NEHEMÍAS 12

1Kaykuna kanku sacerdotekunawan levitakunawan kutimpojkuna, pikunachus Salatielpa wawan Zorobabelwan, Jesuawan ima kutimpojkuna: Seraías, Jeremías, Esdras, 2Amarías, Maluc, Hatús, 3Secanías, Rehum, Meremot, 4Ido, Gineto, Abías, 5Mijamín, Maadías, Bilga, 6Semaías, Joiarib, Jedaías, 7Salú, Amoc, Hilcías, Jedaías ima. Chaykuna karqanku sacerdotespa kurajninkukuna, jinataj familiasninku ima Jesuajpa tiempompi. 8Levitakunaqa kaykuna karqanku: Jesúa, Binuy, Cadmiel, Serebías, Judá, Matanías ima. Payqa, chay ruwaj masisninwan khuska takiykunawan Diosta yupaychanankupaj churasqa karqanku. 9Bacbuquiaswan, Uniwampis ruwaj masisninkuwan khuska kikillantataj ruwarqanku. 10Jesuaqa Joiacimpa tatan karqa, Joiacimtaj Eliasibpata, Eliasibtaj Joiadajpata, 11Joiadataj Johananpata, Johanantaj Jadúaj tatan karqa. 12Joiacimpa tiemposnimpi sacerdote familiaspi kamachejkuna kaykuna karqanku: Seraiaspa familianmantaqa Meraías karqa, Jeremiaspamantaqa Hananías karqa; 13Esdraspamanta Mesulam, Amariaspamanta Hohanán, 14Melicujpamanta Jonatán, Sebaniaspamanta José, 15Harimpamanta Adna, Meraiotpamanta Helcai, 16Iddojmanta Zacarías, Ginetonpamanta Mesulam, 17Abiaspamanta Zicri, Miniaminpamanta Moadiaspamantawan Piltai, 18Bilgajpamanta Samúa, Semaiaspamanta Jonatán, 19Joiaribpamanta Matenai, Jedaiaspamanta Uzi, 20Salaipamanta Calai, Amocpamanta Eber, 21Hilciaspamanta Hasabías, jinataj Jedaiaspamanta Natanael ima. 22Eliasibpa, Joiadaj, Johananpa, jinataj Jadúaj tiemposninkumantapacha levitakunaqa, jinallataj sacerdotekunapis sapa familiapi tatas jina libropi qhelqasqa karqanku, Persiapi kamachej Daríoj tiemponkama. 23Levijpa ayllunmanta kajkuna sapa familiapi kamachej tatakuna jina, chay willaykunayoj libropi sutisninkuta qhelqacherqanku Eliasibpa wawan Johananpa tiemponkama. 24Levitaspa kurajninkukuna kaykuna karqanku: Hasabías, Serebías, Jesúa, Binuy, Cadmiel ima. Paykunaj ruwaj masisninkupis paykunaj ñawpaqenkupi kasharqanku, sapa ujpis mit'asninkupi Señorta yupaychaspa, agradecespa ima, Diospa kamachin kamachej David kamachisqanman jina. 25Punkusta qhawajkuna kaykuna karqanku: Matanías, Bacbuquías, Obadías, Mesulam, Talmón, Acub ima. 26Chaykunaqa kawsarqanku Josadacpa allchhin Jesuajpa wawan Joacimpa tiemposnimpi, jinataj kamachej Nehemiaspa tiempompi, sacerdote yachachej Esdraspa tiempompi ima. 27Jerusalén perqata Diosman jaywapuna p'unchay chayamojtin, levitakunata mask'arqanku maypichus tiyakusqankupi. Chantá paykunata Jerusalenman pusarqanku llajta muyuynin jatun perqata Diosman jaywanankupaj, kusiywan, takiykunawan, yupaychaykunawan, platillosta, arpasta, lirasta ima tocarispa. 28Takejkuna levitakunataj Jerusalén qayllasmanta, Netofa ranchosmanta, 29Gilgal wasismanta, Gebajmanta, jinataj Azmavetpa ranchosninmantapis Jerusalén llajtaman rerqanku. Chay takejkunaqa Jerusalén llajta qayllaspi ranchosta ruwakusqanku. 30Chaypacha levitakuna, jinataj sacerdotekunapis llimphuchakorqanku. Chaymantataj tukuy runakunatapis llimphuchallarqankutaj, llajtaj punkusninta, perqasninta ima. 31Chantá Judá ayllumanta kamachejkunata perqa pataman wicharicherqani. Chay takejkunata iskay qotuman t'aqarqanku. Chay ujnin kaj t'aqaqa perqa patanta rerqa pañaman, Q'opa Wijch'una Punku nisqa ladoman. 32Chay takejkunaj qhepankutataj Osaías risharqa Judamanta khuskan kamachejkunawan. 33Paykunawan rerqanku Azarías, Esdras, Mesulam, 34Judá, Benjamín, Semaías, Jeremías ima. 35Sacerdotesmanta kajkunaqa cornetaswan qhaterqanku. Chaykuna karqanku: Jonatanpa wawan Zacarías. Paypa ñawpa tatasninku karqanku: Semaías, Matanías, Micaías, Zacur, jinataj Asaf. 36Chay jawa masisninkumanta karqanku: Semaías, Azarael, Milalai, Gilalai, Maai, Natanael, Judá, Hanani ima. Chaykunaqa Diospa kamachin Davidpa tocanasninta tocasharqanku. Paykunaj ñawpaqenkutaqa yachachej Esdras risharqa. 37Pujyu Punku nisqa chaynejta rispa, perqa patanta wicharerqanku Davidpa llajtanman wicharina patillasninta, Davidpa kamachinan wasita patanejmantapacha Yaku Punku nisqakama; chayqa inti llojsimuynejpi jina kashan. 38Chay iskay kaj qotu takejkunataj lloq'eman rerqanku. Noqaqa chay takejkunaj qhepanta perqa patanta rerqani tukuynin runakunamanta khuskanninwan Hornos Torre nisqamantapacha chay Ancho nisqa Perqakama. 39Efraínpa Punkunta pasarqayku, chantá Jesanaj Punkunnejta, chaymantataj Challwas Punku nisqanejta, Hananeel Torrenejta, jinataj Pachajkunaj Torren nisqanejta Ovejas Punku nisqakama. Sayaykorqaykutaj Soldadospa Qhawananku Punku nisqapi. 40Chaymantataj iskaynin qotus takejkuna t'aqas Diospa Templonman chayamorqanku. Noqataj chay kamachejkunamanta khuskanninkuwan chayallarqaykutaj. 41Cornetakunata waqachej sacerdotekuna kaykuna karqanku: Eliacim, Maaseías, Miniamín, Micaías, Elioenai, Zacarías, Hananías, 42Maasías, Semaías, Eleazar, Uzi, Johanán, Malquías, Elam, Ezer ima. Takejkunataj tukuyninku ujllapi sinch'ita takerqanku, Izrahiastaj paykunata takichisharqa. 43Chay p'unchaypi ashkha uywa wañuchisqasta jaywarqanku, runakunataj mayta kusikorqanku Dios paykunata mayta kusichisqanrayku. Warmikunawan, wawakunawampis sinch'itapuni kusikusharqanku. Chaypacha Jerusalenmpi kusikusqankoqa karumantapacha uyarikorqa. 44Chay tiempopi runakunata churarqanku waqaychana cuartokunapi jallch'achinankupaj qolqe kajmanta jaywanasta, ñawpaj poqojkunamanta qosqasta, sapa chunkamanta ujnin t'aqasqata ima, leypa nisqanman jina. Chay imastaqa sapa llajtamanta chayachimorqanku sacerdotekunapaj, levitakunapajwan, imaraykuchus Judamanta kajkunaqa maytapuni kusikorqanku sacerdotekuna, levitakuna ima chay jina k'achatapuni ruwasqankumanta. 45Sacerdotekunawan levitakunawan Diosta sirverqanku, jinataj chay llimphuchakuna nisqatawan ruwarqanku. Jinallatataj ruwarqanku takejkunawan, punku qhawajkunawampis Davidwan, wawan Salomonwan nisqankuman jina. 46Davidpa, chantá Asafpa tiemposninmantapacha runakuna churasqa kasqanku takiykunata, Diosman yupaychaykunata, graciasta qoykunatawan takichinankupaj. 47Ajinaqa Zorobabel kamachishajtin, jinataj Nehemías kamachishajtimpis, tukuynin Israel ayllumanta kajkuna sapa p'unchay mikhunasta apamoj kanku takejkunapaj, punku qhawajkunapaj, levitakunapajwan. Levitakunapis chay jap'isqankumanta wakinta t'aqaspa, qollajtaj kanku Aaronpa ayllunmanta kajkunaman.

will be added

X\