NÚMEROS 30

1Moisesqa israelita ayllumanta kurajkunaman nerqa: Kayta Tata Diosqa nisunkichej: 2Sichus mayqempis imatapis qonanta nin, chayrí juraspa nin imatapis qonanta chayqa, ruwanampuni tiyan imatachus ruwasaj nisqanta. 3Ichapis uj sipas tatampa makillampiraj kashaspa, imatapis Tata Diosman qonanta nin, chayrí imatapis ruwananta nin. 4Sichus tatan chay nisqanta uyarispa mana imatapis nin chayqa, chay sipasqa junt'anan tiyan imatachus qosaj nisqanta, chayrí imatachus ruwasaj nisqantapis. 5Chantá sichus tatan chayta yachaspa mana munan chay imasta qonanta, nitaj ruwananta chayqa, jinamanta saqellanqa, manataj junt'anqachu, tatan mana munasqanrayku. Tatanqa mana junt'anantapunichu nisqanrayku Tata Diosqa mana mañanqachu junt'anantapuni. 6Ichapis uj warmi imatapis ñawpajtaña Tata Diosman qonanta nerqa, usqhayllata parlarparispa, chantá casarakun. 7Sichus qosan chayta uyarispa mana imatapis nin chayqa, chay warmi imatachus qonanta nerqa, chayta junt'anan tiyan, chayrí imatachus ruwasaj nisqantapis. 8Sichus yachaytawan qosan mana munan chayta ruwananta chayqa, manaña junt'ayta atinchu imatachus qosaj nisqanta, nitaj imatachus ruwasaj nisqantapis. Tata Diospis manallataj junt'anantapunichu nin. 9Sichus viuda, chayrí t'aqasqa warmi nenqa imatapis Tata Diosman qonanta chayqa, junt'anampuni tiyan imatachus qosaj nisqanta. 10Ichapis uj casarasqa warmi juraspa ninman imatapis Tata Diosman qonanta, qosampa wasimpi kashaspa. 11Sichus qosan chayta yachaspa mana imatapis nin, manataj jark'an imatachus ruwashan chayta chayqa, pay junt'anan tiyan imatachus qonanta nerqa. 12Sichus qosan yachaytawan mana munan chayta ruwananta chayqa, mana Tata Diosqa ninchu junt'anantapuni, imaraykuchus qosanqa chayta mana munanchu. 13Qosanqa atillanqa qoy niyta, chayrí ama niytapis, imatachus warmin qosaj nisqanta, chayrí jurasqantapis. 14Sichus qosan chayta yachaspa q'ayantinkama mana imatapis nin chayqa, chaywan niyta munan, warmin imatachus Tata Diosman qosaj nisqanta junt'ananta. 15Sichus qosan chayta yachasqanmanta qhepataña mana usqhayta imatapis ninchu, chaymantaraj qhesachan chayqa, payqa warmimpa juchanta apanqa, imatachus Tata Diosman qosaj nisqanta mana junt'asqanmanta. 16Chay imasta Tata Diosqa kamacherqa Moisesman imaynatachus qhariwarmi ruwanankuta, imaynatatajchus uj sipaspis tatampa wasimpi kashaspallaraj ruwananta.

will be added

X\