NÚMEROS 27

1Chayllaman qayllaykamorqanku phishqa warmis; paykuna karqanku Manasés ayllumanta Zelofehadpa ususisnin. Sutisninkutaj karqa Maala, Noa, Hogla, Milca, Tirsa ima. Tatanku Zelofehadqa karqa Heferpa churin, Hefertaj karqa Galaadpa churin, Galaadtaj karqa Maquirpa churin, Maquirtaj karqa Manasespa churin, Manasestaj karqa Josejpa churin. 2Chay phishqantin ñañaspura qayllaykorqanku Dioswan Tinkukuna Toldo punkupi Moisesman, sacerdote Eleazarman, israelitasmanta tukuy kuraj runasmanwan, nerqankutaj: 3Tataykoqa ch'in pampapi wañorqa. Mana Corewan khuskachu karqa, Tata Diospa contranta oqharikuspa, manachayqa pay kikimpa juchanrayku wañorqa. Chaywampis mana uj qhari wawata saqerqachu. 4Tataykoj sutin chinkapunman ayllun ukhumanta mana qhari wawan kasqanrayku, chaytaj mana allinchu kanman. Noqaykumampis qowayku jallp'ata ari, tataykoj wawqesnimpa jallp'anku ukhupi, nispa. 5Moisesqa Tata Diosman willarqa chay warmispa mañakusqankuta. 6Tata Diostaj payman nerqa: 7Zelofehadpa ususisnenqa cheqanta parlanku. Qoy ari jallp'ata tatankoj wawqesnimpa jallp'anku ukhupi; tatankoj herencian jallp'aqa paykunaman chayachun. 8Chantapis israelitasman niy: Sichus mayqen wañupun mana churita saqespa chayqa, chay herencianta ususin jap'ikapuchun. 9Sichus ususimpis mana kan chayqa, wawqesninman chay herencianta saqepuchun. 10Sichus wawqempis manallataj kan chayqa, herencianta tatampa wawqesninman saqepuchun. 11Sichus tatampa wawqempis manallataj kan chayqa, herencianta saqepuchun mayqenchus manaraj karu ayllunchu kajman. Kay leyqa israelitaspaj churasqa kanqa ajinata ruwanankupaj, qanman kamachisusqayman jina, nispa nerqa Tata Diosqa. 12Tata Diosqa Moisesman nerqa: Wichariy Abarim Orqoman; chaymanta rikunki, israelitasman qosqay, chay jallp'asta. 13Chayta rikuytawantaj, wañupunki, ñawpa tatasniykiwan tinkukamunki wawqeyki Aarón jina. 14Qankunaqa iskayniykichej sutiyta mana jatuncharqankichejchu kamachisqasniyta mana kasuwaspa israelitaspa ñawpaqenkupi, Zin ch'in pampapi yakuta mañakuspa israelitas contrayta oqharikushajtinku. Chay yakoqa Meriba nisqa cheqapi karqa Zin ch'in pampapi. 15Moisesqa Tata Diosman nerqa: 16Señor Tata Diosníy, tukuyman kawsayta qoj Dios, uj runata paykunallamantataj ajllaspa churay ari, paykunaj ñawpaqenkuta rispa pusanampaj, maymanchá rishanku, chayman, ama qhatirpayasqa ovejas jina mana michejniyoj purinankupaj. 18Tata Diostaj Moisesman kuticherqa: Nunpa churin Josueta ajllay; payqa sumaj k'acha yuyayniyoj runa. Chantá umanman makisniykita churay. 19Jinaspataj, sacerdote Eleazarpa ñawpaqenman pusay, tukuy israelitaspa ñawpaqenkuman. Paykuna rikushajtinkutaj, payta sayachiy cuentaykimanta. 20Qan payman sumajta kamachiy, tukuy israelitas payta kasunankupaj qanta jina. 21Josuetaj Eleazar sacerdoteman qayllachun. Sacerdote Eleazartaj Urim nisqa suerteta qhawananejta Noqata tapuwanqa. Jinamanta Josueqa israelitasta kamachenqa paykuna imatapis ruwanankupaj. 22Chantá Moisesqa kikinta ruwarqa Tata Diospa kamachisqanman jina. Josueta pusarikuspa, sacerdote Eleazarman rerqa, jinallataj runaspa ñawpaqenkumampis. 23Chaypi umanman makisninta churarqa kamachejninku kanampaj paypa cuentanmanta, Tata Diosqa Moisesnejta nisqanman jina.

will be added

X\