1 Ay, jaqaykunamanta pikunachus puñunankupipis sajrata ruwanankupaj umachakushallankupuni, q'ayantin sut'iyamojtinkamataj chayta ruwanku atiyniyoj kasqankurayku, chaykunamanta. 2 Jallp'asta moq'enku, jap'ikapunkutaj; wasista moq'enku, qhechunkutaj. Kallpankuman atienekuspa, runasta familiantinta ñak'arichinku; imasnin kajtapis qhechukapullankutaj. 3 Chayraykumin Tata Diosqa nin: Noqapis chay runaspa contrankuta ujta wakichikushani. Qankunaman apachimusaj uj manchay ñak'ariyta, chaymantataj mana ni imaynamanta kunkaykichejta orqhoyta atinkichejchu. Manallataj mayta runaykachaspa purinkichejchu, imaraykuchus may ñak'ariy tiempos kanqa. 4 Jaqay p'unchaykunapeqa llakiy waqay yarawiswan takipayasonqanku kay jinata: Cheqamanta tukuyninchejpuni phirisqa kanchej: Tata Diospa kaj llajtanchej wajpa makinman chayarqa ni pej jark'akusqan; tukuy jallp'asninchejtapis rak'inakapunku noqanchejta atipajkuna enemigos, nispa. 5 Chayraykumin qankunajtaqa mana ima ruwanaykichej kanqachu Tata Diospa ayllun ukhupeqa. 6 Paykunaqa ninku: Ama chay profetas imata nispapis jamuchunkuchu, imaraykuchus mana ima llakiypis chayamuwasunchejchu, nispa. 7 Jacobpa ayllonqa maldecisqachu kashan? Chayrí Diospa paciencianchu tukukapun? Kay jinatachu Diosqa ruwanan? Astawampis Paypataqa k'acha parlasqasnin tiyan Israel ayllumpaj. 8 Qankunaqa aylluypa contranta oqharikunkichej. Allin kaj p'achankutapis lluch'urankichej wañuchinaku maqanakumanta kutimpoj jina runasmanta, pikunachus yuyarqanku ñak'ariykuna tukukusqantaña, chaykunamanta. 9 Aylluymanta warmista wijch'urankichej munasqa wasisninkumanta, wawasninkumantataj qhechunkichej wiñaypaj yupaychanawankuta. 10 Jatarikuychej, rillaychejpunitaj, kayqa mana samarikuna cheqachu; kay cheqaqa ancha pierdesqaña, sajra ruway ancha kasqanrayku. 11 Sichus pi ch'awkiyaj llullakoj runapis nin: Noqa sut'inchasqaykichej vinomanta, licormantawan, nispa, chayqa, chay runamari chay llajtapaj jina profetaqa kanqa. 12 Jacobpa ayllunmanta kajkunata tukuyninkuta tantasaj; Israelmanta uj chhika puchojta oqharikapusaj. Tantaykusaj, imaynatachus ovejasta tropaman tantaykunchej, ajinata; pastos chawpipi michisqa ovejas jina kanqanku, may chhika runas jinataj ch'ajwarenqanku. 13 Diosqa ñanninkuta kicharispa renqa, paykunataj qhatenqanku; llojsenqankutaj llajtankoj punkunta. Jinapi reyninku Tata Diosmin tukuyninkoj ñawpaqenkuta renqa.
