MIQUEAS 5

1Chaywampis kunanqa Jerusalén, wakichikuy jark'akunaykipaj imaraykuchus muyuykusqa kashanki, may sinch'itataj castiganqanku Israelpa kurajninta. 2Qantajrí Efratamanta Belén, Judapi llajtas kajmanta aswan juch'uy kanki; jinapis qanmantamin llojsenqa Israelta kamachejqa. Payqa karqa unaypuni wiñaymantapacha. 3Kunanqa Tata Diosqa saqenqa Paypata kajkunata, chay warmi, pichus uj qhari wawata nacechikunan kashan, chay nacekunankama. Chaypacha waj nacionman presos apasqa kajkuna kutimponqanku Israel aylluman. 4Reyqa jatarikonqa michinampaj Israel ayllunta Señornin Tata Diospa atiyninwan, jatun kayninwantaj, paykunataj allin kawsaypi tiyakonqanku, imaraykuchus Tata Diosqa jatunchasqa kanqa kay pachaj k'uchusninkama. 5Paymin chay allin kawsayta apamonqa. Maypachachus asirios jallp'anchejman junt'aykamonqanku, kamachina wasisninchejmantaj yaykuykamonqanku, chaypacha, kachasunchej paykunaj contrankupi qanchis kurajkunata, pusaj sumachaj runastataj. 6Paykunaqa Nimrodpa jallp'an Asiriata espadawan michenqanku; pikunachus nacionninchejpa lindesninta pasaykamuspa junt'aykamorqanku, chay asiriosmanta librawasunchej. 7Chaypacha, Jacobpa ayllunmanta puchojkuna ashkha nacionespa chawpinkupi kanqanku; chaykunaqa Tata Diospa apachimusqan chhulla jina kanqanku, chayrí para imaynatachus qhoras pataman urmamun mana runaj munasqanraykullachu, ajina kanqanku. 8Chaypacha, Jacobpa ayllunmanta puchojkunaqa ashkha nacionespa chawpinkupi kanqanku; imaynatachus uj león k'ita animales chawpipi karin, ajinata, chayrí imaynatachus uj león ovejas chawpipi pasaj jina t'ajllaspalla wañurachin mana ujtapis puchuchispa, ajinata. 9Qanqa Tata Dios, ajinatamin phinkiykunki, wañurachinkitaj tukuy contraykipi kajkunataqa. 10Tata Diosqa nillantaj: Jaqay p'unchaykunapeqa caballosniykita wañurachisaj, wañuchinaku maqanakupaj carretasniykitapis phirisaj. 11Llajtasniykita raqaykunaman tukuchisaj, chay tukuy jark'achasqa wasistapis urmarachisaj. 12Layqeriyosniykita chinkachisaj, ni uj adivinoyojta saqesqayki. 13Phirisaj chay lantisniykita, chay sumaj ch'eqosqa yupaychana rumisniykitapis, amaña jayk'ajpis chaykunaman yupaychaj kutinaykipaj, chay kikin makisniykej ruwasqan diosniykikunaman. 14Sik'irasaj chay yupaychana sach'asniykita, mana puchuyojtataj llajtasniykita phirisaj. 15Phiñakuyniypi vengakusaj, mana munarqankuchu kasuwayta, chay nacionesmanta.

will be added

X\