1 Tata Diosqa Moisesman parlaspa, nerqa: 2 Iskay cornetasta qorimanta ruwakuy martillowan takaspa. Chaykunaqa kanqa runasta tantachimunapaj, jinallataj maymampis puririnapaj. 3 Sichus chay iskaynin cornetas waqanqa chayqa, tukuynin runas ñawpaqeykiman tantakamonqanku, Dioswan Tinkukuna Toldo punkuman. 4 Sichus uj cornetalla waqanqa chayqa, tukuy kurajkunalla sapa ayllumanta ñawpaqeykiman tantakamonqanku. 5 Cornetas sinch'ita waqamojtinku, inti llojsimuy uyapi jarakojkuna oqharikonqanku puririnakupaj. 6 Qhepan kutipi sinch'ita waqamojtinkutaj, uranejpi jarakojkuna oqharikonqanku. Ujllapi sinch'ita cornetas waqamojtinku, señal kanqa ñanta puririnankupaj. 7 Cornetas waj jinata waqamojtinku, señal kanqa tukuy israelitas tantakunankupaj. 8 Chayta tocajkunataj kanqanku sacerdotes, Aaronpa mirayninmanta kajkuna. Chay leyqa qankunapaj wiñaypaj churasqa kanqa. 9 Sichus jallp'aykichejpi kashajtiykichej pipis qankunawan maqanakoj jamonqa chayqa, cornetasta sinch'ita waqachinkichej, jatunmantataj qhaparinkichej. Ajinamanta Noqa Señorniykichej Tata Dios qankunamanta yuyarikusqaykichej, enemigosniykichejmantataj jark'akusqaykichej. 10 Maypachachus kusikunaykichej kajtimpis, cornetasta kusiywan waqachinkichej, mosoj killapi fiestata ruwaspa, Tata Diosman q'olachisqa jaywanasta jaywashaspa, allinyakuy jaywanasta ima jaywashaspa. Ajinata qankunamanta yuyarikusqaykichej. Noqamin Señorniykichej Tata Dios kani. 11 Iskay watamanta iskay kaj killapi, iskay chunka p'unchay kashajtin, phuyu oqharikorqa Dioswan Tinkukuna Toldo patamanta. 12 Jinapi israelitasqa Sinaí ch'in pampamanta purirerqanku. Phuyutaj Parán ch'in pampanejpi sayarqa, 13 Tata Diosqa Moisesnejta kamachisqanman jina. 14 Ñawpajta purirerqanku Judá ayllumanta kajkuna soldados jina, wiphalankuta oqharikuspa. Paykunatataj kamachejninku jina pusasharqa Aminadabpa churin Naasón. 15 Isacar ayllumanta kajkunata kamachejninku jina pusasharqa Zuarpa churin Natanael. 16 Zabulón ayllumanta kajkunata kamachejninku jina pusasharqa Helonpa churin Eliab. 17 Chaymantataj Gersonpa mirayninmanta kajkuna, Merarijpa mirayninmanta kajkunapiwan, Dioswan Tinkukuna Toldota phaskarqanku. Chay imasta oqharikuspa, paykunaqa purirerqanku, paykuna chay imasta apanankupaj cuentayoj kasqankurayku. 18 Rubén ayllumanta kajkuna soldados jina wiphalankuta oqharikuspa, paykunaj qhepankuta purirerqanku; kamachejninku jinataj paykunata pusasharqa Elisurpa churin Sedeur. 19 Simeón ayllumanta kajkunata kamachejninku jina pusasharqa Zurisadaijpa churin Selumiel. 20 Gad ayllumanta kajkunata kamachejninku jina pusasharqa Reuelpa churin Eliasaf. 21 Chaykunaj qhepantapacha purirerqanku Coatpa churisnin, Tata Diosta yupaychanapaj t'aqasqa imas aparisqa. Paykuna chayanankupajqa ñapis Dioswan Tinkukuna Toldoqa sayachisqaña karqa. 22 Chay qhepankuta Efraín ayllumanta kajkunañataj soldados jina purirerqanku wiphalankuta oqharikuspa. Kamachejninku jinataj pusasharqa Amiudpa churin Elisama. 23 Manasés ayllumanta kajkunata kamachejninku jina pusasharqa Pedasurpa churin Gamaliel. 24 Benjamín ayllumanta kajkunata kamachejninku jina pusasharqa Gedeonijpa churin Abidán. 25 Tukuypa qhepantataj Dan ayllumanta kajkuna soldados jina wiphalankuta oqharikuspa rerqanku. Paykunatataj kamachejninku jina pusasharqa Amisadaijpa churin Ahiezer. 26 Aser ayllumanta kajkunata kamachejninku jina pusasharqa Ocranpa churin Pagiel. 27 Neftalí ayllumanta kajkunata kamachejninku jina pusasharqa Enanpa churin Ahira. 28 Ajinata israelitasqa soldados jina sapa kuti qhepan qhepanta ñanta puririnanku karqa. 29 Uj kuti Moisesqa Hobabta wajyacherqa. Hobabqa madianita Reuelpa churin karqa, Reueltaj Moisespa suegron karqa; Hobabmantaj nerqa: Noqayku rishayku, Tata Dios qosaj niwayku, chay jallp'aman. Qampis noqaykuwan jaku ari; imatapis allinta qampaj ruwapusqayku, imaraykuchus Tata Diosqa niwayku israelitasta sumaj khuyakuyninwan pusanawaykuta, nispa. 30 Hobabtajrí payman nerqa: Mana, noqaqa llajtayman kutipunay tiyan, maypichus tukuy aylluypis kashan, chayman, nispa. 31 Moisestaj nerqa: Ama kutipuychu ari. Qan sumajta rejsinki kay ch'inkunapi maypichus jarakuna, chayta; chayrayku qan pusawayku ari. 32 Sichus qan noqaykuwan rinki chayqa, ima allin imastachus noqaykuman Tata Dios qowasqayku, chayta qampis jap'illankitaj. 33 Ajinata israelitasqa purirerqanku, Tata Diospata nisqa, chay orqomanta, rerqankutaj kinsa p'unchay puriyta. Diospa leyninwan kasharqa, chay arcaqa ñawpaqenkuta risharqa, maypichus jarakunankuta mask'aspa. 34 P'unchaypi paykuna purirejtinkukama, Tata Diospa phuyun patankuta risharqa. 35 Tata Diospa leyninwan kasharqa, chay arca purirejtinkamataj, Moisesqa sinch'ita nej: Sayarikuy ari, Tata Dios. Enemigosniyki Qanmanta ch'eqerachunku; chejnisojkunapis Qanta rikususpa, ayqechunku, nispa. 36 Diospa leyninwan kaj arca maynejpichus sayarqa, chaypi Moisesqa nej: Kunanqa kutirimuy ari, Tata Dios, mana yupay atina israelita runasman, nispa.
