NÚMEROS 19

1Tata Diosqa Moisesmanwan, Aaronmanwan parlaspa, nerqa: 2Noqa Tata Diosqa kayta kamachini: Niy israelitasman uj puka wakata apamunankuta, sumajnin kajta, mana iman imanasqata, manaraj umanman yugo chayajta. 3Chayta qankuna sacerdote Eleazarman qonkichej. Paytaj jaramanta jawaman aysaytawan, qhawashaspalla ñak'achenqa. 4Chantá sacerdote Eleazarqa maki dedonwan chay wakaj yawarninman chhapurispa, Dioswan Tinkukuna Toldoj ñawpaqenta qanchis kutita ch'ajchonqa. 5Sacerdote qhawashajtintaj, chay wakaj imasninta ninapi ruphachenqanku: Aychanta, qaranta, yawarninta, wanunta ima. 6Chantá, sacerdoteqa oqharenqa cedro k'aspita, uj hisopo qhoritata, puka thantatawan, chaytataj maypichus waka ruphashan, chay ninaman choqaykonqa. 7Chantá sacerdoteqa llimphuta p'achasninta yakuwan t'ajsakonqa, tukuy cuerpontapis mayllakonqa; chaymantaraj jaramanqa yaykonqa. Chaywampis ch'isiyaykuykamaraj ch'ichipaj qhawasqa kanqa. 8Chay wakata ruphachej runapis kikillantataj p'achasninta yakuwan t'ajsakonqa, jinallataj tukuy cuerpontapis mayllakonqa. Paypis kikillantataj ch'isiyaykuykama ch'ichipaj qhawasqa kanqa. 9Chantá waj runa, llimphupaj qhawasqa kajqa chay ruphasqa wakaj ushphanta oqharispa, churanqa uj llimphu cheqaman, jaramanta jawapi. Chay ushphamantataj israelitasqa ruwanqanku llimphuchakuy yakuta; chayqa juchaj cuentanmanta jaywana. 10Waka ruphasqa ushphata oqharej runaqa p'achasninta yakuwan t'ajsakonqa; chaywampis ch'isiyaykuykamaraj ch'ichipaj qhawasqa kanqa. Kay kamachisqaqa wiñaypaj churasqa kanqa qankunapaj, jinallataj qankuna ukhupi tiyakoj forasterospajpis. 11Pillapis ima ayatapis llankhajqa qanchis p'unchayta ch'ichipaj qhawasqa kanqa. 12Kinsa kaj p'unchaypi, qanchis kaj p'unchaypiwan mayllakonqa chay llimphuchakuy yakuwan; jinamanta chay runaqa llimphupaj qhawasqa kanqa. Sichus mana llimphuchakonqa kinsa kaj p'unchaypi, nitaj qanchis kaj p'unchaypipis chayqa, mana llimphupaj qhawasqa kanqa. 13Sichus pi runapis ima ayata llankhaspa, mana llimphuchakun chayqa, Dioswan Tinkukuna Toldota ch'ichichan. Chayrayku chay runaqa israelitas ukhumanta chinkachisqa kanqa. Paypa patanman mana llimphuchakuy yakuwan ch'ajchusqa kasqanrayku payqa ch'ichipaj qhawasqa kanqa. 14Uj toldo ukhupi wañojmantaqa kayta kamachini: Pillapis chay ukhupi tiyakojqa, chayman yaykoj imaqa qanchis p'unchayta ch'ichipaj qhawasqa kanqanku. 15Chay toldo ukhupi mana allin kirpasqa kaj imaspis ch'ichipaj qhawasqa kanqa. 16Pillapis jaramanta jawapi runa wañusqata, pejpa wañuchisqanta, chayrí runa tulluta, chayrí aya p'ampanatapis llankhajqa qanchis p'unchayta ch'ichipaj qhawasqa kanqa. 17Ch'ichipaj qhawasqa kajpaj, juchaj cuentanmanta ruphachisqa wakaj ushphanta wich'ipi juturi yakuman chhapuchunku. 18Chaymantaqa llimphupaj qhawasqa kaj runa chay yakuman hisopo qhorawan chhapuspa, ch'ajchumuchun toldota, chay ukhupi imaschus kajta, chaypi kaj runastawan, jinallataj pichus aya tullusta, runa wañuchisqata, chayrí runa wañusqata, chayrí aya p'ampanata llankhajta. 19Chaytaqa ch'ajchumonqa pichus llimphupaj qhawasqa kajlla, ujta kinsa kaj p'unchaypi, ujtataj qanchis kaj p'unchaypiwan. Chay qanchis kaj p'unchaypi ch'ajchuchikoj runa kutimuspa, p'achasninta t'ajsakonqa, jinallataj cuerpontapis pay kikin mayllakonqa; jinapis ch'isiyaykuykamaraj ch'ichipaj qhawasqa kanqa. 20Sichus pipis ajina mana ch'isimpaj llimphuchakonqa chayqa, ayllusnin ukhumanta chinkachisqa kanqa, Dioswan Tinkukuna Toldota ch'ichichasqanmanta. Chay llimphuchakuy yakuwan mana ch'ajchuchikusqanrayku, payqa ch'ichipaj qhawasqa kanqa. 21Kay kamachisqaqa wiñaypaj churasqa kanqa. Pichus llimphuchakuy yakuwan wajta ch'ajchojqa p'achasninta t'ajsakunan tiyan. Jinallataj chay yakuta llankhajpis ch'isiyanankama ch'ichipaj qhawasqa kanqa. 22Ch'ichipaj qhawasqa runaj llankhasqasnenqa ch'ichipaj qhawasqallataj kanqa. Pichus chay llankhasqasta llankhajpis ch'isiyaykuykama ch'ichipaj qhawasqallataj kanqa.

will be added

X\