisesnejta, Moab pampaspi Jordán Mayu kantupi, Jericó llajtaj chimpampi.

will be added

X\