NÚMEROS 26

1Chay wañuchej onqoy pasayta, Tata Diosqa parlarqa Moisesman, sacerdote Aaronpa churin Eleazarmanwan: 2Israelitasta sapa aylluspi yupaychej, iskay chunka watasniyojmanta pataman, pikunachus wañuchinaku maqanakuman rinankupaj jinaña kanku, chaykunata, nispa. 3Moiseswan Eleazarwan kayta kamacherqanku Moab pampapi, Jordán Mayu chimpapi, Jericó llajta chimpapi: 4Yupachikuychej tukuy qharis iskay chunka watayojmanta pataman, nispa, imaynatachus Tata Diosqa paykunaman kamachisqanman jina. Kaykuna karqanku Egiptomanta llojsimojkuna israelitas: 5Israelpa kuraj kaj churin Rubenpa familiasnin; Enocpa churisnin, Falujpa churisnin, 6Hezronpa churisnin, Carmijpa churisnin ima. 7Rubenpa miraynenqa tukuynimpi karqanku tawa chunka kinsayoj waranqa, qanchis pachaj kinsa chunkayoj qharis. 8Falujpa churenqa Eliab karqa. 9Eliabpa churisnin karqanku Nemuel, Datán, Abiram ima. Datanwan, Abiramwan kurajkuna kaspapis, Corewan khuska Tata Diospa contranta oqharikorqanku. Chantaqa Moisespa, Aaronpa contrantawan oqharikorqanku. 10Jinallapitaj jallp'a kicharikuytawan, iskayninkuta oqoykorqa, jinallataj Coretapis. Jinamanta tukuynin t'aqa wañorqa. Iskay pachaj phishqa chunkayoj qharis ninaj ruphasqan wañorqanku, chay jinata ruwajkuna wananankupaj. 11Chay tukuywampis Corejpa churisnenqa mana wañorqankuchu. 12Simeonpa familianmanta mirajkuna kaykuna karqanku: Nemuelmanta, Jaminmanta, Jaquinmanta, 13Zeramanta, Saulmanta ima. 14Tukuynimpi karqanku iskay chunka iskayniyoj waranqa, iskay pachajniyoj qharis. 15Gadpa familianmanta mirajkunaqa kaykuna karqanku: Zefonmanta, Haguimanta, Sunimanta, 16Oznimanta, Erimanta, 17Arodmanta, Arelimantawan. 18Tukuynimpi karqanku tawa chunka waranqa, phishqa pachajniyoj qharis. 19Judajpa churisnin Erwan, Onanwan Canaán jallp'api wañorqanku. 20Judajpa familianmanta mirajkunaqa kaykuna karqanku: Salamanta, Faresmanta, Zaramantawan. 21Farespa familianmanta mirajkunaqa kaykuna karqanku: Hezronmanta, Hamulmantawan. 22Tukuynimpi Judajpa miraynenqa karqanku qanchis chunka sojtayoj waranqa, phishqa pachajniyoj qharis. 23Isacarpa familianmanta mirajkunaqa kaykuna karqanku: Tolamanta, Fuamanta, 24Jasubmanta, Simronmantawan. 25Isacarpa mirayninmanta kajkuna tukuynimpi karqanku sojta chunka tawayoj waranqa, kinsa pachajniyoj qharis. 26Zabulonpa familianmanta mirajkunaqa kaykuna karqanku: Seredmanta, Elomanta, Jahleelmantawan. 27Tukuynimpi karqanku sojta chunka waranqa, phishqa pachajniyoj qharis. 28Josejpa familianmanta mirajkunaqa kaykuna karqanku: Manasesmanta, Efrainmantawan. 29Manasespa churin Maquirpa miraynin; Maquirpa churin Galaadpa miraynin; 30Galaadpa churin Jezerpa miraynin, Halecpa miraynin, 31Asrielpa miraynin, Sichempa miraynin, 32Semidaj miraynin, Heferpatawan. 33Heferpa churin Zelofehadpata churisnin mana karqachu; ususisnillan karqanku, sutisninkutaj karqanku: Maala, Noa, Hogla, Milca, Tirsa ima. 34Manasesmanta mirajkunaqa tukuynimpi karqanku phishqa chunka iskayniyoj waranqa, qanchis pachajniyoj qharis. 35Efraínpa mirayninmanta kajkuna karqanku: Sutelaj miraynin, Bequerpa miraynin, Tahanpa miraynin ima. 36Sutelaj miraynenqa karqa Eranpa familian. 37Tukuynimpi Efraínpa miraynenqa karqanku kinsa chunka iskayniyoj waranqa, phishqa pachajniyoj qharis. Chaykuna karqanku Josejpa miraynin, sapa ujninkumanta mirasqankuman jina. 38Benjaminpa familianmanta mirajkunaqa kaykuna karqanku: Belaj miraynin, Asbelpa miraynin, Ahirampa miraynin, 39Sefufanpa miraynin, Hufampa miraynin ima. 40Belaj churisnin karqanku Ardwan, Naamanwan. Chaymanta Ardpa miraynin karqa arditas, Naamanmantataj naamitas. 41Tukuynimpi karqanku Benjaminpa miraynin tawa chunka phishqayoj waranqa, sojta pachajniyoj qharis. 42Danpa mirayninmanta kajkuna karqanku Suhampa miraynin. 43Tukuynimpi karqanku Suhampa miraynin sojta chunka tawayoj waranqa, tawa pachajniyoj qharis. 44Aserpa mirayninmanta kajkuna karqanku: Imnaj miraynin, Izuij miraynin, Beriajpa miraynin ima. 45Beriajpa mirayninmanta karqanku Heberpa miraynin, Malquielpa miraynin ima. 46Aserpa ususin karqa Sera. 47Aserpa miraynin tukuynimpi karqanku phishqa chunka kinsayoj waranqa, tawa pachajniyoj qharis. 48Neftalijpa mirayninmanta kajkuna karqanku: Jahzeelpa miraynin, Gunij miraynin, 49Jezerpa miraynin, Silempa miraynin ima. 50Tukuynimpi Neftalijpa mirayninmanta kajkuna karqanku tawa chunka phishqayoj waranqa, tawa pachajniyoj qharis. 51Ajinata yupachikuspa, israelitasqa tukuynimpi karqanku sojta pachaj ujniyoj waranqa, qanchis pachaj kinsa chunkayoj qharis. 52Tata Diosqa Moisesman nerqa: 53Kaykunaman kunanqa jallp'a qosqa kanqa mashkhachus yupasqapi kasqankuman jina. 54Ashkha kajkunamanqa jatunta jallp'ata qonki, pisilla kajkunamantaj juch'uyllata. Ajinata sapa ujninkuman jallp'ataqa qonki, mashkhachus yupasqa kasqankuman jina. 55Jallp'ataqa rak'inki suerteta choqaspa. Sapa ayllu jallp'ata jap'enqa tatankoj sutinman jina. 56Jallp'ata rak'enqanku suerteta choqaspa, jatun ayllupis kachun, chayrí juch'uy ayllupis kachun. 57Levitasqa sapa ujninku familiasninkuwan yupachikorqanku: Gersonpa miraynin, Coatpa miraynin, Merarijpa miraynin ima. 58Kaykuna karqanku levitaspa miraynin: Libnitas, mahlitas, musitas, coreitas ima. Amrampa tatan karqa Coat. 59Amramqa Levijpa ususin Jocabedwan casararqa. Jocabed ususenqa nacekusqa, Leví Egiptopi kashajtillanraj. Amramwan, Jocabedwan Aaronpata, Moisespatawan, Mariajpatawan tatasninku karqanku. 60Aaronpa churisnin karqanku Nadab, Abiú, Eleazar, Itamar ima. 61Nadabwan, Abiuwanqa Tata Diospa ñawpaqempi wañusqanku waj ninata jaywasqankurayku. 62Levijpa miraynenqa tukuynimpi karqanku uj killayojmanta pataman iskay chunka kinsayoj waranqa qharis. Paykunaqa mana israelitaswan khuskachu yupasqa karqanku, imaraykuchus paykunaqa jallp'ata mana jap'inankuchu karqa. 63Ajinata Moiseswan, sacerdote Eleazarwan israelitasta yuparqanku Moab pampapi, Jordán Mayu kantupi, Jericó llajta chimpapi. 64Tukuy chaykunaqa Sinaí Orqopi Moiseswan, Aaronwan mana yupachikusqankuchu. 65Chaypacha Tata Diosqa Moisesman nisqa: Kaykunaqa tukuyninku ch'in pampapi wañonqanku, nispa. Sefonej churin Calebwan, Nunpa churin Josuellawan mana wañorqankuchu.

will be added

X\