1 Wata qallarikuy killapi israelitasqa tukuyninku Zin ch'in pampaman chayarqanku. Chantá, Cadespi jarakorqanku. Chaypeqa María wañuporqa, chay kikimpitaj p'amparqanku. 2 Chaypi mana yaku kajtin, israelitasqa tantakuspa, Moisespaj, Aaronpajwan maytapuni rimarqanku. 3 Chantá Moisesman nerqanku: Allin kanman karqa wakin israelitaswan khuska wañunayku, mayqenkunatachus Tata Dios wañuracherqa, chaykunawan khuska. 4 Qankuna, imapajtaj Tata Diospa ayllun runasta kay ch'in pampaman pusamunkichejri? Qankunaqa uywasniykuwan khuskachu kaypi wañunaykuta munankichej? 5 Imapajtaj Egiptomanta orqhomuwarqayku, kay chhika millayman pusamunawaykupaj? Kaypeqa mana imatapis tarpuyta atiykuchu; mana kanchu higo sach'as, uva sach'as, nitaj granadaspis. Yakullapis mana kaypeqa ujyanapaj tarikunchu. 6 Jinapi Moiseswan, Aaronwan paykunamanta ithirispa, Dioswan Tinkukuna Toldo punkuman rerqanku. Chaypitaj k'umuykorqanku umankuta pampaman chayachinankukama. Chantá Tata Diospa jatun kaynimpa k'anchaynin paykunaj patankuman rikhurimorqapacha. 7 Chaypi Tata Diosqa Moisesman nerqa: 8 Kunanqa tojnuykita oqharispa, qanwan, Aaronwan israelitasta tantachiychej. Jinaspataj, paykuna rikushajtinku chhankata parlapayay, yakutaj llojsimonqa. Qan qhawashajtiykitaj, chhankamanta yakoqa phullchimonqa, jinamanta paykuna, jinataj uywasninkupis yakuta ujyanankupaj. 9 Moisesqa, Tata Diospa ñawpaqempi kasharqa, chay tojnunta oqharerqa Tata Diospa nisqanman jina. 10 Chaymantataj Moiseswan, Aaronwan runasta chhanka k'uchuman tantacherqanku. Chaypi Moisesqa runasman nerqa: Uyariychej kunanqa, rimajkuna: Kay chhankamantachu ujyanaykichejpaj yakuta orqhomusqayku? nispa. 11 Chayta niytawan, Moisesqa tojnuta oqharispa, iskay kutita chhankata wajtarqa, yakutaj ashkha phullchimorqa. Ajinamanta runasqa yakuta ujyarqanku, jinallataj uywasninkupis. 12 Chaywampis Tata Diosqa Moisesmanwan, Aaronmanwan parlaspa, nerqa: Qankuna Noqapi mana creesqaykichejrayku, nitaj israelitas rikushajtinku jatunchawasqaykichejrayku, kunanqa kay runasta mana pusaykunkichejchu, ima jallp'atachus qonayta nerqani, chayman, nispa. 13 Chaymin Meriba juturi karqa, maypichus israelitas Tata Diospa contranta rimarqanku, chay. Chaypeqa Tata Dios may santo Dios kasqanta rikuchikorqa. 14 Cadesmantapacha Moisesqa kachasta kacharqa, Edommanta reyman ninankupaj: Wawqesniyki israelitas nichimusunki: Qan allinta yachanki imaschus noqaykupaj kasqanta. 15 Noqaykoj ñawpa tatasniyku Egiptoman riporqanku, chaypitaj unayta tiyakorqanku. Egipciostajrí chaypi mayta ñak'arichiwarqayku ñawpa tatasniykuta jina. 16 Jina kajtenqa, Tata Diosmanta yanapayninta mañakorqayku. Paytaj waqasqasniykuta, llakiyniykuta uyarispa, uj angelninta kachamuwarqayku; ajinata Egiptomanta orqhomuwayku. Kunanqa Cades cheqapi kashayku, jallp'aykiwan tinkuypi. 17 Kunanqa jallp'asniykinejta pasarichiwayku ari. Noqaykoqa mana chajras chawpintachu, nitaj uva sach'asniyki chawpintachu pasasqayku, nitaj yakusniykitapis ujyasqaykuchu. Noqaykoqa jatun ñanninta cheqanta risqayku mana pantaspa ni lloq'eman, nitaj pañaman jallp'asniykita pasanaykukama, nispa. 18 Edommanta reyrí paykunaman kuticherqa: Qankunaqa jallp'aynejta mana pasawajchejchu. Rikhurimojtiykichejkama, soldadosniywan llojsimusaj qankunawan maqanakoj, nispa. 19 Israelitastaj nerqanku: Noqaykoqa jatun ñanninta cheqanta pasapusqayku. Sichus noqayku, chayrí uywasniyku yakusniykichejta ujyanqanku chayqa, pagapusqayku. Noqaykoqa jallp'aykita pasayllata munayku, nispa. 20 Edommanta reytajrí paykunaman kuticherqa: Qankunaqa mana pasawajchejchu, nispa. Chaymantataj payqa israelitaswan maqanakoj llojserqa sumachaj soldadosninwan, sumaj wakichisqaswan, 21 jallp'ankunejta amapuni pasachinankupaj. Chaymanta israelitasqa waj ñanta jap'irerqanku. 22 Chay Cadesmanta tukuynin israelitas Hor nisqa orqonejman jap'irerqanku. 23 Edom jallp'a kantupi kashajtinku, Tata Diosqa Moisesmanwan, Aaronmanwan nerqa: 24 Aaronqa wañuponqa, manataj yaykonqachu, ima jallp'atachus israelitasman qonayta nerqani, chayman, imaraykuchus qankunaqa kamachisqasniyta mana kasuwarqankichejchu, Meriba nisqa juturi yaku kantupi kashaspa. 25 Qan, Moisés, Aaronta churin Eleazartawan Hor nisqa orqoman pusay. 26 Chaypi Aaronmanta sacerdote p'achasninta lluch'uspa, chayta Eleazarman p'achallichiy. Aarontaj chaypi wañuponqa, nispa. 27 Moisesqa chayta ruwarqa, Tata Dios payman kamachisqanman jina. Tukuy israelitaspa qhawanantataj Hor nisqa orqoman wicharerqanku. 28 Chaypi Moisesqa Aaronmanta sacerdote p'achanta lluch'uspa, churin Eleazarllamantaj churaykorqa. Chay Hor nisqa orqopi Aaronqa wañuporqa. Moiseswan Eleazerwantaj chay orqomanta urayk'aporqanku. 29 Israelitasqa Aarón wañupusqanta yachaspa, maytapuni waqarqanku kinsa chunka p'unchaykunata.
