1 Tukuy llajtantin uj runa jinalla, plazapi, Yaku Punkuj ñawpaqenpi tantakorqanku. Yachachej Esdrasmantaj nerqanku: Israelpaj Diospa qosqan Moisesman kamachiynin qhelqata apamuychej, nispa. 2 Qanchis kaj killamanta 3 Chantá sut'iyaymantapacha chawpi p'unchaykama tukuypa ñawpaqempi rejsicherqa, Yaku Punku nisqaj ñawpaqenpi. Paykunataj sumajta uyarerqanku chay kamachiykunamanta qelqata. 4 Yachachej Esdrastaj sayasharqa madera patapi, mayqentachus chaypajpuni ruwasqanku, chaypi. Paña ladompi kaykunataj karqanku: Matatías, Sema, Anías, Urías, Hilcías, Maasías ima. Lloq'e ladompitaj karqanku: Pedaías, Misael, Malquías, Hasum, Hasbadana, Zacarías, Mesulam ima. 5 Jinataj Esdras chay qelqata kicharejtin, tukuy runakunaqa payta rikuyta aterqanku, tukuyninkumanta aswan patapi sayashasqanrayku. Qelqata kicharejtinkamataj, tukuy sayarikorqanku. 6 Esdrasqa Tukuy Atiyniyoj Tata Diosta yupaycharqa, tukuy runakunataj makinkuta oqharispa, kuticherqanku: jinataj kachun, jinataj kachun, nispa. Chaymantataj pampakama k'umuykuspa, Tata Diosta yupaycharqanku. 7 Kay levitakuna Diospa kamachiyninmanta yachachirqanku: Jesué, Baní, Serebías, Jamín, Acub, Sabetai, Hodías, Maasías, Kelita, Azarías, Jozabet, Hanán, Pelaía ima. Chaykamataj runaqa kikimpi sayaspallapuni kasharqanku. 8 Paykunaqa jatunmanta leerqanku Diospa kamachiynin qhelqata, chantataj allinta sut'incharqanku tukuy yachakunankupaj jina. 9 Tukuytaj Diospa kamachiyninta uyarispa waqarqanku. Chayrayku kamachej Nehemíasqa, chantá yachachej sacerdote Esdraspis, levitakuna ima tukuy runakunaman nerqanku: “Kay p'unchayqa Tata Diospa t'aqasqan chayrayku ama llakikuychejchu nitaj waqaychejchu,” nispa. 10 Chantá Esdrasqa nillarqataj: “Riychis, allin mikhunata mikhukamuychej, misk'i vinotataj ujyarikamuychej. Wajchakunamantaj mikhunaykichejmanta jaywariychej, imaraykuchus kay p'unchayqa Diospaj t'aqasqamin. Ama llakikuychejchu, imaraykuchus Tata Diosqa kusichisunqachej kallpachasunqachejtaj”, nispa. 11 Ajinallatataj levitakunapis runakunata ch'inyacherqanku: Amaña waqaychejchu, kay p'unchayqa Diospaj t'aqasqa kasqanrayku. Ama llakikuychejchu, nispa. 12 Chaypacha tukuy runakuna riporqanku mikhoj, ujyajtaj. Mikhunatapis wajkunaman jaywarerqanku, sumaj fiestatataj ruwarerqanku, imaraykuchus uyarisqankuta sumajta sonqonkupi jap'isqanku. 13 Q'ayantenqa, sapa familiamanta kurajninkukuna, chantá sacerdotekuna, levitakuna ima, yachachej Esdraswan tantakorqanku, Diospa kamachiynin imatachus nisqanta yachaqanankupaj. 14 Chaypitaj repararqanku Tata Diospa kamachin Moisesnejta qhelqasqa kasqanta, chay qanchis kaj killa yuyarikuy fiestata ruwashaspaña ch'ujllakunapi israelitakunaqa tiyakunanku kasqanta. 15 Chaypacha tukuy Judá llajtakunaman, jinataj kikin Jerusalenmanpis willachimorqanku runakunaqa monteman mask'aj rinankuta olivo ramakunata, k'ita olivo ramakunata, arrayán ramakunata, palmera ramakunata, chayrí waj ima thansa sach'aspa ramankutapis, chaywan ch'ujllakunata ruwanankupaj, qhelqasqa kasqanman jina. 16 Tukuyninkutaj sach'a ramakunawan ch'ujllakunata ruwakorqanku, wakin wasi patapi, wakin patiopi, wakintaj Diospa Templonpa patiompipis, Yaku Punku nisqa plazapipis, jinallataj Efraínpa Punku nisqa plazapipis ruwallarqankutaj. 17 Preso apasqa kasqankumanta kutimpojkunaqa tukuyninku ch'ujllata ruwakorqanku, chaypitaj tiyakorqanku. Nunpa wawan Josuejpa tiemponmantapacha chay p'unchaykama mana jayk'ajpis chayta ruwasqankuchu. May jatun kusiytaj paykunapaj karqa. 18 Esdrasqa, sapa p'unchay, Diospa kamachiynin qelqata, qanchis p'unchay junt'ata, yachacherqa. Pusaj kaj p'unchaypitaj jatun fiestata, yachasqankuman jina ruwarqanku.
