1 Kunan uyariychej Israelpa kamachejninkuna, jinataj kurajninkuna: Manachu qankuna yachanaykichej kashan imachus cheqan kaj justicia kasqanta? 2 Chaywampis qankunaqa allin kajta chejninkichej, munakunkichejtaj sajra kajta. Qankuna aylluypa qaranta ch'uskinkichej, q'ara tullusllatataj saqenkichej. 3 Aylluytaqa kawsashajllata oqoykunkichej. Qaranta ch'uskinkichej, tullusnintapis p'akirankichej; mankaman churaykunapaj aychata jina qhawankichej. 4 Uj p'unchaypi qankuna Tata Diosta qhaparikunkichej. Chaywampis Payqa mana uyarisonqachejchu. Jaqay tiempopeqa qankunamanta Pay pakakonqa, chay millay juchasta ruwasqaykichejrayku. 5 Israel aylloyqa pantay ñankunata rishan chay profetaswan ch'awkiyachikusqankurayku. Paykuna ninku: Allin kawsayllapi tiyakusunchej, nispa, pikunachus paykunata mikhuchinku, chaykunaman. Chaywampis maqaj sayaykunku, pikunachus mana imatapis mikhunankupaj qonkuchu, chaykunaman. Tata Diosqa chay profetasman nin: 6 Manaña ujtawan ch'isisnimpi mosqoypi jina profetaspa rikuyninkuta rikunkichejchu, nitaj imachus jamunanmanta ch'isiyaykuypi niyta atinkichejñachu. Inti yaykuponqa chay profetaspajqa, p'unchaypis laqhayaykapullanqataj. 7 Chay qhawajkunapis, adivinospis may p'enqaypi rikhurenqanku. Tukuy paykuna ch'inlla qhepakonqanku, Diosqa paykunata mana uyarisqanrayku. 8 Noqatatajrí Tata Diospa Espíritun atiywan junt'achiwan, justiciawan, kallpawantaj, Israelta uyampi nipunaypaj mana kasukoj, juchayojtaj kasqanta. 9 Kunan kayta uyariychej, qankuna cheqan kajta chejnejkuna, Israelpa kamachejninkuna kurajkuna kajkunapis, qankuna tukuy cheqan kajta q'ewijkuna: 10 Qankunaqa Sión orqopi Jerusalenta oqharinkichej wañuchinakuy patapi, mana allin ruwaykunaj patampitaj. 11 Llajtaj juezkunan rantichikunku, sacerdotesnimpis qolqeraykulla yachachinku, profetasninkupis qolqeraykullataj adivinanku. Chantá mayta parlanku Tata Diosqa paykunata yanapasqanta, jinatataj ninku: Tata Diosqa noqanchejwan kashan; mana ni ima sajrapis qhatiriwasunchejchu, nispa. 12 Chayrayku, qankunaj juchasniykichejrayku Sión orqopi Jerusalén llajtaqa barbecho llank'asqaman tukonqa, raqay qollusman jina. Maypichus Diospa Templon kashan, chay orqotaqa ch'umis p'ampaykonqa.
