NÚMEROS 32

1Rubén ayllojta, Gad ayllojtawan ashkha uywasninku karqa. Chayrayku Jazer jallp'aswan, Galaad jallp'aswan uywasta mirachinapaj sumaj kasqanta reparaspa, 2Gadpa miraynin, Rubenpa miraynin ima Moisesman, sacerdote Eleazarman, israelitaspa kurajninkukunamanwan qayllaykorqanku, nerqankutaj: 3Atarot, Dibón, Jazer, Nimra, Hesbón, Eleale, Sebam, Nebo, Beón ima, 4israelitaspa ñawpaqempi Tata Diospa qhechusqan chay jallp'as, uywasta mirachinapaj sumaj jallp'as kanku. Kay kamachisniykichejpata ashkha uywasniyku tiyapuwayku. 5Sichus qankunaman allin rijch'asunkichej chayqa, noqaykuman chay jallp'asta qowayku. Amaña Jordán Mayuta chimpachiwaykuchu ari, nispa. 6Moisestajrí chayta uyarispa, paykunaman nerqa: Qankunaqa kayllapiñachu qhepakuyta munankichej, wawqesniykichej maqanakoj rinankukama? 7Imaraykutaj israelitasta iskayrayachiyta munankichej, ima jallp'atachus Tata Dios qosorqachej, chayman chayaytari? 8Tatasniykichejpis kikillantataj ruwarqanku, Cades-barneamanta chay jallp'asta qhawamojta kachashajtiy. 9Paykuna chayarqanku Escol Wayq'okama, chaymantataj chay jallp'asta qhawaraspa, kutimorqanku. Chayamuspa, israelitasta iskayrayacherqanku, ima jallp'atachus Tata Dios paykunaman qorqa, chayman ama yaykunankupaj. 10Chayrayku Tata Diosqa chay p'unchay maytapuni phiñakorqa, juraspataj nerqa, 11Egiptomanta llojsimojkunamanta iskay chunka tawayoj watayojmanta pataman yupasqa kajkunaqa, chay jallp'ata mana rikunankuta, mayqentachus Abrahamman, Isaacman, Jacobman ima qonanta nerqa, chayman, ñawpaqempi mana allinta purisqankurayku. 12Cenezeo Jefonejpa churin Calebwan, Nunpa churin Josuellawan Tata Diospa ñawpaqempi allinta purerqanku. 13Chaymanta Tata Diosqa manchayta phiñakuspa, israelitasta ch'in pampaspi puricherqa tawa chunka watasta, tukuy rimajkuna wañuranankukama, Tata Diospa ñawpaqempi mana allinta ruwasqankurayku. 14Kunanqa qankunañataj juchasapa tatasniykichej jina ruwayta munashankichej, Tata Diosta phiñachiyta munaspa israelitaspa contranta. 15Sichus qankuna mana ñawpajman riyta munankichej chayqa, israelitasqa unaytawanraj ch'in pampaspi qhepakonqanku. Qankuna juchayoj kankichej paykunañataj urmanankupaj, nispa nerqa Moisesqa. 16Chantá paykunaqa Moisesman qayllaykuspa, nerqanku: Noqaykoqa munayku ovejasniykupaj, wakasniykupaj ima kanchasta ruwayta, llajtastataj familiasniykupaj. 17Chaymanta, noqayku israelitaspa ñawpaqenkuta risqayku sumaj wakichisqas, maynejpichus paykuna jallp'ata jap'ikonqanku, chayman chayanaykukama. Chaykamataj tukuy familiasniyku sumaj ruwasqa llajtasniykupi qhepakonqanku sumaj waqaychasqas kay llajtayojkunamanta. 18Noqaykoqa kutimpusqayku, maypachachus israelitas paykuna kikinkupaj jallp'ata jap'ikapunku chaypacharaj. 19Sichus kay jallp'asta noqayku jap'ikusqayku chayqa, manaña Jordán Mayu chimpapi jallp'asta jap'ikusqaykuchu, nitaj aswan jaqaykunapipis jallp'ata mañakusqaykuñachu; kayllawanña qhepakusqayku, nispa. 20Moisestaj kuticherqa: Sichus chay nisqaykichejta junt'ankichej, maqanakamunkichejtaj Tata Diospa nisqanman jina, 21sitajchus tukuyniykichej qharis Jordán Mayuta chimpankichej Tata Diospa nisqanman jina, Tata Dios tukuy enemigosniykichejta chinkachinankama chayqa, 22chay llajtasta atipaspa, atinkichej kutimpuyta. Chaywan qankunaqa Tata Diospa nisqanta junt'ankichej, jinallataj wawqesniykichej israelitaswampis. Jina kajtenqa, chaymanta kay jallp'asqa qankunajta kanqa Tata Diospa nisqanman jina. 23Sichus mana nisqaykichejman jina ruwankichej chayqa, uj jatun juchata ruwankichej Tata Diospa contranta, Paypa castigontaj ima ratollapis chayamusonqachej chay juchasniykichejrayku. 24Kunanqa llajtasta familiasniykichejpaj ruwakuychej, kanchastapis uywasniykichejpaj, imastachus nisqaykichejtataj junt'aychejpuni, nispa. 25Chantá Gadpa miraynin, Rubenpa miraynin ima Moisesman kuticherqanku: Kay kamachisniykeqa imastachus kamachisqasniykita kikinta ruwasqayku. 26Warmisniykuwan, juch'uy wawasniykuwan, tukuy uywasniykuwan imaqa Galaad cheqapi kay ruwasqayku llajtasllapi qhepakonqanku. 27Noqayku kamachisniykitaj tukuy maqanakupaj wakichisqas risqayku, Tata Diospa ñawpaqenta enemigoswan maqanakoj, qan kamachiwasqaykuman jina, nispa. 28Chaymantaqa Moisés kamacherqa sacerdote Eleazarman, Nunpa churin Josueman, Israel tukuy ayllusmanta kurajkunaman ima, kay jinata: 29Sichus Gad ayllumanta kajkuna, Rubén ayllumanta kajkuna ima qankunawan khuska Jordán Mayuta chimpanqanku enemigoswan maqanakoj Tata Diospa kamachisqanman jina, qankuna maypichus jallp'asta jap'ikunaykichejkama chayqa, qankunaqa paykunaman qopunkichej kay Galaad jallp'asta paykuna tiyakunankupaj. 30Sichus mana qankunawan khuska Jordán Mayuta enemigoswan maqanakoj chimpanqanku chayrí, qankunawan khuska Canaanpi jallp'ata jap'ikonqanku, nispa kamacherqa Moisesqa. 31Gad ayllumanta kajkuna, Rubén ayllumanta kajkunawantaj kuticherqanku: Kay kamachisniykichejqa imatachus Tata Dios kamachiwasqaykuman jina ruwasqayku. 32Canaanman chimpasqayku armasniyku aparisqa Tata Diospa kamachiwasqaykuman jina; chaywampis herenciayku jallp'ata jap'ikusqayku Jordán Mayoj inti llojsimuynejpi, nispa. 33Ajinamanta Moisesqa qorqa jallp'asta Gad aylluman, Rubén aylluman, Manasés khuskan ayllumanwan. Chay jallp'asqa kasqa amorreo rey Sehonpata, Basanmanta rey Ogpatawan. Chayta paykunaqa jap'ikaporqanku llajtasnintinta, chay muyuynimpi kaj jallp'asnintinta. 34Gad ayllumanta kajkunaqa watejmanta sayaricherqankupacha kay llajtasta: Dibonta, Atarotta, Aroerta, 35Atarot-sofanta, Jazerta, Jogbehata, 36Bet-nimrata, Bet-arantawan. Sumajta perqaswan muyuykucherqanku, jinallatataj kanchastapis ovejasninkupaj ruwarqanku. 37Rubén ayllumanta kajkunapis kikinta llajtasta sayaricherqanku: Hesbonta, Elealeta, Quiriataimta, 38Nebota, Baal-meonta, Sibmatawan. Wakin llajtasta watejmanta ruwasqasninkuta waj sutiswan suticharqanku. 39Manasespa churin Maquirpa miraynenqa Galaad jallp'ata qhechumorqanku, chaypi tiyakoj tukuy amorreosta qharqospa. 40Chaymanta Moisesqa Maquirpa mirayninman chay jallp'asta qoporqa. Ajinamanta paykunaqa Galaad jallp'aspi tiyakorqanku. 41Manasespa churin Jairpis wakin ranchosta amorreosmanta qhechullarqataj, suticharqataj chay cheqasta, Havot-jair sutiwan. 42Jinallataj Nobapis Kenat llajtata tukuy ranchosnintinta qhechuspa jap'ikaporqa. Chay jallp'astataj suticharqa Noba sutiwan, kikin paypa sutillanwantaj.

will be added

X\