1 Chay imasta uyariytawan, israelitasqa chay tutantin mayta qhaparerqanku, waqarqankutaj. 2 Jinamanta tukuyninku Moisespaj, Aaronpajwan rimayta qallarerqanku: Allin kanman karqa Egiptopi wañunanchej, chayrí ch'impi wañunanchejpis. 3 Imapajtaj Tata Diosqa kayman pusamuwarqanchejri? Wañuchinaku maqanakupi wañunanchejpajchu? Warmisninchej, wawasninchej ima enemigosninchejpa makisninkuman presos urmanankupajchu? Chaypajqa allin kanman Egiptoman kutipunanchej, nispa. 4 Jina kajtenqa, tukuyninku willanakorqanku: Uj kuraj runata ajllanachej; Egiptoman kutipuna, nispa. 5 Jinallapi Moiseswan Aaronwan tukuy israelitaspa ñawpaqempi k'umuykukorqanku pampaman umankuta chayachispa. 6 Nunpa churin Josuewan, Jefonej churin Calebwantaj, pikunachus jallp'ata qhawaj risqanku chaykuna, p'achasninkuta llik'ikorqanku. 7 Tukuynin israelitasmantaj nerqanku: Qhawamorqayku, chay jallp'aqa may sumajpuni. 8 Sichus Tata Dios munakuwanchej chayqa, Pay yanapawasun chay jallp'aman chayayta, qowasumpachataj. Chay jallp'apeqa lechewan misk'iwan yaku jina purishan. 9 Chayrayku ama Tata Diospa contranta oqharikuychejchu, amataj manchachikuychejchu chay jallp'api kaj runasmanta. Paykunataqa t'antatapis mikhushasunman jina atipasun. Paykunamanta jark'akojqa mana pipis kanchu, noqanchejwanrí Tata Dios kashan. Chayrayku ama manchachikuychejchu, nispa. 10 Chayta uyarispa, runasqa paykunata rumiswan ch'anqaykuyta munarqanku. Jina kajtintaj, Dioswan Tinkukuna Toldopi Tata Diospa jatun kaynimpa k'anchaynin rikhurerqa tukuy israelitaspa rikunankuta. 11 Chantá Tata Diosqa Moisesman nerqa: Mayk'ajkamataj kay runasqa Noqata qhesachawanqankuri? Mayk'ajkamataj mana creewanqankuchu, paykunaj chawpinkupi rikushajtinku milagrosta ruwashajtiypisri? 12 Noqa paykunaman apachimusaj uj wañuchej onqoyta. Chayqa mana saqenqachu chay jallp'aman tiyaj yaykunankuta. Chantá qanmanta aswan jatun aylluta ruwasaj, paykunamanta aswan atiyniyojta. 13 Moisestajrí Tata Diosman nerqa: Tata Dios, Qan atiyniykiwan kay israelitasta Egiptomanta orqhomorqanki. 14 Maypachachus egipcios yachanqanku ajinata kay runasta ruwasqaykita chaypacha, chaytaqa Canaanpi tiyakojkunaman willanqanku. Paykunapis yachanku Tata Dios, Qan paykunaj chawpinkupi kasqaykita, Qan paykunawan uyapura rikuchikusqaykita, phuyuykipis paykunaj patankupi kashasqanta ima. P'unchayqa israelitaspa patankuta phuyuykipi rinki, tutantaj nina k'anchay ukhupi paykunata pusanki. 15 Chantá sichus ujllapi kay runasta wañurachinki chayqa, Qan mentasqa kasqaykita uyarej runasqa nenqankuchá ari: 16 Tata Diosqa pusasqan runasta, juraspa qonanta nerqa, chay jallp'aman mana chayachiyta atisqanrayku, ch'in jallp'aspi paykunata wañurachin, nispa. 17 Chayrayku kunanqa, Señor, jatun atiyniykita rikuchiy ari, nisqaykiman jina. 18 Qanqa nerqanki imamantapis mana usqhayta phiñakusqaykita, munakuyniykeqa may jatun kasqanta, ima sajra juchamantapis perdonasqaykita, jinallataj Qampa contraykipi oqharikojtapis. Nillarqankitaj juchayojtapis mana llimphupaj qhawasqaykita, manachayqa tataspa juchasninkuta castigasqaykita, wawasninkupi, allchhisninkupi, allchhisninkoj wawasninkupi, allchhisninkoj allchhisninkupi ima. 19 Kunanqa Tata Dios, Qampata tiyan jatun munakuyniyki. Chayrayku kay runastaqa juchasninkumanta perdonallay ari, imaynatachus Egiptomanta kaykama may pacienciaykiwan pusamunkiñaqa, ajinata, nispa mañaporqa Moisesqa. 20 Chantá Tata Diosqa Moisesman kuticherqa: Paykunata perdonaniña, chay niwasqaykiman jina. 21 Chay tukuywampis, cheqamanta kawsayniyrayku jurani, jinallataj kay pacha jatun kayniywan junt'a kananrayku: 22 Egiptopi, kay ch'in pampaspipis ashkha milagro ruwasqasniytapis rikorqanku; ch'in pampaspi chunka kutitaña pruebaman churawaspa, Noqaj contrayta oqharikorqanku, nitaj kamachisqasniyta kasuyta munankuchu. 23 Chayrayku paykunamantaqa ni mayqenninku yaykonqankuchu, tatasninkuman qonayta nerqani, chay jallp'aman. Nitaj ni mayqen Noqata qhesachawajkunapis chay jallp'ata rikonqankuchu. 24 Manachayqa kamachiy Caleblla yaykonqa, waj laya sonqowan kamachisqasniyta allinta kasusqanrayku. Chayrayku chay jallp'ata payman rikuchisaj, miraynimpis chay jallp'ata jap'ikaponqanku. 25 Kunanqa valle jallp'aspi amalecitaswan cananeoswan tiyashanku. Chayrayku qankuna q'ayapacha kutiriychej ch'in pampanta, Puka Qocha sutiyoj jatun qocha cheqanejta, nispa. 26 Tata Diosqa Moisesman, Aaronmanwan parlaspa, nillarqataj: 27 Mayk'ajkamataj uyarisaj kay sajra israelita runaspa thutusqankutari? Paykuna Noqaj contrayta rimanku. 28 Paykunaman niychej: Noqaqa kawsaj Tata Dios kawsayniyrayku jurani: Qankuna imatachus nisqaykichejta uyarisqayman jina ruwasaj. 29 Tukuy qankunamanta iskay chunka watayojmanta pataman yupasqa kajkunaqa, Noqaj contrayta parlajkunaqa kay ch'in pampapi wañunkichej, ayasniykichejtaj chaypi wijch'urayanqanku. 30 Makiyta oqharispa qonayta nerqani, chay jallp'amanqa mana yaykunkichejchu. Chaymanqa Jefonej churin Calebwan, Nunpa churin Josuellawan yaykonqanku. 31 Juch'uy wawasniykichej enemigosniykichejpa makinman urmanankuta nerqankichej, chaykunallata chayachisaj qankunaj qhesachasqaykichej jallp'aman; paykunamin chaypi tiyakonqanku. 32 Qankunaj ayasniykichej kay ch'in pampaspi wijch'usqa kanqanku. 33 Chaykamataj wawasniykichejqa tawa chunka watasta michejkunamanta kay ch'in pampaspi puriykachanqanku. Ajinamanta paykuna ñak'arenqanku qankuna juchachakusqaykichejrayku, tukuyniykichej kay ch'in pampapi tukukunaykichejkama. 34 Qankunaqa Canaán jallp'ata qhawamorqankichej tawa chunka p'unchaykunapi; ajinallatataj tawa chunka watasta castigasqa kankichej sapa p'unchaymanta uj watata. Ajinamanta qankunaqa yachankichej imaynatachus contrayta rimana kasqanta. 35 Noqa Tata Dios nini: Ajinata Noqa yachachisaj sajra israelitasta contrayta rimajkunata. Paykunaqa kay ch'impi tukukonqanku, chaypitaj wañuranqanku, nispa. 36 Pikunatachus Moisés kacharqa jallp'ata qhawajta, chaykunaqa sajrata willasqankurayku israelitasta rimacherqanku Diospa contranta. Jinamanta israelitaswan qhesachacherqanku chay jallp'ata. Chayrayku Tata Diospa ñawpaqempi wañuchej onqoywan wañorqanku. 38 Chay qhawamojkunamanta Jefonej churin Calebwan, Nunpa churin Josuellawan kawsashaj qhepakorqanku. 39 Moisés chayta israelitasman willajtin, tukuyninku maytapuni llakikorqanku. 40 Q'ayantin israelitasqa tutamanta jatarispa, aswan alto kaj orqoman wicharerqanku. Nerqankutaj: Kunanqa Tata Diospa qowasqanchej jallp'aman risunchej. Cheqamanta Diospa contranta juchallerqanchej, nispa. 41 Moisestajrí paykunaman nerqa: Imaraykutaj qankuna Tata Diospa kamachisqasninta p'akinkichejri? Kunan, imatachus ruwayta yuyashankichej, chaypipis mana allinchu risonqachej. 42 Ama chay orqoman wichariychejchu; Tata Diosqa manamin qankunawanchu kashan, enemigosniykichejtaj atipasonqachej. 43 Amalecitaswan, cananeoswan suyaykushasunkichej qankunawan maqanakunankupaj, paykunataj wañuchisonqachej. Tata Diosta qhatiyta qhesachasqaykichejrayku Payqa manaña qankunawanchu kashan, nispa. 44 Chay jinata Moisés nishajtimpis, israelitasqa aswan alto kaj orqoman wicharillarqankupuni. Chaypajtaj Diospa leyninwan kaj arcapis jaramanta mana kuyurillarqapischu, nitaj Moisespis paykunawanchu rerqa. 45 Chantá chay orqo kinraykunapi tiyakojkuna amalecitas, cananeos imaqa israelitaswan maqanakoj llojsimorqanku. Israelitasta atipaspataj, paykunata Hormakama qhatiykorqanku.
