NÚMEROS 13

1Tata Diosqa Moisesman parlaspa, nerqa: 2Israelitasman qosaj, chay Canaán jallp'ata qhawamunankupaj qharista kachay, sapa ayllumanta ujtakama, pikunachus ajllasqa kanku kamachinankupaj, chaykunata. 3Israelitasmanta kuraj kajkunata Tata Diospa kamachisqanman jina Moisesqa Parán ch'inmanta kacharqa. 4Kaykuna karqanku: Rubén ayllumanta Zacurpa churin Samúa; 5Simeón ayllumanta Horijpa churin Safat; 6Judá ayllumanta Jefonejpa churin Caleb; 7Isacar ayllumanta Josejpa churin Igal; 8Efraín ayllumanta Nunpa churin Oseas; 9Benjamín ayllumanta Rafujpa churin Palti; 10Zabulón ayllumanta Sodijpa churin Gadiel; 11José ayllumanta, chaytaj Manasés aylloqa, Susijpa churin Gadi; 12Dan ayllumanta Gemalijpa churin Amiel; 13Aser ayllumanta Micaelpa churin Setur; 14Neftalí ayllumanta Vapsijpa churin Nahbi; 15Gad ayllumanta Maquijpa churin Geuel. 16Chay runasta Moisesqa Canaán jallp'ata qhawamunankupaj kacharqa. Nunpa churin Oseasta suticharqa Josué sutiwan. 17Moisesqa chay runasta Canaán jallp'ata qhawamunankupaj kachashaspa, nerqa: Neguevnejta rispa, orqoman wicharinkichej. 18Chaymanta qhawankichej imaynachus chay jallp'as kasqanta, chaypi tiyakoj runas atiyniyojchus kanku manachus, chayta; ashkhaschus, chayrí pisillachus kanku, chaytawan. 19Chantá qhawallankichejtaj llajtasninkupis perqaswan muyurisqachus, chayrí jarasllachus kanku, chayta; chay jallp'asninkupis sumajchus manachus, chaytawan. 20Qhawallankichejtaj jallp'asninkupis poqoyniyojchus manachus, chayta, sach'asninkupis kanchus manachus, chaytawan. Ama manchachikuychejchu; chay jallp'aspi imaschus poqon, chaymantapis uj chhikata apamuychej, nispa nerqa Moisesqa. Kay karqa uvas ñawpaj kaj poqoy qallarishajtin. 21Chay runasqa rerqanku chay jallp'asta qhawaj Zin nisqa ch'in pampanejta, ura jallp'asnejta, chantá wichaynejta Rehobkama, Hamat nisqa qayllakama. 22Chaymanta rerqanku Neguevnejta Hebronman chayanankukama, maypichus tiyarqanku Ahimán, Sesaí, Talmai ima, chayman; paykunaqa karqanku Anacpa miraynin. Hebronqa ruwasqa kasqa Egiptopi Zoanmanta qanchis watas ñawpajta. 23Chaymanta rispa, chayarqanku Escol vallekama, chaypitaj k'utorqanku uj uva sach'aj ramanta, uvas chhullchuyojta. Chaytataj k'aspiman warkhuykuspa, iskay ukhu wantuspa aparqanku. Chaymanta apallarqankutaj granadasta, higostawan. 24Chay cheqaqa Escol Valle sutichasqa karqa, israelitas uva sach'aj ramanta chhullchuntillanta k'utusqankurayku. 25Chay rejkuna israelitasqa tawa chunka p'unchaykunamanta chay jallp'ata qhawamusqankumanta kutimorqanku 26Cadespi Parán ch'in pampaman. Chaypi Moiseswan, Aaronwan, tukuy israelitaswan suyasharqanku. Chantá paykunaman willarqanku imastachus rikusqankuta, rikucherqankutaj chay jallp'api poqojta. 27Moisesmantaj nerqanku: Noqaykoqa maymanchus kachawasqayku jallp'aman chayarqayku. Chay jallp'apeqa cheqamanta lechewan misk'iwan yaku jina purishan. Kay jinata chay jallp'apeqa poqoj kasqa. 28Chaywampis, chaypi tiyakoj runasqa manchay kallpasniyoj kasqanku, llajtasninkupis jatuchaj, perqaswan sumaj jark'achasqastaj. Chantapis rikullarqaykutaj Anacpa mirayninmanta kajkuna jatuchaj runas kasqankuta. 29Néguev cheqaspi amalecitas tiyashanku, loma chaynejkunapitaj tiyashanku hititas, jebuseos, amorreoswan. Jatun Qocha chaynejpi Jordán Mayu kantupitaj cananeos tiyakushanku. 30Calebtajrí Moisespa contrampi oqharikojkunata ch'inyachispa, nerqa: Noqanchejqa kunampacha rispa, chay jallp'ata jap'ikampunanchej tiyan. Noqanchej aswan atiyniyoj kanchej paykunamanta nisqaqa, nispa. 31Calebwan khuska rejkunatajrí kuticherqanku: Mana. Mana atipasunmanchu chay runasta. Paykunaqa aswan kallpayoj kanku noqanchejmanta nisqaqa, nispa. 32Wakin rejkunataj israelitasman nerqanku: Noqayku qhawamorqayku chay jallp'asqa chaypi tiyaj runasta mikhuykoj kasqanta, chaypi tiyakoj runaspis jatuchaj kanku. 33Rikullarqaykutaj Anacpa mirayninmanta kajkuna jatunkaray runasta. Noqaykoqa paykunaj qayllankupi langostas jina juch'uysitus karqayku, paykunapis juch'uysitusta jina qhawariwayku, nispa.

will be added

X\