1 Maypachachus Moisesman Sinaí Orqopi Tata Dios parlasharqa chaypacha, Aaronpata Moisespatawan mirayninku kaykuna karqanku; 2 Aaronpa churisnenqa kaykuna karqanku: Kuraj kajqa Nadab, chantá Abiú, Eleazar, Itamar ima. 3 Chaykunaqa tawantinku ajllasqa, jawisqataj karqanku sacerdotes kanankupaj. 4 Nadabwan Abiuwanqa Tata Diospa ñawpaqempi wañusqanku, Sinaí Orqopi Tata Diosman waj ninata jaywasqankumanta. Chantapis paykunajta mana wawasninku karqachu. Chantá Eleazarwan, Itamarllawanña sacerdotej ruwanasninta ruwarqanku, tatanku Aaronwan kashaspa. 5 Tata Diosqa Moisesman parlaspa, nerqa: 6 Leví aylluta wajyay, sacerdote Aaronpa kamachisqanman jina imatapis ruwanankupaj, payta yanapanankupaj. 7 Dioswan Tinkukuna Toldopi israelitaspaj, Aaronpajwan ruwapuchunku, toldopi imaschus ruwana kashan, chay imastawan. 8 Paykuna allinta jallch'anqanku Dioswan Tinkukuna Toldoj imasninta, chantapis israelitasta yanapaspa, toldopi imachus ruwana kashan, chay imastawan ruwanqanku. 9 Tukuynin levitasta israelitasmanta Aaronpaj, miraynimpajwan t'aqay; paykuna imastachus kamachenqanku, chayllataña levitasqa ruwananku tiyan. 10 Jinamanta Aaronman, mirayninmanwan saqey sacerdotej ruwanasninta ruwanankupaj. Sichus waj runa sacerdotej ruwananman qayllaykun chayqa, wañuchisqa kanqa. 11 Tata Diosqa Moisesman nillarqataj: 12 Tukuynin israelitaspa chawpinmanta sapa familiapi kuraj kaj churisninkoj cuentanmanta levitasta ajllakuni; chayrayku paykunaqa Noqajta kanku. 13 Noqajtamin tukuy kuraj kaj wawasqa. Maypachachus egipciospa kuraj kaj churisninkuta wañuracherqani chaypacha, israelitaspa kuraj kaj churisninkuta, jinallataj uywaspa phiwi uñasninkutapis ajllakorqani. Chayrayku chaykunaqa Noqajta kanku. Noqamin Tata Diosqa kani. 14 Tata Diosqa Sinaí ch'in pampapi Moisesman nerqa: 15 Tukuynin levitasta yupay tatasninkoj sutisninkuman jina mashkhachus kasqankuta, jinallataj sapa familiapi tukuynin qharista uj killayojmanta pataman, nispa. 16 Moisestaj levitasta yuparqa Tata Diospa kamachisqanman jina. 17 Levijpa churisnenqa karqanku Gersón, Coat, Merari ima. 18 Gersonpa churisnenqa mirasqankuman jina karqanku Libni, Simei ima. 19 Coatpa churisnenqa mirasqankuman jina karqanku Amram, Izhar, Hebrón, Uziel ima. 20 Merarijpa churisnenqa mirasqankuman jina karqanku Musi, Mahli ima. Chaykuna karqanku Levijpa churisnin mirasqankuman jina, tatasninkoj sutisninkuman jina sapa familiapi. 21 Libni familiawan, Simei familiawan Gersonpa ayllunmanta karqanku. 22 Qharisqa tukuynimpi karqanku uj killayojmanta pataman qanchis waranqa, phishqa pachajniyoj. 23 Gersonpa familianqa inti yaykuynejpi Dioswan Tinkukuna Toldo wasaman jarakorqanku. 24 Gersonpa familianta kamachejqa karqa Laelpa churin Eliasaf. 25 Paykuna qhawananku karqa Dioswan Tinkukuna Toldota, chay toldopaj qaramanta ruwasqa qhatanasninta, jinallataj toldoman yaykunaj jark'achinasninta. 26 Chantá qhawanallankutaj karqa patioj jark'achinasninta, Dioswan Tinkukuna Toldoj muyuyninta muyurisqa patioman yaykunaj jark'achinasninta, may ukhupichus kashan toldowan altarwan chaypata, jinallataj jap'ichina waskhasnintawan. 27 Coatpa karqanku kay familias: Amram, Izhar, Hebrón, Uziel ima. 28 Paykuna karqanku uj killayojmanta pataman pusaj waranqa, kinsa pachajniyoj qharis. Paykuna cuentayoj karqanku Dioswan Tinkukuna Toldoj imasninta qhawanankupaj. 29 Paykunaqa Dioswan Tinkukuna Toldoj uray ladompi jarakorqanku. 30 Paykunata kamachejqa karqa Uzielpa churin Elizafán. 31 Paykuna cuentayoj karqanku waqaychanankupaj Diospa leyninwan kaj arca nisqa cajonta, mesata, k'anchachinasninta, altaresta, imaschus karqa Diosta yupaychanapaj chay imasta, velota, chaykunapi imasninchus karqa, chay imastawan. 32 Chay levitasta kamachejqa karqa sacerdote Aaronpa churin Eleazar. Pay cuentayoj karqa Dioswan Tinkukuna Toldopi imaschus karqa, chayta qhawajkunamanta. 33 Merarijpata karqanku Mahli familiawan, Musi familiawan. 34 Chaykunaqa tukuynimpi karqanku uj killayojmanta pataman sojta waranqa, iskay pachajniyoj qharis. 35 Paykunata kamachejqa karqa Abihailpa churin Zuriel. Paykuna jarakorqanku Dioswan Tinkukuna Toldoj pata ladompi. 36 Merarijpa churisninmanta kajkunaqa qhawananku karqa Dioswan Tinkukuna Toldoj tablasninta, wajtera k'aspisninta, sayanta kurkusninta, imachá tiyan chaytawan. 37 Jinallataj qhawananku karqa, patiota muyuykushan, chay sayasqa k'aspisninta, chukusninta, estacasninta, jap'ichina waskhasninta ima. 38 Dioswan Tinkukuna Toldoj ñawpaqenman inti llojsimuy ladoman jarakorqanku Moisés, Aarón, paypa churisnin ima. Paykuna Diospa tiyakunanta qhawanqanku israelitaspa cuentanmanta. Sichus waj runa sacerdotej ruwananman qayllaykun chayqa, wañuchisqa kanqa. 39 Moiseswan Aaronwanqa ajinata ruwarqanku Tata Diospa kamachisqanman jina. Paykuna levitaspa ayllusninkuta yuparqanku, mashkhachus kasqankuman jina. Tukuyninkupi karqanku uj killayojmanta pataman iskay chunka iskayniyoj waranqa qharis. 40 Tata Diosqa Moisesman nerqa: Israelitaspa tukuy kuraj kaj churisninkuta yupay uj killayojmanta pataman, sutisninkuta qhelqaspa. 41 Chay kuraj kaj churispa cuentanmanta ajllapuway levitaspa churisninkuta. Noqamin Tata Diosqa kani. Kikillantataj israelitaspa uywasninkoj phiwi uñasninkojpa cuentanmanta ajllapuway levitaspa uywasninkuta, nispa nerqa Tata Diosqa. 42 Ajinamanta Moisesqa israelitaspa kuraj kaj churisninkuta yuparqa, imaynatachus Tata Dios kamacherqa, chayman jina. 43 Tukuyninkupi uj killayojmanta pataman iskay chunka iskayniyoj waranqa, iskay pachaj qanchis chunka kinsayoj karqanku. 44 Chantá Tata Diosqa Moisesman nerqa: 45 Chay israelitaspa kuraj kaj churisninkojpa cuentanmanta levitasta ajllay, jinallataj israelitaspa uywasninkoj phiwi uñasninkojpa cuentanmanta levitaspa uywasninkuta. Levitasqa Noqajta kanku. Noqamin Tata Diosqa kani. 46 Chaywampis israelitaspa kuraj kaj churisninkoqa aswan ashkha kanku levitaspa churisninkumanta nisqaqa. Ajinaqa chay iskay pachaj qanchis chunka kinsayoj puchojkunamanta, 47 mañay sapa ujmanta phishqa phisu qolqeta, Dioswan Tinkukuna Toldopi mashkhachus peso churasqa kasqanman jina. Chay qolqeqa chunka ujniyoj gramos. 48 Chay kuraj kajkunaj cuentanmanta tantasqa qolqeta Aaronman, churisninmanwan jayway. 49 Moisesqa chay qolqeta jap'erqa israelitaspa kuraj kaj churisninkoj cuentanmanta, mayqenkunachus puchorqanku, chaykunamanta. 50 Chay qolqeta jap'erqa uj waranqa kinsa pachaj sojta chunka phishqayojta, imaynachus Dioswan Tinkukuna Toldopi peso churasqa kasqanman jina. 51 Chaymantataj chay qolqeta Aaronman, churisninmanwan jaywarqa, Tata Dios payta kamachisqanman jina.
