MIQUEAS 6

1Kunanqa uyariychej Tata Diospa nisqanta: Sayarikuspa, parlariy imatachus parlarinaykita, lomaspis uyarichunku parlasqaykita. 2Uyariychej qankuna orqos, jinataj kay pachaj cimientosnimpis. Tata Diosqa ayllumpa contrampi pleitoman yaykun; uj pleitopi kanqa Israel ayllunwan. 3Tata Diosqa kayta nin: Niway ayllúy, imanarqaykitaj, chayrí imapitaj phiñacherqaykiri? 4Noqa Egiptomanta orqhomorqayki, wata runa kaymanta librarqayki; Moisesta, Aaronta, Mariatapis kachamorqayki pusanasunkupaj. 5Munasqa ayllúy, yuyarikuy Moabmanta rey Balac imatachus wakichisqanta, Beorpa churin Balaampa kutichisqantataj. Yuyarikuy, Sitimmanta Gilgalkama imaynachus karqa, chayta, chaywan yachanaykipaj imaynachus Tata Dios qanwan karqa, chayta. 6Imawantaj chimpaykuyman yupaychaj janaj pachapi kaj Señor Tata Diostari? Payman chimpaykuymanchu uj watayoj torillota wañuchisqa q'olachinawan? 7Kusikunmanchu Tata Diosqa waranqa corderoswan, chayrí mayus junt'a aceitewampis? Kusikunmanchu kuraj kaj qhari wawaytapis jaywajtiy, sajra kayniymanta, juchaymantawan paganaypaj? 8Tata Diosqa nisunkiña imachus allin kasqanta. Payqa kayta munan ruwanaykita: Cheqan kajta ruwanaykita, khuyakuyta munakunaykita, Diosniykimantaj k'umuykunaykita. 9Tata Diospa parlasqanqa llajtapi uyarikushan. Tukuy sonqo chayta uyariy, ajinamanta yuyayniyoj kanaykipaj. Uyariychej, tukuy runas, jinallataj kamachejkunapis: 10Juchasapaj wasimpeqa kashan sajra ruwaymanta qolqe jap'isqa, chay qhapaj kaynin, jinallataj mana cabal pesas, mayqentachus chejnikuni, chay. 11Mana cabal pesasniyoj runataqa qhawakullasajchu? Mana cabal chimpuyojtapis allillan kasqanta nisajchu? 12Kay llajtamanta qhapaj kajkunaqa tukuyninku kanku runasta ch'uskejkuna, llullas, ch'awkeyajkunataj. 13Chayrayku castigasqayki; mana allin kawsayman chayachisqayki juchasniykirayku. 14Mikhuspapis mana sajsakunkichu, yarqhayllawampuni ñak'arinki. Mikhuna tantasqaykitapis mana waqaychayta atinkichu; imata jallch'awaj chaypis, maqanakupi chinkachisqa kananta ruwasaj. 15Tarpunki chaypis, mana cosechata oqharinkichu. Aceitunasta kutaspapis, mana aceitenta llamirinkichu; uvasta ch'irwaspapis, mana vinotaqa ujyankichu, 16Ajina kanqa imaraykuchus Omrijpa jinallataj Achabpa ayllumpa kamachisqasninkuta ruwasqasninkuta ima ruwarqanki. Imatachus paykuna ruwarqanku, ajinallataj qampis ruwarqanki. Chayraykumin Noqa qanta, chaypi tiyakojkunatawan runas alqochakunankupaj jina ruwasaj. Aylluypa p'enqaynintaj pataykiman urmamonqa.

will be added

X\