1 Uj levita karqa, Coatpa mirayninmanta, Izharpa churin Coré. Paywan karqanku Rubén ayllumanta kinsa runas; Eliabpa churisnin, Datanwan, Abiramwan, Peletpa churin Onwan ima. 2 Paykunaqa Moisespa contranta oqharikorqanku. Paykunawan khuska iskay pachaj phishqa chunkayoj israelitas oqharikullarqankutaj, sapa t'aqapi chay kamachejkuna. Paykunataj sumajpaj qhawasqa runas karqanku. 3 Tukuyninku tantaykukuytawan, Moisesman Aaronmanwan nerqanku: Kaykamalla qankunaqa kamachiwasqayku. Tukuynin israelitas Diosman k'umuykukunku, Diospaj t'aqasqa kanku; Tata Diospis tukuyninkuwan kashan. Imaraykutaj qankuna Tata Diospa wawasninta kamachiyta munankichejri? nispa. 4 Chayta uyarispa, Moisesqa k'umuykukorqa pampaman umanta chayachinankama. 5 Chaymantataj Coreman, pischus paywan kasharqanku, chaykunamanwan nerqa: Q'aya tutamanta Tata Diosqa willawasun pischus Paypata kasqankuta, pikunatajchus Diospaj t'aqasqa kasqankuta. Pikunatachus Tata Dios ajllan, chaykunallata saqenqa Payman qayllaykunankuta. 6 Qankunaqa kayta ruwaychej: Apamuychej incienso q'oshñichinasniykichejta. 7 Q'ayaqa chayman nina brasasta churaspa, inciensota q'oshñichiychej, chaytataj Tata Diospa ñawpaqenman jaywamuychej. Pitachus Tata Dios ajllan, chaymin Paypaj t'aqasqa kanqa. Kaykamallaña qankunawanqa, levitas. 8 Chaymantá Moisesqa Coreman nillarqataj: Uyariwaychej, levitas: 9 Qankunapajqa pisichu israelitaspa Diosninku, israelitas ukhumanta qankunata ajllasusqaykichej, Diospa qayllampi kanaykichejpajqa, Tata Diospaj imaschus ruwana kajta ruwanaykichejpaj Dioswan Tinkukuna Toldopi, ajinamanta israelitasta sirvinaykichejpaj? 10 Tata Diosqa munarqa qan, chantá aylluykimanta qhatisojkuna levitas Paypa qayllampi kanaykichejta. Kunanqa qankuna sacerdote jina imatapis ruwayta munankichej. 11 Pitaj Aaronqa paypa contranta parlanaykichejpaj? Qanqa yanapajniykikunawan Tata Diospa contrantamari oqharikushankichej. 12 Chantá Moisesqa wajyachimorqa Eliabpa churisnin Datanta, Abiramtawan; paykunatajrí Moisesman nerqanku: Mana munaykuchu riyta. 13 Qampajqa pisichu, lechewan misk'iwan purej jallp'amanta orqhomuwasqaykoqa, kay ch'in pampapi wañuchinawaykupaj, chantapis noqaykuta kayman jaqayman munasqaykita pusaykachanawaykupajqa? 14 Qanqa ni mayman pusawaykuchu, maypichus lechewan misk'iwan purishan, chayman, ni jallp'asta, nitaj uva huertasta qowaykuchu. Qanqa tukuyniyku ciegos jina pusachikunallaykutachu munanki? Chayqa mana jinachu kanqa. Mana risqaykuchu uyaykita qhawaj, nispa. 15 Chantá Moisesqa maytapuni phiñarikorqa, Tata Diosmantaj nerqa: Tata Dios, ama ofrendasninkuta jap'iychu. Noqaqa paykunamanta mana uj burrollankutapis qhechunichu, nitaj ima sajratapis ruwanichu ni mayqenninkuta, nispa. 16 Chaymanta Moisesqa Coreman nillarqataj: Q'aya tutamanta qan, chantá qanwan kajkunawan Tata Diosman qayllamuychej. Aaronpis chaypi kanqa. 17 Sapa uj apakuchunku incienso q'oshñichinankuta, q'oshñichichunkutaj. Jinallataj qan, chantá Aaronpis incienso q'oshñichinasniykichejta apakuychej. Tata Diosman qayllamuychej iskay pachaj phishqa chunkayoj runas pusarisqa, nispa. 18 Chaymantaqa sapa ujninku incienso q'oshñichinasninkuman ninata churaytawan, inciensota q'oshñicherqanku Dioswan Tinkukuna Toldo punkupi, jinallatataj Moiseswan, Aaronwampis ruwarqanku. 19 Chaypaj Coreqa tukuy paywan kajkunawan ñapis tantasqaña kasharqanku Dioswan Tinkukuna Toldo punkupi, Moisespa contrampi Aaronpapiwan. Jinallapi Tata Diospa jatun kaynimpa k'anchaynin rikhurimorqa, tukuy israelitaspa ñawpaqenkupi. 20 Moisesman, Aaronmanwan Tata Diosqa nerqa: 21 Qankuna kay runaspa chawpinkumanta t'aqakuychej. Kay runastaqa uj ñawi ch'irmiypi chinkarparichisaj, nispa. 22 Moiseswan Aaronwantaj chayta uyarispa, pampaman umankuta chayachinankukama k'umuykukorqanku, nerqankutaj: Diosniyku, tukuy runasman kawsayta qoj, kay tukuy runaspa contrankutachu phiñakunki uj runaj juchanrayku? nispa. 23 Tata Diostaj Moisesman nerqa: 24 Israelitasman niy usqhayta t'aqakunankuta Corejpa, Datanpa, Abirampa toldosninkumanta, nispa. 25 Jinapi Moisesqa sayarispa, israelitaspa kurajninkunawan Datanman, Abirammanwan qayllaykorqa. 26 Runasmantaj nerqa: Kay sajra runaspa jarasninkumanta t'aqakuychej, amataj imasninkutapis llankhankichejchu, ama qankunapis paykunaj juchankurayku wañunaykichejpaj, nispa. 27 Chayta nejtinkama, israelitasqa Coremanta, Datanmanta, Abirammantawan t'aqakorqanku. Datanwan Abiramwanqa toldosninku punkupi warmisninkuwan, wawasninkuwan ima kasharqanku. 28 Moisesqa nillarqapuni: Kunanqa kay imaspi qankunaqa yachankichej Tata Diosqa noqata kachamuwasqanta, manataj imatapis sapallaymanta ruwasqayta: 29 Sichus kay runas, imaynatachus runas wañunku, jinallata wañonqanku chayqa, chaypi yachakonqa Tata Diosqa noqata mana kachamuwasqan. 30 Sichus Tata Diosqa uj mosoj imata ruwajtin, jallp'a siminta kicharispa, oqoykonqa tukuy imasninkutawan khuska kay runasta, kawsashajtaj wañuy ukhu pachaman urayk'onqanku chayrí, chaypi qankunaqa yachankichej kay runasqa Tata Diosta qhesachasqankuta. 31 Moisés parlayta tukusqantawan, chay runaspa chakinku uramanta ujllata jallp'a kicharikorqa. 32 Jinamanta jallp'aqa tukuyninkuta oqoykorqa, Corewan sayaj runasta, tukuy familiasnintinta, imasninkuchus karqa, chaytawan khuska. 33 Paykunaqa kawsashajlla ukhu pachaman chinkaykorqanku tukuy imasninkuwan khuska, jallp'ataj wisq'aykukorqa. Ajinamanta paykunaqa israelitaspa chawpinmanta chinkariporqanku. 34 Chayta rikuspa, chay qayllapi muyurisqa sayashaj israelitas qhaparispa, ayqekorqanku: Ama noqanchejtawan jallp'a oqoykuwasunchejchu ari, nispa. 35 Chantapis Tata Diosqa ninata apachimorqa; pikunachus Dioswan Tinkukuna Toldopi inciensota jaywasharqanku, chaykunata iskay pachaj phishqa chunkayoj runasta ruphaykuspa, wañurparicherqa. 36 Chaymantataj Tata Diosqa Moisesman nerqa: 37 Aaronpa churin Eleazarta kamachiy: Incienso q'oshñichinasta orqhochun, chay ruphasqa runas chawpimanta, chaypi kaj nina k'ajaj brasastataj karuman choqachun; chay q'oshñichinasqa Tata Diospaj t'aqasqa kachun. 38 Ñawpaqeypi inciensota jaywasqankurayku chay q'oshñichinasqa Noqapaj t'aqasqa kanku. Juchallikusqankurayku wañuchisqa karqanku, chay q'oshñichinasninkutapis unuyachispa, sillp'a latas jina ruwasqa kachunku, altarta qhatanapaj; ajinamanta israelitas chay runas juchallikusqankumanta yuyarikonqanku. 39 Chantá sacerdote Eleazarqa broncemanta ruwasqa incienso q'oshñichinasta oqharerqa. Ujllaman unuyarpachispataj, altarta qhatanapaj latasta ruwarqa. 40 Chay karqa uj señal israelitas yuyarikunankupaj, yachanankupajtaj ama pipis Tata Diosman inciensota jaywanallankupaj, manachayqa Aaronpa familianmanta kajlla jaywanampaj, ama Corewan jina imapis kanampaj, nitaj paywan sayarqanku chaykuna jinapis, Tata Diosqa Moisesman kamachisqanman jina. 41 Q'ayantenqa tukuynin israelitas Moisespaj, Aaronpajwan rimayta qallarerqanku: Qankunaqa Tata Diospa ayllunta wañurachishankichej, nispa. 42 Israelitas tantaykakamuspa paykunata muyuykushajtinku, Moiseswan, Aaronwan thaskirerqanku Dioswan Tinkukuna Toldoman. Chay ratopachataj Dioswan Tinkukuna Toldota phuyu p'ampaykorqa, Tata Diospa jatun kaynintaj rikhurimorqapacha. 43 Moiseswan, Aaronwan rerqanku Dioswan Tinkukuna Toldoj ñawpaqenman. 44 Chaypitaj Tata Diosqa Moisesman nerqa: 45 T'aqakuychej chay runaspa chawpinkumanta; uj ñawi ch'irmiypi paykunata chinkarparichisaj, nispa. Chayta nejtinkamataj, paykunaqa k'umuykukorqanku pampaman umankuta chayachinankukama. 46 Chantá, Moisesqa Aaronman nerqa: Incienso q'oshñichinaykita apamuspa, churay altarpi kashan, chay ninata, patanmantaj inciensota jich'aykuy. Chayta oqhariykukuspataj, runaspa ñawpaqenkuman usqhayta riy; Diosmanta perdonta mañampuy, imaraykuchus ñapis Tata Diospa k'ajaj phiñakuynenqa llojsimunña; wañuchej onqoyqa qallarikunña, nispa. 47 Aaronqa incienso q'oshñichinanta oqhariykukuytawan, usqhayta rerqa Moisespa kamachisqanman jina, maypichus runas tantasqas kasharqanku, chayman. Chaypajqa wañuchej onqoyqa qallarikorqaña runas ukhupi Diospa nisqanman jina. Chantá Aaronqa inciensota q'oshñichispa, Diosmanta perdonta runaspaj mañaporqa. 48 Chaymantataj Aaronqa wañusqaspa kawsashajkunajpa chawpinkupi sayaykorqa, wañuchej onqoytaj kikimpi sayarqa. 49 Chaykamaqa chunka tawayoj waranqa qanchis pachajniyoj runasña wañorqanku. Corewan khuska wañojkunaqa wajlla karqa. 50 Chay wañuchej onqoy jinapi sayajtintaj, Aaronqa Dioswan Tinkukuna Toldo yaykuyman rerqa, Moisés kasharqa, chayman.
