1 Tata Diosqa Moisesman Aaronmanwan parlaspa, nerqa: 2 Israelitasqa Dioswan Tinkukuna Toldoj muyuyninman jarakonqanku sapa ayllu wiphalankuwan, jinallataj sapa familiapis. 3 Inti llojsimuynejman jarakonqanku Judá ayllumanta wañuchinaku maqanakuman riyta atejkuna wiphalankuwan. Paykunata kamachenqa Aminadabpa churin Naasón. 4 Yupasqaman jina chaykunaqa qanchis chunka tawayoj waranqa, sojta pachajniyoj qharis kanku. 5 Paykunaj ladonkupi Isacar ayllu jarakonqa. Paykunatataj kamachenqa Zuarpa churin Natanael. 6 Yupasqaman jina chaykunaqa phishqa chunka tawayoj waranqa, tawa pachajniyoj qharis kanku. 7 Paykunaj ladonkupi Zabulón ayllu jarakonqa. Chaykunatataj kamachenqa Helonpa churin Eliab. 8 Yupasqaman jina paykunaqa phishqa chunka qanchisniyoj waranqa, tawa pachajniyoj qharis kanku. 9 Chay jinamanta Judajpa jarampi kajkunaqa tukuyninkupi pachaj pusaj chunka sojtayoj waranqa, tawa pachajniyoj qharis kanqanku. Paykunaqa ñawpajta renqanku. 10 Uray ladoman jarakonqanku Rubén ayllumanta wañuchinaku maqanakuman riyta atejkuna wiphalankuwan. Paykunataqa kamachenqa Sedeurpa churin Elisur. 11 Chaykunaqa yupasqaman jina tawa chunka sojtayoj waranqa, phishqa pachajniyoj qharis kanku. 12 Paykunaj ladonkupi Simeón ayllu jarakonqa. Paykunata kamachenqa Zurisadaijpa churin Selumiel. 13 Paykunaqa yupasqaman jina phishqa chunka jisq'onniyoj waranqa, kinsa pachajniyoj qharis kanku. 14 Paykunaj ladonkupi jarakullanqataj Gad ayllu. Paykunatataj kamachenqa Reuelpa churin Eliasaf. 15 Paykunaqa yupasqaman jina tawa chunka phishqayoj waranqa, sojta pachaj phishqa chunkayoj qharis kanku. 16 Chay jinamanta Rubenpa jarampi kajkunaqa tukuyninkupi pachaj phishqa chunka ujniyoj waranqa, tawa pachaj phishqa chunkayoj qharis kanku. Paykunaqa ñawpaj kaj t'aqaj qhepanta renqanku. 17 Paykunaj qhepankuta levitasqa Dioswan Tinkukuna Toldota oqharispa purirenqanku, chay tawa jaraspa chawpinta. Chay tawa t'aqasqa purirenqanku qhepan qhepanta, imaynatachus jarakusqankuman jina, wiphalankuman jinataj. 18 Inti yaykuy ladonejpi jarakonqa Efraín ayllumanta wañuchinaku maqanakuman riyta atejkuna wiphalankuwan. Paykunataqa kamachenqa Amiudpa churin Elisama. 19 Paykunaqa yupasqaman jina tawa chunka waranqa, phishqa pachajniyoj qharis kanku. 20 Paykunaj ladonkupi Manasés ayllu jarakonqa. Paykunata kamachenqa Pedasurpa churin Gamaliel. 21 Paykunaqa yupasqaman jina kinsa chunka iskayniyoj waranqa, iskay pachajniyoj qharis kanku. 22 Chaykunaj ladonkupi Benjamín ayllu jarakonqa. Paykunatataj kamachenqa Gedeonijpa churin Abidán. 23 Paykunaqa yupasqaman jina kinsa chunka phishqayoj waranqa, tawa pachajniyoj qharis kanku. 24 Chay jinamanta Efraínpa jarampi kajkunaqa tukuyninkupi pachaj pusajniyoj waranqa, pachajniyoj qharis kanku. Paykunaqa iskay kaj t'aqaj qhepanta renqanku. 25 Pata ladonejpitaj jarakonqanku Dan ayllumanta wañuchinaku maqanakuman riyta atejkuna wiphalankuwan. Paykunatataj kamachenqa Amisadaijpa churin Ahiezer. 26 Paykunaqa yupasqaman jina sojta chunka iskayniyoj waranqa, qanchis pachajniyoj qharis kanku. 27 Chaykunaj ladonkupi Aser ayllu jarakonqa. Paykunatataj kamachenqa Ocranpa churin Pagiel. 28 Paykunaqa yupasqaman jina tawa chunka ujniyoj waranqa, phishqa pachajniyoj qharis kanku. 29 Paykunaj ladonkupi Neftalí ayllu jarakullanqataj. Chaykunatataj kamachenqa Enanpa churin Ahira. 30 Paykunaqa yupasqaman jina phishqa chunka kinsayoj waranqa, tawa pachajniyoj qharis kanku. 31 Chay jinamanta Danpa jarampi kajkunaqa tukuyninkupi pachaj phishqa chunka qanchisniyoj waranqa, sojta pachajniyoj qharis kanku. Paykuna wiphalankuta oqharikuspa, kinsa kaj t'aqaj qhepanta renqanku. 32 Israelita familias ukhupi, wañuchinaku maqanakuspaj yupasqa kajkunaqa tukuyninkupi kasqanku sojta pachaj kinsa waranqa, phishqa pachaj phishqa chunkayoj qharis. 33 Tata Diosqa Moisesman kamachisqanman jinataj, levitas mana yupasqachu karqanku. 34 Chay tukuyta israelitas ruwarqanku imaynatachus Moisesman Tata Dios kamachisqanman jina. Sapa ayllu jarakorqanku, maypichus wiphalasninku kasharqa, chayman, purirerqankutaj sapa uj familia tatasninkoj sutisninman jina.
