1 Jinamanta israelitasqa rillarqankupuni, jarakorqankutaj Moab pampaspi. Chayqa kashan Jericó chimpapi, Jordán Mayoj inti llojsimuynejpi. 2 Chantá Ziporpa churin Balacqa yacharqa israelitas amorreosta imatachus ruwasqankuta. 3 Jinallataj Moabmanta kajkunapis maytapuni manchachikorqanku chay israelitas may chhika kasqankumanta, junt'aykamushasqankumantataj. 4 Chantá Moabmanta kajkunaqa Madianmanta kaj kurajkunaman nerqanku: Kay chhika runasqa jallp'anchejta tukuchenqanku, imaynatachus wakas pastosta tukuchinku, ajinata, nispa. Chaypacha Moabpeqa Ziporpa churin Balac rey kasharqa. 5 Chayrayku payqa Balaamta wajyachimorqa. Chaypacha Balaamqa Petorpi kasharqa, chaytaj kashan Éufrates Mayu chimpapi. Balacqa nicherqa Balaamman: Kay runasqa Egiptomanta jamuspa, kay jallp'asman junt'aykamunku, ñawpaqeypitaj tiyaykukushanku. 6 Kunampacha usqhayta jamuy ari, kay runasta maldecinaykipaj, imaraykuchus noqamanta aswan atiyniyoj kanku. Ichapis qan maldecejtiyki, paykunata atipayman, qharqoymantaj kaymanta. Noqa yachani qampa maldecisqayki, chayrí bendecisqaykeqa ruwakusqantapuni, nispa. 7 Moabmanta, Madianmantawan kaj kuraj runasqa qolqe aparisqa rerqanku maldecisqanmanta jaywanankupaj. Ajinata Balaampaman chayaytawan, kacha runasqa willarqankupacha imatachus Balac nichisqanta. 8 Balaamtajrí paykunaman nerqa: Kunan ch'isi kayllapi puñukuychej, q'ayataj willasqaykichej imatachus Tata Dios ninawanta, nispa. Jinamanta Moabmanta kacha kuraj runasqa chaypi chay ch'isi puñorqanku. 9 Chantá Diosqa Balaamman rikhurispa, taporqa: Pikunataj, wasiykipi kashanku, chay runasri? nispa. 10 Balaam kuticherqa: Moabmanta Ziporpa churin rey Balacqa paykunata kachamuwasqa kayta willanawankupaj: 11 Egiptomanta llojsimuspa, runas kay tukuynejman junt'aykamuwanku, nispa. Chantapis nichimuwasqa, rispa chay runasta maldecimpunayta, ajinamanta paykunata atipaspa paypa jallp'anmanta qharqonampaj, nispa nerqa Balaamqa. 12 Diostajrí Balaamman nerqa: Ama riychu chay runaswan israelitasta maldecej, imaraykuchus paykunata Noqa bendecini, nispa. 13 Q'ayantintaj Balaamqa tutamanta jatarispa, Balacpa kacha runasninman nerqa: Kunanqa kutipuychej llajtaykichejman. Tata Diosqa mana munanchu qankunawan khuska rinayta, nispa. 14 Chay kacha kuraj runasqa kutipuspa, Balacman willarqanku: Balaamqa mana munarqachu noqaykuwan khuska jamuyta, nispa. 15 Chantá Balacqa ujtawan waj aswan kuraj runastañataj aswan ashkhata kacharqa, ñawpaj kachasmanta nisqaqa. 16 Paykunataj rispa, Balaamman usqhay usqhayta willamorqanku: Ziporpa churin Balac nichimusunki ari: Allinta ruwaspa, amataj qhesachawaspa jamuriwaypuni. 17 Noqaqa imatapis munasqaykita qollasqayki, imatachá mañawasqaykita ruwasaj; chayrayku allinta ruwaspa jamurillaway ari, kay runasta maldecipuway, nispa. 18 Balaamtajrí kutichillarqataj: Noqaqa manapuni riyta atiymanchu may chhika qorita, kamachinan wasipi tukuynin qolqeta qoshawajtimpis, jatunta, nitaj juch'uyta ruwajpis, Señorniy Tata Diospa kamachiwasqasninta p'akispaqa. 19 Chay tukuywampis, kunan ch'isi kaypi puñukuychej; ujtawan Tata Diosta tapurillasaj, ima niwanqachus kay kutipi, nispa. 20 Chay ch'isi Tata Diosqa Balaamman rikhurispa, nerqa: Sichus chay runas qanta wajyasoj jamusunku chayqa, sayarispa paykunawan rillay; chaywampis Noqaj nisqallayta ruwanki, nispa. 21 Balaamqa q'ayantin tutamanta jatarispa, uj china burronta caronaykukuytawan, moabitaspa kurajninkukuna kachaswan rerqa. 22 Balaamqa burrompi rerqa, iskay kamachisnintawan pusarikuspa. Tata Diosrí chay risqanmanta phiñakuspa, angelninta kachamorqa ñanmanta jark'anampaj. 23 Burronqa rikorqa Tata Diospa angelninta espadan oqharisqa ñampi sayashajta; chayrayku ñanmanta llojsispa, wajnejta rerqa. Balaamtajrí ñanman kutichiyta munaspa, burronta mayta seq'orqa. 24 Chantá Tata Diospa angelnin uva huerta ukhuta rej ñampiñataj sayaykorqa. Chay ñanqa puraj k'uchunman perqayoj karqa. 25 Burrotaj Tata Diospa angelninta rikuspa, uj lado perqaman Balaampa chakinta ñit'iykorqa. Chaymanta Balaamqa astawan burronta seq'orqa. 26 Tata Diospa angelnintaj aswan ñawpajman rispa, uj k'uchunejman sayaykorqa. Chay ñanmantaqa mana karqachu ni lloq'eman ni pañaman llojsinapaj. 27 Burroqa Tata Diospa angelninta rikuspa, chay kikimpi pampaman last'arparerqa. Chaymanta Balaamqa phiñarikuspa, burrota varawan seq'ollarqapuni. 28 Chay ratopacha Tata Diosqa burrota parlaricherqa. Balaamtataj nerqa: Imanayki noqa qantari? Kaywanqa kinsa kutitaña seq'owanki, nispa. 29 Balaamqa burronman kuticherqa: Kaypi alqochakushawanki. Sichus makiypi cuchillo kanman chayqa, kunitan wañuchiykiman, nispa. 30 Burronqa nillarqataj: Noqaqa qampa burroyki kani, qantaj sapa kuti noqapi purinki rantiwasqaykimanta kunankama. Jayk'ajpis kay jinata ruwajchu kayki? nispa. Balaamtaj kuticherqa: Mana, nispa. 31 Chantá Tata Diosqa Balaampa qhawayninman angelninta rikhuricherqa chawpi ñampi espadan oqharisqa sayashajta. Rikuspataj, payqa k'umuykukorqa pampaman umanta chayachinankama. 32 Jinapi Tata Diospa angelnenqa Balaamman nerqa: Ima nispataj burroykita kinsa kutita seq'onkiri? Noqamin kani ñawpaqeykipi sayajqa. Noqamantaqa mana allintachu qanqa rishanki. 33 Burroykeqa noqata rikuwarqa, rikuwaspataj, manchariywan kinsa kutita ñawpaqeymanta waj ladoman rin. Sichus pay waj ladoman mana ayqenman karqa chayqa, ñapis wañuwajña karqa; burrollaykita mana wañuchiymanchu karqa. 34 Tata Diospa angelninmantaj Balaamqa nerqa: Noqaqa juchallikuni. Mana yacharqanichu qan ñawpaqeypi sayaykuspa ñanmanta jark'amushawasqaykita; sichus kay rishasqay qampaj mana allin chayqa, kaymanta kutipusaj ari, nispa. 35 Tata Diospa angelninrí kuticherqa: Atillanki riyta chay runaswan jaqayman. Chaywampis chayaspaqa, noqaj nisqallayta parlanki, nispa. Ajinamanta Balaamqa Balacpa kachasninwan rillarqapuni. 36 Balacqa Balaam jamushasqanta yachaytawan, taripaj llojserqa, Arnón Mayu chimpapi Moab llajtaman; chayqa chay naciompa lindempi karqa. 37 Taripaspataj, nerqa: Chay jinatapuni qanta wajyachimuyki. Imaraykutaj qan mana kasumuwarqankichuri? Manachu qan yuyarqanki jamuwajtiyki imallatapis qanman qosunayta, jatumpajtaj qhawasunayta? nispa. 38 Balaamtajrí payman nerqa: Kayqa, kunanqa chayamuni, qan imaynachus kasqaykita rikusunaypaj; chaywampis noqa kikiymantaqa mana imatapis parlasajchu. Imatachus Dios niwanqa, chayllata nisqayki. 39 Chaymantá Balaamqa Balacwan Quiriat-huzotman rerqanku. 40 Chaypitaj Balacqa runasninta kamacherqa wakasta, ovejasta ñak'anankuta, Balaamman, jinallataj paywan jamorqanku, chay kuraj runasmampis qonampaj. 41 Q'ayantin paqarin tutamanta Balacqa Balaamta Bamot-baalman pusarqa. Chay patamanta qhawarispa, Balaamqa israelitaspa jarasninkoj muyuyninta rikorqa.
